Luuka 16
16
Nlikaniso wa namalokozela wa anakhaazi woohaamineyi
1Yinsa khuwooza anakhiyoni awe yoori: “Aarivo mwinyi mmote wa thaajiri aariina namalokozela wa anakhaazi awe, khuuziwa yoori: ‘Namalokozela otule ontta oharipu maali zawo.’ 2Ye khunkhuwelisa khumuuzela yoori: ‘Niini epi kinsiilaazo onrettaazo weeyo? Otiise warakha za hisapu koone etthu oretteliyeeyo nzurukhu aka, maana khunteela orutela wiiya namalokozela wa anakhaazi.’
3“Namalokozela wa anakhaazi otule khuupuwela toono: ‘Kinttela oretta ni, mbwanaaka amana akilikhisa khaazi? Othipa akinkhitiri na olawa olola enikipattha haaya. 4Aaa, kajuwa etthu yooretta yoori amana kiikariwa atthu akipokherele mmavaje mwaya.’
5“Aphano ye khuwaakhuwela ooshi apale aari wiiliwaaye ti mbwanaawe. Khumuuzela otule wamwanzo yoori: ‘Oniwiila kavi mbwanaaka?’ 6Ye khujipu yoori: ‘Onikiila ttompwiyo miiya za mafuttha.’
“Namalokozela wa anakhaazi otule khuri: ‘Teeni yawo ti eti eriiye va warakha apha, wiikhale waatikhe hamusiini.’
7“Elottelanaka khumuuzela otule wa phiiri yoori: ‘Khi weeyo oniiliwa kavi ti mbwanaaka?’ Ye khujipu yoori: ‘Kiniiliwa miphimo miiya za tiriku.’ Namalokozela wa anakhaazi otule khumuuza yoori: ‘Teeni yawo eti eriiye va warakha apha, waatikhe thamaaniini.’
8“Aphano Mbwana awe khunttottopela namalokozela wa anakhaazi otule woohaamineyi mwaasa wa akhili epile aariinaazo. Miiyo kiniwuuzani yoori, atthu a voolumwenku apha ana akhili zawaatta mmenttezi mwaya zayita atthu apale aneettettaaye nnuuru. 9Apho kiniwuuzani yoori: Mwirumeyele maali zenu zohiiyi za shariya yoori mwiiwaapatthe ashirikha, amana ziwiishelani yo oopokhereleni pinkuuni.
10“Otule anamineyaaye khwa etthu ttiitthiiru onaamineya khwa etthu khuluyeene; otule ahinaamineyaaye khwa etthu ttiitthiiru hatha etthu khuluyeene khanaamineya. 11Nkhama khamwaamineyeeni na maali zohiiyi za shariya, paani anttelaaye owaaminini khwa maali zookhweele? 12Nkhama khamwaamineyeeni na vitthu za watthu, paani anttelaaye owinkhani etthu enttelaaye wiiya yenu?
13“Khaavo karumeya enshapweyaaye owaarumeyela a Mbwana awiri, mwaasa yoori ontta omwiiphiirisa mmote, antuvelise otu nkina; ama oniiya wa waamineya khwa otu mmote, antarawu otu nkina. Khinwaheya onrumeyela Nluku na nzurukhu.”
14Mafwarizeewu apale oopheta nzurukhu nakuvu, noosiila mattakhuzi apale, khusala antheya Yinsa antarawaka. 15Aphano ye khuwooza yoori: “Mweeyo pi apale oojoona wiiya anashariya vakatthi wa atthu, ila Nluku onjuwa rooho zenu. Etile atthu anoonaaye wiiya ya fwayita, omaasho wa Nluku ti yootaraweya.
Owahi wa Kano
16“Kano na manapiyu khazilikheleleeni mpakha wakathi wa Yaahaya. Waaza wakathi otthuupo hapari za Ofwalume wa Nluku zinvira zilaleyiwaka, wakhula ntthu onjilipisa yoori eettemo. 17Ti yookhweya pinku na vathi wiisha zayita olaziwavo alama ttiitthiiru ya nttakhuzi la kano.
18“Wakhula nlume animwaashaaye muukhaawe khunrala muukha nkina ontta oraruwa; na aninralaaye muukha otule wa waashiwa naye ontta oraruwa.”
Thaajiri na Laazaru
19“Aarivo mwinyi mmote wa thaajiri aari owalaaye kuwo zooshapweya na zootafikhana, na wakhula siikhu eetta opuha, owawe yaari wiipikhiwawo etthu yoojiwa yannofu. 20Vanlako wa thaajiri otule atiisiweevo masikhini mmote wa waatta makhwatta aari wiitthiwaaye Laazaru. 21Ahithajiyaka oja tathela zaari okwaaye vameeza wa thaajiri otule, anapwa khusala ata olapa makhwatta awe.
22“Masikhini otule khufwa, khuthuuliwa pi malayikha khulawa khwiiya vamote na Eburahiima. Naye thaajiri otule khufwa khulawa khuzikhiwa. 23Ahera okhule eettaka woona shaani, ye khulansa maasho awe khweekesa otulu khumoona Laazaru ari mpavu wa Eburahiima. 24Ye khusala akhuwa araka: ‘Paapa Eburahiima, koonele huruma! Onrume Laazaru anaanise yaala yawe na maati ate azizimise nlimi laka, maana kintta ohukhumweya va moottho apha kiriivo.’
25“Eburahiima khunjipu yoori: ‘Mwanaka, omfwahamu yoori muuhaayi mwawo waapokheriye vitthu zooshapweya, ila Laazaru muuhaayi mwawe eetta ohoowa. Aphano ye asithirikha, weeyo ontta ohoowa. 26Olikha eto, vakatthi veetthu yatthiiwavo khilintti khuluyeene ehinlokheyaaye ntthu olankha okhuno ataaka okho wala okho ataaka okhuno.’
27“Thaajiri khulupa yoori: ‘Paapa Eburahiima, safwatali kinuuvekela yoori onrume Laazaru alawe wa ajamaazaku, 28kinaaye attwiizaku athaanu, alawe awooze yoori ahite okhuno kiriiwo wa ohoowiwawo.’
29“Eburahiima khunjipu yoori: ‘Attwiizo anaaye kano za Munsa na kithaapu za manapiyu, asiileze etthiipo.’
30“Thaajiri khukhanyarela araka: ‘Wala paapa Eburahiima! Amana ntthu asisimuwa muufwa alawa awooza, antta othupwiya.’
31“Eburahiima khujipu yoori: ‘Ahisiileziru kano za Munsa na za manapiyu, hatha nkhama ntthu eetta osisimuwa muufwa, yo khanteela onkhupalela.’ ”
Currently Selected:
Luuka 16: eko
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
