Mwanzo 33
33
Okutthana wa Ezawu na Yaakhumpa
1Wakathi Yaakhumpa alansiyeevo maasho, eetta omoona Ezawu eettaka ota na atthu awe miiya nne. Khuwaawanya aanaawe khumwinkha Liiya, Rakeele na akarumeya awe apale awiri aakha. 2Khuwaalokozisa akarumeya awe apale na aanaaya, khusala alottiwa ti Liiya na aanaawe, khwiishela Rakeele na Yuusufu. 3Yaakhumpa khuwaalokozela, khukokhora khwiinama swaafu sapa mpakha nttunkhulu awe ofiya aphale aariivo.
4Ezawu khutthira khulawa khumpatikha khumpejari, oowiiri khusala alila. 5Ezawu khulansa maasho khuwoona aakha na aana, ye khuuzela yoori: “Khi apa apaani?”
Yaakhumpa khunjipu: “Aana apa rehema Nluku amwinkhiyeeyo karumeyeenu.”
6Aphano akarumeya apale na aanaaya khumwaattama khukokhora khwiinama. 7Elottelanaka Liiya khuta attaaphale na aanaawe khukokhora khwiinama. Wa wiishela aari Yuusufu na Rakeele, khuta khukokhora khwiinama.
8Ezawu khuuzela yoori: “Nyama epile zooshi kisikaniyeeyo ntarikhi ontakhela ni?”
Yaakhumpa khujipu: “Kintakha kipatthe osuhi mmakhono mwawo mbwanaaka.”
9Ezawu khulupa yoori: “Miiyo kinaaye pure ttwiiyaku, epo oriina pi zawo.”
10Yaakhumpa khusala ankhanyarela araka: “Ohikatthale! Nkhama kinsuhi mmakhono mwawo safwatali pwekhera vitthu epi, maana noowoona weeyo koona nkhama kimooniye Nluku, khwa nanna okipwekhereliyeeyo saana. 11Kinuuvekela yoori opwekherele vitthu epi kuutiiseliyeeyo mwaasa yoori Nluku akiparikhiya, akinkha zooshi epile kinhithajiyaaye.” Ye khunkhanyarela Ezawu mpakha okhupali.
12Ezawu khuri: “Olawa neettette. Miiyo kintta wuuperekha.”
13Ila Yaakhumpa khuri: “Mbwanaaka, ojuwe yoori aana apa nalelo asimaana na kinaaye pwittipwitthi na mompe zinaamwisaaye. Amana kikhanyarela weettettisa channu zooshi zintta ofwa siikhu moote. 14Apho olokoze mbwanaaka, miiyo kintta ota vattiitthi vattiitthi khwa mwentto wa aanaaka na nyama zaka, mpakha ofiya nti wa Seyiiri.”
15Ezawu khuri: “Kintakha atthu aka akina kuulikhele weeyo.”
Yaakhumpa khuuzela yoori: “Mwaasa wa niini? Khinihithajiya. Ethiiti okipwekhereliyeeyo saana paasi.”
16Siikhu ethiitile Ezawu khulankha khusala arutela owawe Seyiiri. 17Yaakhumpa khulankha khusala alawa Sukooti. Ottuukhule khujeka nyuupa yawe na mazizi a nyama zawe. Tiito atthajiyeevo nzina la Sukooti#33:17 Nzina ntthi la Sukooti lina maana la masaasa ama mapantta. .
Yaakhumpa ontta Shekemu
18Yaakhumpa arutiyeevo Pata Ara khufiya Shekemu tuniya ya Kanaani ari nkumi, khweemesa heema zawe kharipu ya sitati ethiitile. 19Khuuzanya nshapa puuro ethiitile eemesiyeevo heema yawe, na aana a Hamori, paapa wa Shekemu, khwa hisapu miiya nzurukhu wa feeta. 20Attaaphale khunjeka alitaari khuntthaja Elooyi “Nluku wa Ezirayiilu.”
Currently Selected:
Mwanzo 33: eko
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
