Yaahaya 18

Ofukiwa wa Yinsa

1Paata ya Yinsa wiisha olompa, khulankha na anakhiyoni awe khulokhela kaapu ya muuttho la Kedroni. Waariwo woorotha, ye khweetta ottuukho na anakhiyoni awe.

2Yuuda namazinkula aari ojuwawo ohali okhule, maana Yinsa swaafu zinkizene aari okusanyeyaka ottuukho na anakhiyoni awe. 3Aphano Yuuda khuthuula khuntti ya anajanka khweetta ottuukho na mawaziri akina aya arumiweeyo pi mahaakhimu a tiini na mafwarizeewu, athuuliye vimwasikhelo, na zuuma za nvittha. 4Yinsa, ajuwaka niini yaari weettelaaye orettikhana khwa ye, khuweettela khuwoozela yoori: “Mwinimweekesa paani?” 5Yo khujipu: “Yinsa, wa Nazareeti!” Aphano ye khuwooza yoori: “Ti miiyo.” Yuuda namazinkula, ti aariina atthu apale. 6Wakathi Yinsa alupiyeevo yoori “ti miiyo,” yo etta osusa khukwela vathi. 7Yinsa khuwoozela opheya yoori: “Mwinimweekesa paani?” Yo khujipu: “Yinsa wa Nazareeti!” 8Yinsa khuwooza yoori: “Kawuuzani yoori ti miiyo. Nkhama mwinikeekesa miiyo, mwiwaalikhe apa alawe.”

9Yinsa aalupiye toowo yoori eretteye etile aalupiyeeyo rakuzeene yoori: “Paapa, ooshi apale okinkhiyeeyo khakaashikheeni hatha mmote.” 10Aphano Simawu Pheeturu khusarula phanka, khushija nshiilo la karumeya mmote wa haakhimu nwulu wa tiini, nshiilo lawe la nkhono nlume. Nzina lawe karumeya aya otule laari Maliku. 11Ila Yinsa khumuuza Pheeturu yoori: “Opwehe phanka yawo! Akaari oteela onywela jiikira akinkhiyeeyo Paapa?”

Yinsa onttaniwa wa Anaasi

12Elottelanaka, khuntti etile ya anajanka na namalokozela aya na anamweekesela a mayaahuuti khunkhola Yinsa khunfuka. 13Omwanzweene khunlawana wa Anaasi, nkhwewe Kayifwa, aari haakhimu nwulu wa tiini mwaakha aya opule. 14Kayifwa ti othuuto awooziyeeyo mayaahuuti yoori yaari yooshapweya ntthu mmote owaafwela atthu ooshi.

Pheeturu oninkatthala Yinsa

15Simawu Pheeturu na nakhiyoni nkina eetta onlottelela Yinsa. Mwaasa wa yoori nakhiyoni oto aari ojuwanana haakhimu nwulu wa tiini, ye awahiye ofiya vaje wa nyuupa ya haakhimu nwulu wa tiini, 16ila Pheeturu aasaliye anwejaka othetekele wa nlako. Nakhiyoni otule nkina, aari ojuwananaye haakhimu nwulu wa tiini, khusaruwa, khulawa khuttakhulana nakhinzi otule aari weekeselaaye nlako khunlikha Pheeturu ovira. 17Aphano njaazi otule aari weekeselaaye milako, khumuuzela Pheeturu yoori: “Weeyo khahi ommote wa anakhiyoni wa mwinyi otu?” Ye khujipu araka: “Aki!” 18Mwaasa wa ozizima, akarumeya na anamweekesela khusikhanyela moottho khusala oottha. Pheeturu khweemela attaapho na ye, khusala oottha.

Haakhimu nwulu wa tiini onimuuzela Yinsa

19Aphano, haakhimu nwulu wa tiini khumuuzela Yinsa monkoni wa anakhiyoni awe na masomi awe. 20Yinsa khujipu araka: “Miiyo kawooza atthu a voolumwenku woosileyavo saaneene, na kaari osomisa nsinakooka mpakha Nnyupa Woosifwiwamo, nttumpho aari othukumanaamu mayaahuuti. Khina etthu kilupiyeeyo sirini. 21Khi oniikuzelelani? Owoozele apale akisiiliyeeyo, anjuwa saaneene vitthu kilupiyeeyo.” 22Wakathi Yinsa alupiyeevo toowo, namweekesela mmote amwaattamiyeeyo khumpiya omaasho, araka: “Haakhimu nwulu wa tiini onjipwiwa etthiipo?” 23Yinsa khunjipu yoori: “Nkhama kajipu etthu yootakhala, olupe etthu yootakhala kilupiyeeyo, ila nkhama kattakhula haakhi, khi wakipiyelani?” 24Aphano, Anaasi khumperekha Yinsa wa Kayifwa haakhimu nwulu wa tiini ari woofukiwa.

