Matewuzhu 11

Yinsa na Yaahaya namoosa

1Paata yawiisha owaanozela anakhiyoni awe khumi na awiri, Yinsa khulawa sitati za Kalileya osomisa na otafusiri.

2Yaahaya, paata ya osiila ari nkalapooso vitthu aari orettaazo Al-Masiihu, khuwaaruma anakhiyoni awe olawa omuuzela yoori: 3“Ti weeyo otule aari weettelaaye ota, ama nimweekesele nkina?”

4Yinsa khuwaajipu araka: “Mwiruti mwamuuze Yaahaya epi mwinsiilaaye na mwinoonaaye: 5Ananhooni anoona, anamarakala aneettetta, anamaaharaja antta otwahareshiwa, ananhisiili ansiila, ananfwa ansisimuwa, na hapari zooshapweya antafusireliwa asikhini. 6Wooparikhiyiwa ti otule ahinanswaaye amini wawe khwa miiyo.”

7Aphano noolaavo anakhiyoni apale a Yaahaya, Yinsa khusala oozela khuntti etile monkoni wa Yaahaya yoori: “Mweetteliye woona ni n'yaara? Tteketthe yiinisiwaka ti pheevo? 8Ama, mweetteliye omoona ntthu awaliye kuwo zooshapweya? Moone, apale anwalaaye kuwo zooshapweya aniikhala mmanyupa wa afwalume! 9Nka kuuzeni, mweetteliye woona niini? Napiyu? Wekhweele, miiyo kiniwuuzani yoori anziti napiyu. 10Otu ti otule yaatikhiweeyo monkoni wa ye yoori:

“ ‘Moone, kinlawa kamperekhe karumeya aka omaasho waya;

yoori atthenkeze tarikhi yawo.’

11“Kiniwuuzani khweele yoori, khwa aana ooshi avokoliweeyo ti aakha, khapuweenivo hatha mmote wonziti Yaahaya Namoosa. Ila woopushuwa muufwalume wa pinkuuni nwulweene zayita ye. 12Waaza siikhu za Yaahaya Namoosa mpakha leelo, ofwalume wa pinkuuni ontta woojopholiwa, apo aya anjopholaaye anthuula. 13Maana Manapiyu ooshi na Kano za Munsa zahupiri mpakha yenzi ya Yaahaya. 14Na amana mwitakha okhupalela, ye ti Aliyaasi otule aari weettelaaye ota. 15Otule ariina mashiilo ti asiile!

16“Khapila eti kilattanisane niini? Enlattanana asimaana eekhaliye va parasa eettaka osheza na onyakula na ashirikha aya:

17“ ‘Fweeyo navumisa kuruneetha,

ila mweeyo khuhiini;

khwiipa liipo la huzuni,

ila mweeyo khuhilili.’

18Khuta Yaahaya woofuka na ahinnywaaye viinyu, mweeyo mwinri: ‘Ye onaaye masheethwani!’ 19Ata Mwaana wa Pinaatamu anjaaye na annywaaye, mwinri: ‘Otu nsokho na nnywachi, nshirikha wa anamariphisa lumpuru na anatwampi.’ Ila ojuwa onthoonyezeya khwa khaazi enikholeliwaaye.”

Phoole khwa sitati zihinthupwiyaaye

20Aphano Yinsa khwaaza omaruwela sitati epile aviriyeemo khurettamo minjuza zawaatta, maana atthu aari wiikhalaamo khathupwiyiye. 21“Phoole weeyo, Korazini! Phoole, weeyo Betezayiita! Maana eriwaka Tiiru na Sitooni zeettiye orettiwawo minjuza epi mwiretteliweeyo mweeyo, apale aniikhalaaye ottuukho nka athupwiye raku, khuwala saakhu na khujivaaza fuutha! 22Ila miiyo kiniwuuzani yoori siikhu ya ophukiwa enteela wiiyavo tthakaraka khwa Tiiru na Sitooni zayita mweeyo. 23Khi weeyo Kafwaranaawu, onttela oweziwa mpakha pinkuuni? Wala, weeyo onttela weeseleliwa motthooni! Eriwaka minjuza zirettiweeyo vakatthi vawo zeettiye orettiwa Sotooma, zaari weettela opharelela mpakha leelo. 24Ila miiyo kiniwuuza yoori siikhu ya ophukiwa enteela wiiyavo tthakaraka khwa Sotooma zayita weeyo.”

Ovumula wa apale ooshokhera

25Wakathi otthuupule Yinsa khulupa yoori: “Miiyo kinuusifu Paapa, Mbwana wa pinkuuni na vathi, maana weeyo wawaavithela vitthu epi anaakhili na asomi, na khuwaathoonyeza apa attiitthi. 26Khweele, Paapa, ti nanna waatakhiyeezo. 27Vitthu zooshi kenkhiwa ti Paapa. Khina aninjuwaaye Mwaana woohiiyi Paapa, na khina aninjuwaawe Paapa woohiiyi Mwaana na otule Mwaana anintakhelaaye onthoonyeza. 28Mwikiteele miiyo mooshi mweeyo mwiiyiye ooshokhera na oolemeliwa, miiyo kintta wuuvumulisani. 29Mwithuule tthentte yaka na mwikeezele, maana miiyo kiwoonyamala na woojipushuwisa nroho, mweeyo mwintta opattha ovumula wa nafusi zenu. 30Maana tthentte yaka ti yookhweya na mapwattha aka pi ooveya.”

Currently Selected:

Matewuzhu 11: eko

Highlight

Copy