Mwanzo 34

Ojansiliwa wa Tiina

1Siikhu moote, Tiina mwaana wa Yaakhumpa na Liiya, aalankhiye olawa owaathotola aanaakha a nti otthuupule. 2Shekemu mwaana wa Hamori nhiiti mfwalume wa nti opule, noomoona, khunkhola khunjansili. 3Erettiyeevo toole khwiiya wootuveliwa ti Tiina mwaana wa Yaakhumpa, khumpheta, khumuuza mattakhuzi oomwiitthaaza rooho. 4Shekemu khumuuza Hamori papaawe yoori: “Mwakuurele mwaari otu kinrale.”

5Wakathi Yaakhumpa asiiliyeevo yoori mwanawe Tiina ajansiliwa ti Shekemu, aarettiye aanaawe ari ntthuttu ashukisaka nyama. Ye khunyamala khusala awaaweja aanaawe mpakha oruti.

6Khulankha Hamori paapa wa Shekemu olawa ottakhulana Yaakhumpa. 7Wakathi arutiyeevo aana a Yaakhumpa ntthuttu, noosiila vitthu epile yo khwiiya ooshanka channu, khuweephiira mwaasa yoori Shekemu aarettiye etthu yoopatthisa haaya vakatthi wa meezirayiilu, onjansili mwaana wa Yaakhumpa; eto etthu yahaari orettiwaaye.

8Hamori khuwooza yoori: “Mwanaka Shekemu atuveliwa ti mwanenu, apho safwatali mwinlooze eeye muukhaawe. 9Nirette ojama; aaneenu awaarale aaneetthu, na eetthu awaarale enu. 10Mwiikhale vamote na fweeyo, nti opu pu weetthu mwithawule wakhula phantte mwintakhaaye. Mwiikhale nttumphu mwirette zanshara zenu mpakha mwipatthe weenu.”

11Aphano Shekemu khumuuza papaawe Tiina na alupuwe yoori: “Safwatali mwikikhupalele mattakhuzi apa, kintta owinkhani wakhula etile mwinttelaaye oveka. 12Mwilupe mahari awaatta a mwanenu na tthuvo mwintakhaaye, kintta wuuriphani khwa nanna mwintakhaazo oveka, ila mwikilooze.”

13Aphano aana a Yaakhumpa khunjipu Shekemu na papaawe wonhatavo, mwaasa wonjansili nlupwaaya Tiina. 14Khunjipu yoori: “Khaninwahi onthuula nlupweetthu khunlooza nlume woohikhiriyi, enttela wiiya haaya khwa fweeyo. 15Ninkhupali wuuloozani nlupweetthu amana alume ooshi a mmuti mweenu eeya ookhiriya nkhama fweeyo. 16Toowo phi ninttelaavo wuuloozani aaneetthu na fweeyo owaarala aaneenu, ninttela wiikhala vamote niiye ojama mmote. 17Ila amana mwihikhupali okhiriya, nintta onthuula nlupweetthu nileemo mmuti mweenu.” 18Mattakhuzi apale Hamori na mwanawe Shekemu khukhupalela. 19Na woohirupazi, Shekemu khukhiriya, maana aari ontuvela channu mwaana wa Yaakhumpa. Shekemu aari wooshitahiwa channu mu ojama wa papaawe.

20Hamori na mwanawe Shekemu khulankha khulawa vanlako#34:20 Nlako wa sitati yaari puuro waazoweriweevo zaari ottakhuliwakaavo milattu na vitthu za zanshara. Woone kithaapu ya Mwanzo 19:1. wa sitati ethiitile owooza alume ooshi araka: 21“Atthu apa pi oosiilaneya, nlaweni niwaalikhe eekhale mmuti mweetthu mphu arettaka zanshara zaya. Nti opu nwulweene ewaamo puuro eniwaafiyelaaye, anilooze aanaaya na fweeyo niwaalooze aaneetthu. 22Ila yo ankhupali wiikhala vamote na fweeyo khwiiya ajamaazetthu amana alume ooshi akhiriya nkhama etthiipo nayo akhiriyiyeezo. 23Nyama zaya zooshi na maali zaya zooshi zinttela wiiya zeetthu; nlaweni nikhupalele shawuri zaya yoori eekhale vamote na fweeyo.”

24Alume ooshi apale aakusanyeyiyeeyo vanlako wa sitati khukhupalela mattakhuzi apale aalupiyeeyo Hamori na mwanawe Shekemu; alume ooshi a sitati ethiitile khukhiriya.

Alupuwe Tiina aneekesa ojiripha mwaasa wa nlupwaaya

25Siikhu ya ttaatthu, wakathi alume apale aari woonachaavo olwaaza, aana awiri a Yaakhumpa, Simiyooni na Leevi alupuwe Tiina, khuthuula phanka, khweetta nsitati mphule woohijuwiwi ti hatha ntthu. Khuwoola alume ooshi. 26Khumuula Hamori na mwanawe Shekemu. Khunthuulawo Tiina owawe Shekemu khusala alawa. 27Khuta aana a Yaakhumpa apale akina ositati ottuukhule ooliiweewo atthu, khuttapwattha vitthu za maali mwaasa woojansiliwa nlupwaaya. 28Khuthuula liphanko la pwittipwitthi, la puuzi, mompe, na apuuru, na vitthu zaari nsitati nttumphule na epile zaari omashapa. 29Yo khuwaathuula aakha na aanaaya na vitthu zooshi za maali zaari mmanyupa mwaya.

30Aphano Yaakhumpa khumuuza Simiyooni na Leevi yoori: “Mweeyo mwakitiisela tafwawuthi! Mwaretta yoori atthu apa aniikhalaaye nti otthuupu, a Kanaani na aperizi asala eephiiriwa ti miiyo. Fweeyo khanaatteeni, yo amana akusanyeya ateela okuumanana antta okuula na ajamaazaku.”

31Yo khujipu araka: “Ti yooshapweya yo onretta omalempe nlupweetthu?”

Currently Selected:

Mwanzo 34: eko

Highlight

Copy