Matewuzhu 12

Mbwana wa saapatu

1Wakathi otthuupule Yinsa khusala avira mmashapa la tiriku siikhu ya Saapatu. Anakhiyoni awe khuwaakhola jala, yo khwaaza wuurula nooja phunje zaya. 2Mafwarizeewu nawoona vitthu epile, khumuuza Yinsa yoori: “Owoone anakhiyoni awo anretta etthu ekhattaziweeyo orettiwa saapatu.”

3Ye khujipu araka: “Mweeyo khamwisomeeni etthu aarettiyeeyo Daawuuda wakathi ye na ashirikha awe aakholiweeyo ti jala? 4Ye eettiye Nnyupa ya Nluku, khurafuna phaawu zoohalalishiwa na ashirikha awe enkhiweeyo Nluku, etthu yahaari otakhisiwaaye orettiwa, ila aariina ruhusa yooretta aari anamalokozela a tiini paasi. 5Ama mweeyo khamwisomeeni nkano za Munsa yoori saapatu, anamalokozela a tiini aavonyiye kano Nnyupa Woosifwiwamo, siikhu yaya eto, ila khuhiina hatha paathuli? 6Miiyo kiniwuuza yoori apha ata otu azitiyeeyo Nyuupa Yoosifwiwamo. 7Ila eriwaka mweeyo mwaari ojuwa maana a mattakhuzi anraaye: ‘Kintakha huruma akintakha twaha,’ khamwaari onhukhumu ntthu ahina paathuli. 8Maana Mwaana wa Pinaatamu ti Mbwana wa Saapatu.”

9Khulaavo aphale vaya khweetta nsinakooka yaya atthaapale. 10Nttumphule aarimo mwinyi mmote woorakala nkhono. Aphano atthu akina aari otakhaaye onlokoveza Yinsa khumuuzela yoori: “Khayiivo ruhusa monkoni wa kano onvonisa ntthu siikhu ya Saapatu?”

11Ye khuwaajipu yoori: “Paani wa mweeyo, amana eeyana pwittipwitthi yawe ekwela valiphotto Saapatu, ahinlawaaye okhola alazavo? 12Ntthu ona fwayita khuluyeene zayita pwittipwitthi! Nakataalikha ewaapho ruhusa yooretta etthu yooshapweya Saapatu.”

13Aphano khumuuza mwinyi otule yoori: “Wookole nkhono awo.” Ye khookola, khuvonisiwa, khwiiya sawasawa na opu nkina. 14Ila mafwarizeewu apale khusaruwa khusala awaza shawuri za omuula Yinsa.

Karumeya woothawuliwa ti Nluku

15Yinsa noojuwa shawuri zaya epile, khulaawo okhule waya. Atthu enkeene khusala anlotta, ye khuwaavonisa alwele ooshi aariivo vakatthi wa atthu aya apale, 16khuwooza yoori ahinlupe paani yaya. 17Eto yaarettikhaniye yoori eretteye etile yaalupiweeyo ti napiyu Ezaaya yoori:

18“Otu ari apha karumeya aka, kinthawuliyeeyo,

mphetani aka, anfurahisaaye Rooho yaka,

kanpwehela nafusi yaka,

ye onteela olaleya ophukiwa wa atthu ooshi.

19Khanteela okheetisana wala onyakula,

khina anttelaaye osiila huula yawe mmatarikhi.

20Khanteela ovuja tteketthe yoomanyeya,

wala khanteela ozimisa mweeke wootthuwela,

mpakha athuule oshintta khwa shariya.

21Amalapo ooshi anttela wiiyana nroromelo khwa nzina lawe.”

Owahi wa Yinsa khwa wiikara masheethwani

22Paata ya toowo, khutiiseliwa namasheethwani woohooni na woohittakhuli, Yinsa khunvonisa, khwaaza woona na ottakhula. 23Atthu ooshi khwiiya ooshanka channu khusala oozelana yoori: “Khahi Mwaana wa Daawuuda otu?”

24Mafwarizeewu akina noosiila toowo khuri: “Otu oniikara masheethwani paasi khwa owahi wa Belezibuuli, mfwalume wa masheethwani.”

25Aphano Yinsa noojuwa etthu aari wuupuwelaaye yo, khuwooza yoori: “Wakhula ofwalume wa waawanyeya khusala wuumana otthuuporu oniiya wootapanyeya, na wakhula sitati ama ojama wa waawanyeya otthuuporu khiniiyavo. 26Nkhama Epiliisi onimwiikara Epiliisi, eetta ojaawanya otthweru, aphano, ofwalume awe onteela wiiyavo toovi? 27Nkhama Miiyo kiniikara masheethwani khwa owahi wa Belezibuuli, khi aana enu aniikara toovi? Tiito aana enu atthaapo pi anttelaaye wuuphukani. 28Ila nkhama kiniikara masheethwani khwa Rooho ya Nluku, eto enthoonyeza yoori Ofwalume wa Nluku wafiya vakatthi venu.

