Mwanzo 41

Yuusufu ontaphulela jozi ya Firawuuna

1Eviriyeevo nyaakha miwiri, Firawuuna khulottha ari nshini wa muuttho oniitthiwaaye Niilu. 2Mmuttho nttumpho zivuuwakamo mompe sapa zooneneva na zooshapweya zittepulaka nyaani. 3Elottelanaka khuvuuwa mmuttho mompe sapa zootakhala na zawootta, khulawa khwiiya vamote na epile kiina nshini wa muuttho. 4Epile zootakhala na zawootta khurafuna epile zooshapweya zooneneva, attaaphale Firawuuna khusisimuwa.

5Khurutela olala khulottha theenya, misaasi sapa za tiriku zooshapweya zawiitaala ziwulaka vamote. 6Elottelanaka khuttapulukha misaasi sapa za tiriku zohitaali, zawuuma, zoolukuziwa ti pheevo za okhu lintthamuwaawo njuwa. 7Misaasi epile zohitaali khumiza epile zawiitaala sapa na zooshapweya. Firawuuna khusisimuwa khujuwa yoori eetta olottha.

8Noocha mmeesho mwaya supu, nafusi yawe khwiiya yooshukulikha, khurumisa olawa okhuweliwa anamajintta ooshi na anamapiya sako a Misuri. Firawuuna khuwooza jozi alotthiyeeyo, ila khuhiivo hatha ntthu mmote aajuwiiyeeyo otaphulela.

9Aphano namootela zoonywa khumuuza Firawuuna yoori: “Leelo kafikhiri koosa zaka. 10Siikhu moote mbwana mweephirisiweeyo pi anakhaazi enu mwaarumisiye ofukeliwa miiyo na nttunkhulu wa wuupa phaawu nkalapooso wa nttunkhulu wa anamweekesela. 11Osikhu mmote fweeyo awiri khulottha wakhula ntthu jozi yawe, wakhula jozi yaarina maana aya. 12Ila nkalapooso nttumphule aarimo shaapu mmote wa mwiipereewu aari mwiitthwaana wa nttunkhulu wa anamweekesela, fweeyo khumweeleza jozi zeetthu ye khutaphulela. 13Khurettikhana zooshi nkhama etthiipile aanuuziyeezo: miiyo khurutiseliwa khaazi yaka, otu nkina khuheyiwa.”

14Firawuuna khuruma olawa okhuweliwa Yuusufu, khulaziwamo nkalapooso nasaapiru. Khunyoola ttevu zawe khuwala kuwo kinoko khulawaniwa wa Firawuuna.

15Ye khumuuza Yuusufu yoori: “Miiyo kalottha jozi moote khuhipuwi hatha ntthu mmote wookitaphulela. Ila khusiila yoori weeyo amana wuuziwa jozi onwahi otaphulela maana aya.”

16Ye khunjipu Firawuuna araka: “Miiyo akina owahi, ila Nluku onwahi wuutaphulelani wooshapweyavo.”

17Aphano Firawuuna khusala amuuza jozi etile Yuusufu yoori: “Kalottha keemeliye nshini wa Niilu. 18Mmuttho mphule khusala zivuuwamo mompe sapa zooshapweya na zooneneva khusala zittepula nyaani nshini wa Niilu. 19Theenya khuvuuwa mompe sapa zawootta na zootakhala. Nti wooshi wa Misuri akinoone mompe zootakhala nkhama epo. 20Mompe etthiipile zootakhala na zawootta khumiza mompe epile zooneneva na zooshapweya, 21ila khusala zumpuwa nkhama zihijeeni etthu nalelo, khwiiya zawootta na zootakhala nkhama zaariizo. Ethiito miiyo khusisimuwa.

22“Khurutela olala khulottha theenya misaasi sapa za tiriku zooshapweya zawiitaala ziwulaka vamote. 23Elottelanaka khoona misaasi sapa za tiriku zohitaali zoolukuziwa ti pheevo za okhu lintthamuwaawo njuwa. 24Misaasi epile zohitaali khumiza epile zawiitaala sapa na zooshapweya, miiyo khuwooza anamajintta ila khuhiivo hatha mmote aawahiyeeyo otaphulela.”

25Aphano Yuusufu khumuuza Firawuuna yoori: “Jozi zenu epo zoopiiri enlupa etthu moote paasi, Nluku eetta wuuthoonyezani etthu anttelaaye oretta. 26Mompe epo sapa zooshapweya zinlupa nyaakha sapa. Misaasi sapa zooshapweya nayo zinlupa nyaakha sapa. Jozi zaya epo mooteru. 27Mompe epo sapa zawootta na zootakhala zaavuuwiyeeyo ziwelela aphale zaariivo epile zooshapweya enlupa nyaakha sapa. Misaasi epo sapa za maveya zaalukuziweeyo ti pheevo za okhu lintthamuwaawo njuwa, khumiza epile zooshapweya enlupa nyaakha sapa za jala.

28“Mattakhuzi apa kiniwuuza Firawuuna, Nluku eetta wuuthoonyeza etile anttelaaye oretta. 29Nyaakha sapa tuniya ya Misuri enteela oruwera venkivene. 30Ila theenya zinlawa zate nyaakha sapa za jala, oruwera opo onlawa wasahawiwe. Jala yaya eto enlawa yashintte nti opu. 31Khunteela ofikhireliwa oruwera opule, mwaasa wa jala enttela otepa waatta tuniya eti ya Misuri. 32Eto mwilotthisiweeyo swaafu piiri enlupa yoori Nluku alakela na onretta woohirupazi.

