Khaazi 2

Ota wa Rooho Ttakatthiifu siikhu ya Takhiriima

1Efiyeevo siikhu ya Takhiriima#2:1 Takhiriima ena maana a njampo laari orettiwakaaye raku wakathi wa wuurula wiisha wa sumana, mayaahuuti enkeene wakhula mwaakha aari olawa Yeruzaleemu oretta njampo laya nttho. Takhiriima njampo laari orettiwakaaye paata ya ovira siikhu hamusiini ya Paashikowa. anamalottela a Yinsa ooshi akusanyeyiye vahali vamote. 2Nasaapiru khusiileya ovuma woolankha pinkuuni wuupuwaka nkhama pheevo zaari ovumaaye zookhomaala, khwiitaala nnyupa wooshimo mphule aakusanyeyiyeemo. 3Khuwaapuwela etthu yaari wuupuwaaye nkhama malimi a moottho aari waawanyeyaaye khwiikhala wakhula ntthu veeshwa vawe. 4Ooshi khwiiya awiitaala Rooho Ttakatthiifu, khwaaza ottakhula luuka kiina khwa nanna wakhula ntthu Rooho Ttakatthiifu yaari omwinkhaazo ottakhula.

5Aphano Yeruzaleemu aariwo mayaahuuti, ooshapweya rooho na omoova Nluku a khapila zooshi za olumwenku. 6Paata ya osiileya ovuma opule, khuntti ya atthu khukusanyeya vahali vamote ari oozinkuwa maana wakhula mmote wa yo aari owaasiila anakhiyoni apale attakhulaka khwa luuka yawe. 7Aari ooshanka na oosuthuwa, alupaka yoori: “Atthu apa anttakhulaaye apha ooshi khahi a Kalileya apa? 8Khi ensutuukhwana toovi fweeyo niwaasiilaka ottakhula, wakhula mmote wa fweeyo khwa luuka zeetthu? 9Fweeyo nalankha nti wa Paatiriiya, akina alankha Mediiya, akina Elaami, akina Mezapotaamiya, akina Yudeya, akina Kapatosiya, akina Pontu na Aaziya, 10akina alankha Firijiya na Panfiiliya, Misuri na phantte za Liibiya kharipu na Sireene, na anamathotola alankhiyeeyo Rooma. 11Waaza mayaahuuti mpakha apale asilimweliyeeyo oyaahuuti akereeti na aarapu. Nawaasiila toovi attakhulaka nluuka mweetthu alupaka vitthu zootikinisa na za Nluku?” 12Ooshi aari ootikinisiwa na osuthuwa khusala oozelana araka: “Vitthu epi zinlupani?”

13Atthu akina eetta owaaveyisa maaswihaapa apale araka: “Eetta ohapaliwa!”

Pheeturu onlawela oshaahiti osisimuwa wa Yinsa

14Aphano Pheeturu khweemela na apale khumi na mmote, ye khusala attakhula araka: “Attwiizaku mayaahuuti na atthu ooshi a Yeruzaleemu, mwijuwe saana na mwisiileze mattakhuzi aka. 15Atthu apa kheetteni ohapaliwa, nkhama mweeyo mwinfikhirelaazo, maana eti nalelo saattatthu ya supu. 16Ila vitthu epi zinrettikhanazo apha pi epile zaalupiweyo rakuzeene ti napiyu Yoweele araka:

17“ ‘Nluku alupa yoori, siikhu za mwiisho

kinteela oweeshushela Rooho yaka atthu ooshi.

Aaneenu aalume na apa aakha anteela ohupiri,

mashaapu anteela wiiyana jozi,

anakhuuluvale anteela olottha.

18Khwa akarumeya aka aalume mpakha aakha,

yo kiniwenkha Rooho yaka siikhu zaya etthiipo

asala ahupiri.

19Kinteela othoonyeza vitthu zootikinisa otulu pinkuuni

na alama vathi wa olumwenku,

taamu, moottho na mawiku a loosi.

20Njuwa lizukuluwe liiye yiiza,

mweezi na ye othatuwe wiiye taamu,

ehinafiye siikhu khuulu ya siifwa za Mbwana.

21Wakhula otule ankhuwelaaye nzina la Mbwana ontta wuusurukha!’

22“Mweeyo, atthu a Ezirayiilu, mwisiileze mattakhuzi apa: Yinsa wa Nazareeti, ahakikhiwa ti Nluku vakatthi venu mweeyo khwa alama zawaatta na minjuza, etthiipo Nluku mweenyeweene arettiyeezo khwa ye vakatthi venu mweeyo nkhama etthiipo mwinjuwaazo. 23Othuuto enkheleliweeyo khwa shawuri Nluku atthomiyeezo rakuzeene khwa ojuwa wawe, ila mweeyo khukusanyeya na atthu ootakhala rooho khunkhomela vansalapa khumuula. 24Ila Nluku ansisimuliyeeyo vakatthi wa ananfwa, khuntthomela owahi woofwa maana yaari etthu yoohiwaheyi oshinttiwa ti ofwa. 25Maana monkoni wa ye Daawuuda alupa araka:

“ ‘Miiyo wakhula wakathi kaari omoona Mbwana ari vamote na miiyo,

maana ye ori nkhono nlume aka akinteela osakhinyeya.