29“Ama ntthu onvira toovi nnyupa wa nwali khuthuulamo maali zawe ahaazeeni onfuka khapula? Toowo phi anwahaavo wiiya vitthu za nnyupa mwawe.

30“Otule ahi vamote na miiyo ontta okuumanana, na otule ahinkusanyaaye khwa miiyo ontta omwaza. 31Etthiipo miiyo kiniwuuzani yoori, twampi na kufuru zooshi za anaatamu zinswamihiwa, ila okufurwela Rooho Ttakatthiifu khunswamihiwa. 32Wakhula otule anlupaaye nttakhuzi la omuumanana Mwaana wa Pinaatamu onswamihiwa, ila otule anttakhulaaye wawuumananavo Rooho Ttakatthiifu khanswamihiwa, waaza nasaapi eti mpakha okhu ninttaawo.

33“Muutthi wooshapweya oniima mishumo zooshapweya, muutthi wootakhala oniima mishumo zootakhala, maana wakhula muutthi onjuwiwa khwa mishumo zaya. 34Ojama wa nyookha, mweeyo ootakhala rooho, enretteya ottakhula vitthu zooshapweya? Maana milomo enttakhula etile eniiyaaye varoho. 35Ntthu wooshapweya rooho, mmujuju mwawe ensarulamo vitthu zooshapweya, wootakhala rooho mmujuju mwawe ensarulamo vitthu zootakhala. 36Ila miiyo kiniwuuzani yoori, siikhu ya ophukiwa, atthu anlawa arettiwe hisapu mwaasa wa mattakhuzi ooshi ohiina fwayita aari olupakaaye. 37Maana khwa mattakhuzi enu mwinteela wonkokha na khwa atthaapo mwinteela ohukhumwiwa.”

Alama ya Yuunusa

38Aphano mafwarizeewu akina na anamanozela a kano khulupa yoori: “Mwaaliimu, nintakha woona alama ya minjuza yoorettiwa ti weeyo.”

39Ye khujipu araka: “Khapila yootakhala na yooraruwa enveka alama ya minjuza, ila khinteela winkhiwa hatha moote ya ohiiyi alama ya napiyu Yuunusa. 40Maana nkhama etthiipo Yuunusa ekhaliyeeyo siikhu ttatthu nthana na osikhu mmatthupo wa swi, khwa etthiipo Mwaana wa Pinaatamu onttela wiikhala siikhu ttatthu nkhapuri. 41Atthu a Neniive anlawa alankhe siikhu ya ophukiwa, ookwiseleni paathuli, maana yo athupwiya twampi zaya paata ya osiila tafusiiri ya Yuunusa, otu mwiriina apha nasaapi anziti Yuunusa. 42Rayisi wa Kusini onlawa alankhe siikhu ya ophukiwa na khapila eti ookwiseleni paathuli, maana ye alankha peetiwene oteela osiila akhili za Seleyimaana, ila nasaapi otu ariiye apha anziti Seleyimaana.

43“Amana sheethwani anlawa ntthu, oneekesa vahali woohiivo maati yoori avumule, noohisikani puuro ye onlupa yoori: 44‘Kintta orutela nyuupa etile kaariimo.’ Noofiya, khusikana nyuupa oheettiweenimo, ori wooseeliwamo na waattaleliwamo saana. 45Aphano ontta oruti na atane vamote masheethwani sapa ootepa otakhala, na khweettamo khusala eekhala nttumpho. Na nanna ya mwiisho ya ntthu otule oniiya wootepa zayita omwanzo. Etthiipo enrettikhana khwa khapila eti yootakhala.”

Maama wa Yinsa na attwiize

46Yinsa nalelo eettaka ottakhula na khuntti etile, mamaawe na attwiize aarettiye ari vaje, antakhaka yoori anttakhulane. 47Ntthu mmote khumuuza yoori: “Mamaawo na attwiizo ari vaje antakha ottakhulana weeyo.” 48Ye khumuuzela yoori: “Maama ti paani? Wala attwiizaku a paani”? 49Khuwookolela nkhono anakhiyoni awe khulupa yoori: “Maama na attwiizaku pi apa ariiye apha! 50Maana otule anrettaaye matakhelo a Paapa ariiye pinkuuni, oto ti ttwiiyaku, nlupwaaka na ti maama.”

Currently Selected:

Matewuzhu 12: eko

Highlight

Copy