ZEPHANIAH 3
3
Jerusalem ah Shetkat nak la a phiawn nak
1Jerusalem cu ng’ziin ne, sheka ne, ng’küknet ciah mang gaw ah kya ne, amät ah chang gui cu shedam na gui ci. 2Bawipa ah ng’thu kä ngai ne am cäi kä dou ci. Bawipa cu kä ngaih u ci, am htei vai ah kä ng’zoi thäh ci. 3Ami bawi gui cu m’ngawk ciah kawng ah mäih ah kyak ci gui, ami suki gui cu ei ah cawi ciah hngei ah mäih ah kyak ci gui. Ani cu sokang aih ne aguh pang phi kä nawng ne khaw thaih güt om ci. 4Prophet gui cu a i kä bik ci gui, hleeihlak ci gui, taigü gui naw thu theing cu m’shet u ne, Khanpughi ah thukhän cu amimät ah ng’thu awn k’caw ci gui. 5Cun ung phi Bawipa cu mang gaw om sang ci, ang düng bang bik ci, akshe phung kä bik ci. A ngawi tä sei kä m’chüh en ah chang gui ah om nak ah taga nak cu law püi ci. Cung phi kä ng’düng ciah chang gui naw akshe bi vai k’pang u ne, kä ng’aa ci gui.
6 Bawipa naw, “Chang pakhui gui avan ka k’täm cui ci, ami mang gaw gui phi ka m’di ci. Ami pang gui la tänghän gui phi sheka yawp ci. Mi mang gaw gui cu ng’gau ci, ami lam gui cu ghawng ci, a u kä om ci. 7Kei ah ka ngaih u ka chang gui naw na kyih aa u ne, ka m’cäi dou u ne, ka m’theithang gui kä m’hnih phung khai gui. Cun ung phi tuhbäi ngami cu ami shet man ah she lä ci gui nei.
8 Bawipa naw, “Ging vä, pakhui gui m’di nak vai ah ka m’thawh nak ah hnüüp cu, ging vä. Pakhui gui la uknak khaw gui k’bum gui vai ah kei naw ka m’lung ka k’bäi pyi ci nei. Ka m’lungshe ah ang hüüt cu ka gah sak gui khai. Ka m’lungshe nak ah meidäi naw khomdek avan cu m’di yawp khai.
9“Cun kawn ah changpakhui gui cu ka ng’thawng sak gui khai, ngami cu kei bang ah taigü khai gui, ahei khanpughi ah kä taigü khai gui. Ngami ami van naw na ngai khai gui. 10Ashou nak Sudan khaw ah püi ne om ci ka chang gui naw phi pek vai law püi ne na pe lawk khai gui. 11Cun sangung nang ka chang gui cu kei nami na hnungtuk püi ah phäh ah kä nami ng’aa ba khai. Chang ah ng’shei ne m’ghämce ci phung cu ka k’täm khai. Nangmi naw Ka m’htung theing ung kä nami na hnungtuk ba püi khai. 12A m’lung gei sei, am lung neim ciah chang gui cu a cu ah ka pawih na gui khai, ngami cu ka m’htei gui vai ah kei ah lawk khai gui. 13Pawih ba ciah Israel chang gui cu, chang ah khan ah kä cheishoh khai gui, ami hleei kä pyen khai gui, kä thuvi khai gui, ngami cu bämang m’lung üp khai gui, a u phi kä kyih khai gui.”
Yeikyai nak Ng’äi
14Zei ne ng’äi vä,
Israel chang gui!
Na m’lung kyong avan
yeikyai ä, Jerusalem!
15 Bawipa naw
aning m’kyuk nak gui
ng’pyi sak ci nei;
Ani naw nami ga avan
k’täm pyi ci nei.
BAWIPA,
Israel ghangpughang cu
nang awn atäng ah om ci nei;
Tuhbäi kyih vai ah
mawng a i kä om ba ci nei.
16Jerusalem am
thu ami pyen nak vai
a khin gawk lawk ci nei
“Zion mang gaw
kä na kyih vai,
na kut kä na chaak phung vai!
17 Bawipa
na Khanpughi naw
ning om püi ci nei;
A huham naw
näng nak ning pek khai.
Bawipa cu
nang ung yeikyai ne,
amhni nak awn
ghin nak akthai ning pek khai,
Ani cu nang ah
khan ah yei ne
ng’äi m’cu khai.
18Näng nak pawi ung
chang gui ami yei ah
mäih ah kyak khai.”
Bawipa naw,
“Khaw ang ziin nak
ka ng’pyi sak ci,
Nami thüisei nak
ng’pyi pyi ci nei.
19Akhin gawk law pyi ci nei!
Ning yawshe na gui ci cu
ka m’kyuk gui khai nei.
A khaw hnget ci gui
gai sak gui ne,
Omktu ah om ci gui cu
im ah ka law püi ba
gui khai nei.
Ami thui ng’aa nak cu
chang m’sui nak ah
ka lat pe gui khai,
M’dek chang avan naw
m’tamkhah gui khai nei.
20Akhin gawk law pyi ci nei!
Püi ciah ka chang gui
im ah ka law püi
ba gui khai,
Khomdek khan avan ung
na ming ka ning
thang sak khai.
Ka ning bühmang
ba sak khai,” cine,
Bawipa
naw ng’thu pyen ci.
Currently Selected:
ZEPHANIAH 3: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
