Khaazi 4

Pheeturu na Yaahaya anlaza oshaahiti vakatthi wa mashawuriiya

1Wakathi Pheeturu na Yaahaya aari ottakhulaavo awoozaka atthu, khutavo anamalokozela a tiini na nttunkhulu wa anajanka wa Nyuupa Yoosifwiwamo na masatukhi. 2Yo aari awiiphiiriwa mwaasa wa maaswihaapa eetta owaasomisa atthu yoori Yinsa asisimuwiye, eto enthoonyeza yoori ananfwa anteela osisimuwa. 3Aphano yo khunkhola Pheeturu na Yaahaya, khuwaattha nkalapooso mpakha mmeesho mwaya maana yaari makaaripi. 4Ila atthu apale asiiliyeeyo hapari epile aari olupaaye khukhupalela. Khwa etthiipo mamuumini khusala avira eekezeleyaka khufiya thamani ya alufu thaanu.

5Siikhu ya phiiri khuthukumana afwalume, attunkhulu a tiini na anamanozela a kano Yeruzaleemu. 6Atthu aarivo pi apa: Anaasi, haakhimu nwulu wa tiini, Kayifwa, Yaahaya, Alishantere, na atthu ooshi apale aari oojama wa haakhimu nwulu wa tiini. 7Yo khuwaattha omaasho waya maaswihaapa apale awiri. Khusala awoozela araka: “Vitthu epi mwarettana owahi ni wala nzina ni?”

8Pheeturu ari wa wiitaala Rooho Ttakatthiifu, khusala alupa araka: “Mweeyo afwalume na attunkhulu a atthu, 9mwanikhuwela leelo yoori mwinuuzele vitthu zooshapweya ninretteliyeezo ntthu otule woorakala na nanna avonisiweezo. 10Ila apho mwijuwe saana mooshi mpakha atthu a Ezirayiilu yooshi yoori khwa nzina la Yinsa Al-Masiihu wa Nazareeti, othuutule mweeyo mwankhomeliyeeyo na othuuto Nluku ansisimuliyeeyo muufwa, nzina lawe tthi linvonisiyeeyo namarakala otu mwinimoonaaye apha. 11Yinsa othuuto liwe mweeyo anamajeka mwikatthaliyeeyo, laretteya wiiya liwe linkhomaazaaye.#4:11 Woone kithaapu ya Zaapuura 118:22. 12Khaavo ntthu nkina wala nzina likina linwahaaye owoosuru atthu vathi apha wooshivo, woohiiyi nzina la Yinsa.”

13Attunkhulu apale ooshi khwiiya onshankela Pheeturu na Yaahaya mwaasa wa ominyala aarinaaye maana ari owaajuwa yoori aari vamote na Yinsa. 14Ila khaarina ya olupa hatha etthu, maana ntthu otule aavonisiweeyo aari attaaphale eettiye weemela vamote na yo. 15Khuwaaruma yoori asaruwemo nnyupa khuulu ya mashawuriiya. Aphano attunkhulu apale khwaaza owazisana shawuri araka: 16“Nkahayani niwaarettele niini mamwinyi apa? Maana atthu ooshi Yeruzaleemu eti ajuwa yoori aretta minjuza zawooneya zihinikheeteyaaye. 17Apho yoori vitthu epo zihimwazeyele vakatthi wa atthu niwoopopise yoori ahimuuze hatha ntthu monkoni wa nzina nttho.”

18Aphano khukhuweliwa Pheeturu na Yaahaya opheya khuwaakhattaza yoori ahisomise wala ahittakhule hatha etthu monkoni wa Yinsa. 19Ila Pheeturu na Yaahaya khuwaajipu araka: “Mwinoona yoori eto yaya haakhi ya wuushututelani mweeyo khunlikha Nluku? 20Fweeyo khaninwahi olikha olupa epile nooniyeezo na nisiiliyeezo.”

21Khuwaatuturusha theenya khuwaalikha, maana khaari woona etthu yoowaahukhumwela na atthu ooshi aari onsifu Nluku mwaasa wa minjuza epile zaarettikhaniyeeyo. 22Mwinyi otule aavonisiweeyo khwa alama za minjuza aarina hirimu yooziti nyaakha arupayiini.

Olompa wa anamalottela a Yinsa yoori eeyane ominyala wa olaza oshaahiti

23Wakathi Pheeturu na Yaahaya alawiyeevo, noofiya vahali aarivo ashirikhaaya, khusala awaathatelela zooshi epile aari wuuziwaaye pi mahaakhimu a tiini na attunkhulu a tiini. 24Paata ya ashirikhaaya apale osiila mattakhuzi apale, ooshi aya khusala alompa anvekelaka Nluku araka: “Mbwana, ti weeyo wumpiyeeyo pinku na vathi, pahari na vitthu zooshi ziriiye va olumwenku. 25Weeyo wattakhula khwa Rooho Ttakatthiifu khwa nlomo wa papeetthu Daawuuda karumeya awo oraka:

“ ‘Khapila epile zoohimoovi Nluku enkatipukhaka ni?

Khi atthu anaakanyerelaka ni shawuri zohiiyi etthiipo?

26Afwalume a vathi alankha

na attunkhulu akusanyeya yoori

anlupatthe Mbwana na anlupatthe Al-Masiihu awe.’

27Wekhweele, Herooti na Ponsiyu Pilaatu akusanyeya na amalapo na atthu a Ezirayiilu, ooshi ari sitati ethiiti na niiya yonlupattha Yinsa karumeya awo othuuto onthawaziyeeyo. 28Yo aretta zooshi epile waalakeliyeeyo oretta khwa owahi oriinaaye. 29Apho weeyo Mbwana, woone woopopisa waya onilipisele niwahi olaleya hapari zawo woohoovi hatha etthu. 30Wookole nkhono awo waaze ovonisa na oretta minjuza na vitthu zooshankisa khwa nzina la ttakatthiifu karumeya awo Yinsa.”

31Paata ya maaswihaapa apale wiisha olompa, puuro etile akusanyeyiyeevo khusala esakhinyeya, ooshi khuwiitaala Rooho Ttakatthiifu, khusala alaleya nttakhuzi la Nluku woohoovi hatha etthu.

Anakhiyoni vitthu zaya eetta omeelana

32Ooshi aakhupaliyeeyo rooho zaya zaari moote, akhili zaya zaari sawasawa. Khaarivo hatha mmote aari woonaaye etthu yawe wiiya yawe. Eetta waawanya na azaaya zooshi aari wiiyanaazo. 33Maaswihaapa aari ovira alawelaka oshaahiti osisimuwa wa Mbwana Yinsa na owahi nwulweene, na yaaweeshukheliye rehema khuluyeene. 34Vakatthi vaya khaarivo hatha ntthu mmote woothowiwa, apale aarina mapuwa ama manyupa eetta wuuzanyisa, nzurukhu aya nootiisa, 35noowenkha maaswihaapa yoori awaawanyeze atthu ooshi wakhula ntthu khwa khiima yoothowiwa wawe.

36Yuusufu mmote, wa lihimo la Leevi aatthajiweeyo nzina la Baranabe, liriina maana la namalipisela, owawe waari Shiipere, 37khuuzanyisa nshapa lawe, nzurukhu aya khutiisa khuwenkha maaswihaapa.

Currently Selected:

Khaazi 4: eko

Highlight

Copy