Génesis 16
16
Ismael yurishqan
1Abrampa warmin Sarai qoluq kaptinmi wawan mana karqantsu. Saraipa ashmayninmi Agar jutiyuq jipash karqan. Payqa karqan Egiptupitami. 2Saraimi Abramta kayno nirqan: <<Qoluq kanäpaqmi Tayta Dios destinamashqa. Tsayno kaykaptïqa wamrayuq kanäpaq ashmaynï Agarwan punuykulay. Paycho tsuriki yuriptinqa kikïpa wawänömi kanqa>>.
Tsayno ruwakuptinmi Abram awnirqan Sarai nishqanta.
3Awniptinmi Saraiqa Abramta punutsirqan Egiptupita apamushqan ashmaynin Agarwan. Tsayqa karqan Canaáncho chunka watana Abram taykaptinmi. 4Abramwan punurkurnami qeshyaq rikakur Agarqa patrönan Saraita mamatupayta qalaykurqan.
5Tsaymi Abramta Sarai kayno nirqan: <<Agarwan pununaykipaq kikï niykaptïpis qeshyaq rikakur manakaqman churamänanpaq qammi jutsayuq kaykanki. Tsayno kashqaykipitami Tayta Dios juzgashunkipaq>>.
6Tsayno niptinmi warmin Saraita Abram kayno nirqan: <<Ashmaynikiqa makikichömi kaykan. Tsayno kaykaptinqa qampitanachari imata ruraptikipis>>.
Tsayno niptinmi Saraiqa ashmaynin Agarta witsaypa uraypa mandakurqan. Tsayno nakatsiptinmi Agarqa qeshpir aywakurqan.
7Tsayno qeshpikuykaptinmi Tayta Diospa angilnin yuriparqan chunyaq jirka pukyu nawpancho. Tsay pukyu karqan Shur partipa aywana nänichömi. 8Tsaychömi ángel tapurqan kayno nir: <<Saraipa ashmaynin Agar, ¿maypitataq aywaykämunki? Y ¿maypataq aywaykanki?>>
Tsawraqa Agar nirqan: <<Patrönä Saraipitami qeshpikuykä>>.
9Tsawraqa Tayta Diospa angilnin kayno nirqan: <<Patrönayki Saraiman kutiykur pay mandashushqaykita imatapis ruray>>.
10Nirkurmi yapay kayno nirqan:
<<Wawaykipita miraqkuna yupaytapis mana atipaypaqmi mirapäkunqa.
11Qeshyaq kaykashqayki wawayki olqumi kanqa.
Tayta Diosmi mayashushqanki lakikur manakushqaykita.
Tsay wawaykipa jutinmi kanqa Ismael.#16.11 Ismael ninanqa Tayta Dios mayan ninanmi.
12Tsay wawaykiqa kanqapaq chucaru cawallunömi.
Pïmaywan pelyaptinmi pïmaypis chikir contran sharkunqa.
Aylunkunawanpis chikinakurmi kawanqa>>.
13 Tayta Dioswan parlashqanta tantiyarmi Agarqa kayno nirqan: <<Qamqa rikamaqnï Diosmi kaykanki>>.
Tsaypitami Diospa jutinta churaparqan El-Roí#16.13 El-Roí ninanqa Rikamaq Tayta Dios ninanmi. Tsayno jutinta churaparmi Diospa mas juk jutinta churarqan. kananpaq. 14Tsaymi tsay pözupa jutinta churaparqan Beer Lahai-Roí jutin kananpaq.#16.14 Beer Lahai-Roí ninanqa Kawaykaq Rikamaqpa Pözun ninanmi. Tsay pözuqa kaykan Cadespita Beredman pasaq nänichömi.
15Kutiykurnami Abrampa tsurinta Agar wacharqan.#Gál. 4.22. Tsurinpa jutintami Abram churaparqan Ismael jutin kananpaq. 16Ismael yuriptin Abram kaykarqan pusaq chunka soqta (86) watayuqmi.
Currently Selected:
Génesis 16: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