26Tiito rooho yaka ti yoofurahi na nlimi laka lininttitthimisa;

mwiili aka onvumula orina ororomela,

27maana khunteela okanswi nkhapuri

wala khunteela onkhupalela Nttakatthifu awo ovutta mwiili awe.

28Wakijuwisa tarikhi za ohaayi,

onteela okiitaaza furaha vakatthi vawo.’#2:28 Woone kithaapu ya Zaapuura 16:8-11.”

29Pheeturu khurutela araka: “Attwiizaku, mwikilikhe kiwuuzeni saana monkoni wa papeetthu Daawuuda yoori ye afwa khuzikhiwa khapuri yawe eri mmuti mweetthu nttumphu mpakha leelo. 30Ye aari napiyu na aari ojuwa yoori Nluku aamwahitiye khwa olapha yoori vakatthi wa ojama awe aari oteela opuwavo mfwalume aari oteelaaye osalana yenzi yawe ya ofwalume. 31Daawuuda aari ojuwa etthu Nluku aari weettelaaye oretta tiito aalupiyeeyo monkoni wa osisimuwa wa Al-Masiihu othuuto Nluku ahanlikhiyeeyo Ahera, wala mwiili awe ovutta. 32Nluku ansisimula Yinsa, fweeyo fooshi na mashaahiti a vitthu zaya epo. 33Khuweziwa khulawa wiikhala nkhono nlume wa Nluku, ye enkhiwa Rooho Ttakatthiifu ti Papaawe nkhama etthiipo amwahitiyeeyo, apha eetta oniitthelela ti ethiito mwinoonaaye na mwinsiilaaye enasaapi eti. 34Daawuuda khaweziweeni pinkuuni, ila atukhuru alupaka yoori:

“ ‘Nnyizinku amuuza Mbwanaaka yoori:

“Wiikhale nkhono nlume aka,

35mpakha miiyo maatuwi awo kiwaarette wiiya sakanso wa moolu awo.”#2:35 Woone kithaapu ya Zaapuura 110:1. ’

36“Nakataalikha, atthu ooshi a Ezirayiilu ana yoojuwa yoori: Yinsa, othuuto mweeyo mwankhomeliyeeyo, Nluku amwinkha wiiya Mbwana na wiiya Al-Masiihu.”

37Paata yoosiila mattakhuzi apale, khukafilikha nroho mwaya, khumuuzela Pheeturu na maaswihaapa apale akinaaya yoori: “Attwiizetthu, apho niri je?”

38Pheeturu khuwaajipu araka: “Mwithupwiye na moosiwe wakhula mmote wa mweeyo khwa nzina la Yinsa Al-Masiihu yoori mwipatthe nswammaha wa twampi zenu, mwintta opokhera tthuvo ya Rooho Ttakatthiifu. 39Ahiti yaya eto ti yenu, mweeyo mpakha aaneenu na atthu akina awoolepawo, khwa apale ooshi Mbwana eetthu Nluku awaakhuweliyeeyo.”

40Khwa mattakhuzi menkeene Pheeturu khusala alaza oshaahiti eekesaka yoori awaashintte araka: “Mwijuusuru vakatthi wa atthu apa ootakhala rooho.” 41Atthu awaatta khukhupalela nttakhuzi, khulawa khoosiwa. Siikhu etile atthu eekezeleyiye khwiiya alufu ttatthu.

Nanna aari wiikhalaazo atthu apale akhupaliyeeyo

42Yo aari ooshututela masomi a maaswihaapa na osiilana, na oretta njampo la mwiili na taamu, na lompa. 43Ooshi aarina woova nwulweene, maana Nluku eetta ovira arettaka vitthu zootikinisa na minjuza zawaatta khwa maaswihaapa apale. 44Atthu ooshi apale ankhupaliyeeyo Yinsa aari vamote, zooshi ettiye ophakanya, wakhula etile yaari opattikhanaaye eetta omeelana. 45Akina aari wuuzanyisa mashapa aya na vitthu zaya, nzurukhu aya nootiisa oteela owaamela azaaya, wakhula ntthu aari winkhiwa khwa khiima ya othowiwa wawe. 46Yo aazowereliye okusanyeya wakhula siikhu Nnyupa Woosifwiwamo, na oretta njampo la mwiili na taamu vamote nyuupa khwa nyuupa, oja zoojiwa zaya na furaha khuluyeene na rooho ya ekhweele, 47ansifwaka Nluku na khusala apattha rehema mmakhono wa atthu ooshi. Apho Mbwana wakhula siikhu aari ovira aweekezelaka atthu a wuusurukha.

Currently Selected:

Khaazi 2: eko

Highlight

Copy