Pheeturu oninkhana Yinsa swaafu ya phiiri

25Pheeturu nalelo aari woottha moottho. Aphano khuuzeliwa yoori: “Weeyo khahi ommote wa anakhiyoni a mwinyi otu?” Ye khukhana araka: “Miiyo aki.” 26Elottelanaka, karumeya wa haakhimu nwulu wa tiini, jaama mmote wa otule Pheeturu anshijiyeeyo nshiilo, khumuuza yoori: “Miiyo kaawooniye nwoorotha orina othuuto!” 27Pheeturu khurutela theenya okhana. Wakathi otthuupo likukhuwi khwiikha.

Yinsa ari wa Pilaatu

28Nawiisha khuthuuliwawo Yinsa wa Kayifwa khulawaniwa nyuupa khuulu ya nsatoro. Yaari supuyeene. Anamalokozela a mayaahuuti khuhivirimo nnyupa mphule, aari otakha yoori ehiwaalawe twahara, yoori awahi onja Paashikowa. 29Aphano Pilaatu khusaruwa olawa ottakhulana yo na owoozela yoori: “Niini mwininlupezaye mwinyi otu?”

30Yo khujipu yoori: “Eriwaka khaari nazompere khanaari wuutisela weeyo.”

31Pilaatu khuwaajipu yoori: “Mwinthuule mwilawe mwamphuke khwa nanna enlupaazo kano zenu.” Aphano mayaahuuti khujipu yoori: “Enikhattaziwa fweeyo omuula ntthu.” 32Epo zaarettikhaniye toowo yoori emarisele mattakhuzi apale Yinsa aalupiyeeyo, wakathi aari ottakhulaavo monkoni wa nanna aari weettelaazo ofwa.

33Pilaatu khurutela nnyupa khuulu ya nsatoro, khunkhuwela Yinsa khumuuzela yoori: “Weeyo o mfwalume wa mayaahuuti?”

34Yinsa khujipu yoori: “Mattakhuzi aya apo onikuuzelaaye pa awo, ama atthu akina ti awuuziyeeyo monkoni wa miiyo?” 35Pilaatu khunjipu yoori: “Miiyo ki yaahuuti? Atthu awo na mahaakhimu a tiini ti akitiseeliyeeyo weeyo. Niini orettiyeeyo?”

36Yinsa khujipu yoori: “Ofwalume aka khayi wa voolumwenku apha! Eriwaka ofwalume aka waari wa voolumwenku apha, akarumeya aka eetta wuumanana mayaahuuti awaakhattazaka okikhola, ila weekhweele ofwalume aka khahiyo wa voolumwenku attaapha.”

37Aphano Pilaatu khulupa yoori: “Khupe weeyo o mfwalume.”

Yinsa khunjipu yoori: “Weeyo ti onlupaaye yoori ki mfwalume. Miiyo kavokoleliwa ethiito na ti ethiito ekitaniyeeyo voolumwenku, yoori kite kilawele oshaahiti wa haakhi. Wakhula otule eeyiye wa haakhi onsiila huula yaka.”

38Pilaatu khumuuzela yoori: “Haakhi niini?” Noolupa toowo khulankha opheya khulawa aphale aariivo mayaahuuti khuwooza yoori: “Miiyo akinimoonana hatha nlattu. 39Ila khwa zowera yenu mweeyo, miiyo kintta ontaphula napherezu mmote mwaasa wa ofiya wakathi wa Paashikowa. Mwintakha yoori miiyo kinfukulele mfwalume wa mayaahuuti?”

40Yo khunyakula ajipwaka yoori: “Wala, ye wala! Ninintakha Barapa.” Ila Barapa aari namahusuti.

Currently Selected:

Yaahaya 18: eko

Highlight

Copy