Génesis 17

Abraham señalakushqan

1Abram isqun chunka isqun (99) watayuq kaykaptinmi Tayta Dios yuriparkur kayno nirqan: <<Noqami kaykä El-Shaddai.#17.1 El-Shaddai ninanqa lapanpaq munayniyuq Dios ninanmi. Nishqäkunata cäsukur jutsata mana ruraypa imaypis kaway. 2Qamwan pactuta rurashqäta cumplishaqmi.#Gén. 12.2-3. Tsaymi qampita miraqkuna atskaman mirapäkunanpaq bendicionnïta churashaq>>.

3Tsayno niptinmi Abram jukla lätakuykurqan. Tsaychömi Tayta Dios kayno nirqan: 4<<Pactu rurashqäta cumplirmi churashayki atska nación runakunapa taytan kanaykipaq. 5Kananpitaqa manami Abramnatsu jutiki kanqa, sinöqa Abrahamnami.#17.5 Abraham ninanqa atska runakunapa taytan ninanmi. Tsayno jutiki kanqa atska nación runakunapa taytan kanaykipaq churashqa kaptïmi.#Rom. 4.17-18. 6Qampita miraqkuna tsaytsikaman mirananpaq bendicionnïta churaptïmi atska nacionkunapis y reykunapis paykunapita kanqapaq.

7<<Kay pactuqa manami qamlapaqtsu kanqa, sinöqa tsurikikunapaq, wilkaykikunapaq, wilkaykikunapa tsurinkunapaq y paykunapita mas miraqkunapaqwanmi. Kay pactutaqa imayyaqpis cumplishaqmi. Qampa Diosniki kashqänömi qampita miraqkunapapis Diosnin kashaq. 8Qorpanöla taykashqayki Canaáncho kaq markakunatami qoykushayki. Tsaynölami qampita miraqkunata qoykushaq imayyaqpis tsaycho tänanpaq.#Hech. 7.5-6. Qampita miraqkunapa Diosninmi imayyaqpis kaykäshaq>>.

9-10Mastapis Abrahamta Tayta Dios kayno nirqan: <<Pactu rurashqäta chaskipäkunaykipaq qampis y qamwan kaykaq lapan olqu kaqkuna cuerpuykita señalakäriy. Tsaynöla señalakärinqa qampita miraqkunapis.#Hech. 7.8; Rom. 4.11. 11Señalakushpayki pishqu puntaykipa qaranta kutsukärinki. Tsayno señalakurmi pactu rurashqäta chaskipäkunki. 12Kananpitaqa olqu yuriq kaqta pusaq junaqniyuqlata pishquncho señalapäkunki. Makikicho yuriqkunata y juk lädu nacionpita ashmaynikipaq rantishqayki runakunatapis tsaynöla señalapäkunki. 13Pactu rurashqäta imaypis yarpänaykipaq lapayki mana qonqaypa señalakärinki. 14Mayqanpis mana señalakurqa pactu rurashqäta manakaqmanmi churaykan. Tsayno kaqtaqa qamkunapita qarqunki>>.

15Tsaypitanami Tayta Dios Abrahamta kayno nirqan: <<Kananpitaqa warmikipa jutin manami Sarainatsu kanqa, sinöqa Saranami.#17.15 Sara ninanqa princesa ninanmi. 16Paytami bendicionnïta qoshaq tsuriki yurinanpaq. Tsaymi warmiki kanqa atska nacionkunapa mamanno. Paypa wawankunapita miraqkunami reykunapis kanqapaq>>.

17Tayta Dios tsayno niptinmi Abraham yapay lätakuykur shonqulancho asikushpan kayno nirqan: <<Pachak (100) watayuq kaykarnaqa ¿imanöpataq tsuriyuq käman? Warmï Sarapis isqun chunka (90) watayuqna kaykarqa ¡imanöpanataq wawayuq kanman!>>

18Tsaymi Tayta Diosta Abraham kayno nirqan: <<Tsurï Ismaelta bendicionnikita qoptiki alimi kanman, Tayta>>.

19Tsayno niptinmi Tayta Dios kayno nirqan: <<Manami Ismaelpaqtsu niykä, sinöqa warmiki Saracho yurinanpaq kaq tsurikipaqmi. Tsay tsurikipa jutinmi kanqa Isaac.#17.19 Isaac ninanqa asin ninanmi. Pactu rurashqäqa Isaacpaq y paypita miraqkunapaqmi imayyaqpis kanqa. 20Manakamashqaykinölami Ismaeltapis bendicionnïta qoshaq paypita miraqkuna jatun nación rikakunanpaq. Paypa tsurinkunapis chunka ishkay mandaqkunami kanqa.#Gén. 25.12-18. 21Pactu rurashqämi itsanqa Saracho yuriq tsuriki Isaacpaq kanqa. Watan kananno witsanqa wawayuqnami Sara kaykanqa>>.

22Tsayno nirkushpanmi tsaypita Tayta Dios aywakurqan. 23Tsay junaqmi Tayta Dios nishqannöla makincho kaykaq lapan olqukunapa pishqunta Abraham señalarqan. Tsaymi tsurin Ismaelta, makincho yuriq runakunata y ashmayninpaq rantishqan runakunatapis señalarqan. 24Tsay señalakunan junaq Abraham kaykarqan isqun chunka isqun (99) watayuqmi. 25Tsurin Ismaelnami kaykarqan chunka kimsa watayuq. 26Tsay junaqlami Abraham y tsurin Ismaelpis señalakurqan. 27Tsaynöpis tsay junaqlami Abraham señalarqan makincho yuriq olqu ashmayninkunata y rantishqan jäpa runakunatapis.

Currently Selected:

Génesis 17: qvmB

Highlight

Copy