Mwanzo 40

Yuusufu ontaphulela jozi piiri nkalapooso

1Paata yoovira vitthu epile, nttunkhulu wa namootela zoonywiwa na namuupa phaawu wa mfwalume wa Misuri khunkosa mbwana aya, mfwalume wa Misuri. 2Firawuuna khwiiya wookatipukha khwa anakhaazi awe apo awiri: Nttunkhulu wa namootela zoonyiwa na namuupa phaawu. 3Khuruma olawa ofukeliwa nkalapooso ya nttunkhulu wa anamweekesela, nttumphule aafukeliweemo Yuusufu. 4Nttunkhulu wa anamweekesela khumwinkha Yuusufu atthu apale awiri yoori asala awaatthantta, yo khwiikhala siikhu zawaatta nkalapooso.

5Osikhu mmote oowiiri khulottha, wakhula jozi yaarina maana aya, etile ya namuupa phaawu na ya nttunkhulu wa namootela zoonyiwa.

6Mmeesho mwaya supu Yuusufu khulawa owaathotola, khuwaasikana ari ooshukulikha. 7Aphano ye khuwoozela anakhaazi a Firawuuna apale aafukelaniweeyo khuri: “Leelo mwakafilikhela ni?”

8Yo khunjipu yoori: “Neetta wiiyana jozi, ila khuhiivo ntthu wootaphulela maana aya.”

Yuusufu khujipu yoori: “Nluku paasi ti ye anttelaaye otaphulela jozi epo, kuuzeni jozi zaya epo.”

9Nttunkhulu wa namootela zoonyiwa khumuuza jozi yawe Yuusufu araka: “Kalottha okiteeliye nrayi wa wuuva omaasho waka. 10Nrayi oriina virapi ttatthu za waaleya na khwiima mishumo zaari ottokotthaaye miwawa miwawa. 11Pilawuri ya Firawuuna eri mmakhono mwaka. Miiyo khuthuula mishumo za wuuva khuvinyela mpilawuri mphule kimwinkha mmakhono mwawe.”

12Yuusufu khuri: “Maana a jozi yawo eto tiiti: virapi ttatthu enlupa siikhu ttatthu. 13Nkatthi wa siikhu ttatthu Firawuuna ontta wuulazamo nkalapooso orutele khaazi yawo ya wootela zoonywa za mfwalume, na omwinkha pilawuri mmakhono mwawe, nkhama etthiipo waari orettakaazo raku. 14Ila amana zooshi ziweettettelaka saana ohikisahawu, kinuuhirimiza yoori okoonele huruma omuuze mfwalume monkoni wa miiyo, yoori kileemo nkalapooso mphu. 15Maana kalaziwa nti wa Meepereewu khutiisiwa okhuno, keettaka opuruliwa na kuvu, na okhuno akiretteeni hatha etthu yootakhala, yoori kisuhi wiiya nkalapooso mphu.”

16Asiiliyeevo nttunkhulu wa anamuupa phaawu yoori Yuusufu aataphuleliye jozi etile wooshapweyavo, ye khumuuza yoori: “Na miiyo kinaaye yaka, kalottha kipwecheriye phaawu khelenke ttatthu. 17Khelenke eti ya vatulu zaarimo wakhula nanna ya phaawu epile zontuvela Firawuuna, ila anyannyi khusala ajoropoja ziri veeshwa vaka.”

18Aphano Yuusufu khunjipu yoori: “Maana a jozi yawo eto tiiti: khelenke ttatthu epo enthoonyeza siikhu ttatthu. 19Nkatthi wa siikhu ttatthu etthiipo, Firawuuna onlawa athomeye eeshwa mmutthi, mwiili awo osala ojoropojiwa pi anyannyi.”

20Siikhu ya ttaatthu yaari siikhu Firawuuna aari orettaaye mwaakha, ye khujisa njampo na anakhaazi awe ooshi, khuruma okhuweliwa apale aari nkalapooso namuupa phaawu na namootela zoonywa. 21Namootela zoonywa khurutiseliwa khaazi yawe ya wootela na yoomwinkha pilawuri Firawuuna mmakhono mwawe. 22Ila Firawuuna khunthomeya namuupa phaawu nkhama etthiipile aalupiyeezo Yuusufu.

23Aphano namootela zoonywa khuhinfikhiri Yuusufu; khunsahawu.

Currently Selected:

Mwanzo 40: eko

Highlight

Copy