Mwanzo 37

Jozi ya Yuusufu

1Yaakhumpa aari wiikhala nti wa Kanaani ottuukho aasaafireliyeewo papaawe.

2Eti hatiithi ya ojama wa Yaakhumpa.

Yuusufu arina nyaakha khumi na sapa, aari nshuki wa pwittipwitthi na puuzi za papaawe vamote na attwiize aana a Biila na Ziilipa, aakha a papaawe. Yuusufu eetta omuuzaka papaawe vitthu zootakhala aari orettaazo attwiize.

3Ezirayiilu#37:3 Ezirayiilu nzina likina la Yaakhumpa. Woone kithaapu ya Mwanzo 32:28. aari wawuuluvala, wakathi aavokoliweeyo Yuusufu. Tiito aari omphetaaye channu zayita aana apale akinoko aya. Khunsonela ajapi ya kisawu zawaatta. 4Attwiize nawoona yoori oniiya oophetiwa ti papaaya zayita yo, khwaaza wiiphiiriwa ti ye khuhisala awahi onttakhulana saana.

5Siikhu moote, Yuusufu khulottha jozi, noowooza attwiize yo khutepa wiiphiiriwa ti ye.

6Ye khuwooza yoori: “Mwisiileze jozi kilotthiyeeyo! 7Kalottha niri mmashapa nifukaka misama za tiriku, nsama aka khweemela, misama zenu khuzukulela khwiinamela opu waka.”

8Attwiize khumuuzela yoori: “Apho niri weeyo onttela wiiya mfwalume eetthu fweeyo? Ama niri ti weeyo onttelaaye onilokozela?” Khutepa wiiphiiriwa mwaasa wa jozi etile na mattakhuzi awe.

9Khurutela olottha khuwooza attwiize yoori: “Kalottha theenya! Njuwa, mweezi na matthottowa khumi na limote zikiinameliye.”

10Noomuuza papaawe na attwiize, papaawe khunshowera araka: “Jozi ni eto olotthiyeeyo? Kiri miiyo, attwiizo na mamaawo ninteela wuukokhorela weeyo?” 11Waaza attaapho attwiize khuwaata nrima na ye, papaawe khusala apheleleza vitthu epile varoho vawe.

Wuuzanyisiwa wa Yuusufu pi attwiize

12Siikhu moote, attwiize Yuusufu aalawiye oshukisa nyama za papaaya kharipu ya sitati ya Shekemu. 13Aphano Ezirayiilu khumuuza Yuusufu araka: “Attwiizo anshukisa nyama kharipu ya Shekemu. Apho kintakha yoori weeyo olankhe olawe ottuukho.”

Ye khujipu yoori: “Kemaani, kasiila paapa.”

14Papaawe khumuuza: “Wawoone nkhama akumi na nyama zaya, ote okuuze.” Yaakhumpa oninrumaru aarettiye ari mmajokowa wa Heporooni, Yuusufu khulankha khusala alawa Shekemu.

15Asaleelaka ofiya Shekemu khuthowelela. Khusikaniwa ti mwinyi mmote eettaka ojeettettela ntthuttu khumuuzela yoori: “Weeyo! Oneekesa ni?”

16Ye khunjipu araka: “Kiniweekesa attwiizaku. Safwatali, kuuzeni ohali anshukisaawo nyama zaya.”

17Mwinyi otule khujipu yoori: “Apha avikanavo, kawaasiila araka: ‘Nintta Dotaani.’ ”

Yuusufu khusala aweekesa, khuwaasikana asaleelaka ofiya Dotaani. 18Attwiize noomoona eettaka ota, ari peetiwene ahinawaafiyele khuwaza shawuri zoomuula.

19Yo khuuzana yoori: “Ahee! Namalottha nwulu oto ontta ota! 20Aphano akhweya. Nlaweni nimuule nimweeselele valiphotto nalupe yoori eetta orafuniwa ti nyama za ntthuttu. Noone olottha wawe vahali onttelaaye wiishelavo.”

21Ruubeni noosiila khumwaakisela khulupa yoori: “Nihimuule!” 22Khulupa theenya yoori: “Nihimuule. Nimweeselele vanlipu oriiye n'yaara mpho, ila mwihinvulalise.” Ye alupaka toowo, aariye amuusuru ttwiiye arutele wa papaawe ari haayi.

23Yuusufu noowaafiyela attwiize, yo khunvula ajapi etile yooshapweya aawaliiyeeyo, 24khuntthempa khumweeselela vanlipu woohiivo maati.

25Yo khwiikhala yoori aje, khuwoona anazanshara eettaka ota ari peetiwene, annya esumayila aari olankhaaye Gileyaati na enkamiiya zaya aapakhiriye viluko, paalasamu#37:25 Paalasamu yaari pumata aari ottukuntteliwakaaye ntthu amana afwa yoori ahivutte., na mafuttha oonukhela eettaka Misuri.

26Yuuda khuwoozela attwiize yoori: “Ena fwayita ni omuula ttwiiyetthu khuvitha taamu yawe? 27Nihimuule, niwoozanyeze annya esumayila apo, maana ye ti ttwiiyetthu, taamu yeetthu moote.” Attwiize apale akinoko aya khukhupalela.

28Khunlazavo vanlipu aphale aamweeseleliyeevo, khuwoozanyeza annya esumayila aari oviraaye, a nti wa Midiyaani, na nzurukhu eshiriini wa feeta. Yo khunthuula khusala alawana Misuri.

29Wakathi Ruubeni aruteliyeevo vanlipu aphale, khuthurumelamo khuhinsikanivo, attaaphale khuvarula kuwo zawe athoonyezaka yoori ori nhuzuni. 30Khurutela aphale aariivo attwiize khuwooza yoori: “Mweeyo! Shaapu otule khaavo vanlipu aphale! Kiri toovi?”

31Khuthuula ajapi ya Yuusufu, khuula puuzi moote, taamu yaya khuttukunttela. 32Nooretta toole, khuthuula ajapi etile yawaatta kisawu khumweettisela papaaya, khumuuza yoori: “Ajapi eti neetta olokottha. Nkoonani nkhama khahiyo ya mwanenu.”

33Ezirayiilu khufwahamu khuri: “Ajapi ya mwanaka na khuri: Nyama yoohusuti yeetta onthapata khunrafuna.”

34Aphano Yaakhumpa khuvarula kuwo zawe khuwala saakhu khusala anlilela mwanawe siikhu zawaatta. 35Aanaawe ooshi aalume na aakha khuteela onzuru, ila ye khukatthala ozurwiwa alupaka yoori: “Kiniikhala woolila etthiipi mpakha olawa okutthanana mwanaka ahera.” Khwiiya wonlilela mwanawe Yuusufu.

36Wakathi aya opo amidiyaani aarettiye amuuzanyisiye Yuusufu wa Potifwaari nttunkhulu wa anamweekesela a Firawuuna.

Currently Selected:

Mwanzo 37: eko

Highlight

Copy