33“Apho mweeyo mfwalume, mwinthawule ntthu mmote woojuwa na wa akhili eeye nttunkhulu wa weettettisa tuniya eti ya Misuri. 34Mwirette etthiipo, mwiwaattheemo attunkhulu mmuti mphu asala alokotthela phantte ya thaanu za vitthu zinuuruliwaazo tuniya ya Misuri, khwa nyaakha epo sapa za oruweriwa. 35Yo ana yookusanya epile anttelaazo opattha nyaakha epo za oruwera, theenya ekusanyiwe tiriku yooshi epwehiwe yiiye mmakhono wa Firawuuna, yiiye etthu yooja ya mmasitati. 36Vitthu zoojiwa epo zinttela orumeyeliwa nyaakha epo sapa za jala enttelaaye ota tuniya ya Misuri yoori jala eto ehishintte tuniya eti.”

Yuusufu oninkhiwa ottunkhulu wa Misuri

37Firawuuna na mashawuriiya awe khoona yoori akhili epile za Yuusufu pi zooshapweya. 38Ye khuwooza mashawuriiya awe yoori: “Naari oteela ompattha ntthu nkhama otu wa weettettisiwa ti rooho ya Nluku?”

39Firawuuna khumuuza Yuusufu araka: “Wiiya Nluku othoonyeza vitthu epi, khaavo nkinoko wa akhili na woojuwa nkhama weeyo. 40Weeyo tiye onttelaaye wiiya nttunkhulu wa vaje vaka, atthu apa ariivo ooshi nka ashututelaka mattakhuzi awo, ila nkatthi woofwalume miiyo ki nttunkhulu zayita weeyo. 41Mpakha nasaapi eti kawinkha ottunkhulu wa tuniya eti ya Misuri yooshi.” 42Aphano, Firawuuna khuvula peetthe yawe khunwalisa Yuusufu, khuruma yoori awalisiwe kuwo zooshapweya na nkufu wa weero mmwisiko mwawe. 43Khupakhiriwa mmwikukutta opule wa phiiri, khulokoza anamalaleya alupaka yoori: “Mwinkokhorele!” Yuusufu enkhiweeyo ottunkhulu wa Misuri yooshi.

44Khulupa theenya Firawuuna amuuzaka Yuusufu yoori: “Miiyo ki Firawuuna, ila khina mmote antakhaaye oretta etthu tuniya eti ya Misuri ahaazeeni wuusikana weeyo.” 45Firawuuna khuntthaja Yuusufu nzina la Zafenathi Paneeya. Khunlooza muukha aari wiitthiwaaye Asenaathi, mwaana wa Potifweera, namalokozela wa tiini ya Ooni. Aphano Yuusufu khuzukulelisiwa tuniya etile yooshi ya Misuri.

46Ye aazaka khaazi ya mfwalume Firawuuna aarettiye arina nyaakha talaathiini na sitha, khunleeza Firawuuna khwaaza weettetta miti zooshi za Misuri. 47Nkatthi wa nyaakha sapa epile za oruwera tuniya etile yaarina tiriku yawaatta. 48Yuusufu khukusanya tiriku yooshi yaaruweriweeyo khwa nyaakha sapa tuniya ya Misuri khupweha mmasitati. Wakhula mashapa apale aattameliye sitati, tiriku yaari wuuruliwaaye yaari opwehiwa ottuukho. 49Yuusufu khukusanya tiriku yawaatta yahaari waalakeyaaye nkhama mishaka za mmattima, khulikha waalaka mwaasa wa waatta channu.

50Ehinafiye nyaakha epile za jala, muukha wa Yuusufu Asenaathi, mwaana wa Potifweera, khuwaapattha aana awiri. 51Otu wa mwanzo Yuusufu khuntthaja nzina la Manaase, alupaka yoori: “Nluku akisahawisa ohoowa waka na vaje wa apapazaku.”

52Otu wa phiiri aya khuntthaja nzina la Efwarayiimu, khulupa yoori: “Nluku akirizikhiya nti opu kihoowiyeeyo.”

53Aphano nyaakha epile sapa za oruweriwa tuniya ya Misuri khwiisha. 54Khufiya nyaakha epile sapa za jala aalupiyeeyo Yuusufu. Khupuwa jala tuniya yooshi, ila miti za Misuri zaarina etthu yoojiwa. 55Wakathi epariziyeevo jala Misuri, atthu ooshi khunvekela Firawuuna etthu yoojiwa. Ila ye khuwooza atthu ooshi a Misuri yoori: “Mwilawe mwakutthanane Yuusufu. Wakhula etile anttelaaye owuuzani mwirette ethiito.”

56Yuusufu nawoona yoori jala yamwazeyela tuniya yooshi khufukulela tiriku etile aapwehiiyeeyo, khusala awoozanyeza Amisuri mwaasa yoori jala etile yaashinttiye. 57Atthu a tuniya kiina aari ota Misuri oteela wuuzanya tiriku wa Yuusufu, mwaasa yoori jala yaamwazeyeliye olumwenku wooshi.

Currently Selected:

Mwanzo 41: eko

Highlight

Copy