MATTHE 4

Bawipa Jesuh Atüihtok Nak

(Mk 1:12-13; Lk 4:1-13)

1Cun kawn ah khoshe ah tüihtok nak a aut vai ah Bawipa Jesuh cu Mumcha naw bung ah hteh püi ci. #Heb 2:18; 4:15 2Bawipa Jesuh cu hnüüp phli-kip la mü phli-kip ung a ei kaa ah om netah, ei ah cawi lawk ci. 3Cun kawn ah khoshe naw law shi netah, “Nang cu Khanpughi ah Htapa ah na kyak ung shin ah lung gui shi, m’htut ah kyak khai ah pyang ä,” cine pyen nak ci.

4Cun ung phi Bawipa Jesuh naw, “Chang cu ei bäng awn ghing ciah kä kyak ci, Khanpughi ah ng’thu awn hnun m’ghin vai, ciah cacim ung om ci,” cine pyen nak ci. #Tln 8:3

5Cun kawn ah khoshe naw Bawipa Jesuh cu Jerusalem, theingcim pi ciah gawnu ung, ak hlüng pibäih pum im khan ah hteh püi netah;

6“Cacim ung,” Khanpughi naw nang ning m’hteihtang khai gui ah khankho chang gui yuk tüi law sei, ngami naw nang ah kho cu lung naw kä ning tawn-en khai ah ning chang khai gui’ ciah om ci. Cun ah kyasei nang cu Khanpughi ah Htapa akcang ah na kiak ung yu ng’htoü shüm ä, cine pyen nak ci.

7 Bawipa Jesuh naw, “Na Bawipa Khanpughi cu kä na tüihtok vai, ci ne cacim ung om ci,” cine pyen nak ci.

8Cu kawn ah khoshe naw Bawipa Jesuh cu, hlüngtai pibäih ciah khohtung khan ah hteh püi ne, khomdek khan ah chang ah uknak kho avan la ami bämang nak avan cu m’hnuh netah, 9“Kei cu m’khuukdong ne na na khawihnah ung shin gui avan ka ning pek khai,” cine pyen nak ci.

10 Bawipa Jesuh naw, “Khoshe a hei ah hteit ä! Cacim ung, ‘Na Bawipa Khanpughi bäng na khawihnah vai, ani ah bi bäng na bi vai!’ ciah om ci nei, cine k’täm ci.

11Cun kawn ah khoshe cu a hei ah hteit khätah, khankho chang gui kyum law u ne, Bawipa Jesuh cu m’hteihtang ci gui.

Bawipa Jesuh naw Kalile Kho ung Tün ne Bi Bi Lawk Ci

(Mk 1:14-15; Lk 4:14-15)

12 Bawipa Jesuh cu Johan pha ne ami chum ng’ya netah, kalile kho ah hteit ci. 13Ani cu Nazaret kho ung kä om ne, Zebulun la Nahtali kho ah ng’lak Kalile tuili pei, Kapernaum gawnu ah hteit ne om ci. 14Cun ah abi cu profet Isaiah ah ng’thu a khüm nak vai ah kiak ci. Profet Isaiah naw;

15“Zebulun khaw la Naphtali kho,

Tuinu ah hteh nak lam ung om ci gui ah

Jordan tuinu vang ga kho,

Chang pakhui hei gui ah om nak ah Kalile kho!

16Ak hmüp nak ung om ciah chang gui naw,

akdei khang hmu lawk khai gui;

Sih nak ah khomü ung om ciah chang gui ah khan ah,

Akdei khang cu gawk lawk khai nei,” cine pyein ci.

17Cun ung tüi ne Bawipa Jesuh naw, “Nami shetkat nak ng’nü ung ng’yu ba vä, khankho uknak ng’et law pyii ci nei” ci ne ng’thu pyein lawk ci.

Bawipa Jesuh naw Ngakpha Sing Phli Khü Gui Ci

18 Bawipa Jesuh cu Kalile tuili nu pei ah a hteh sang ung ngakpha ng’phäi nau goi cu hmu goi ci. Cun goi cu Simon (Peter ah phi ami khü) la anau Andru ah kyak ci. Ngani cu tuili ung ng’vai vawi ne om ci goi. 19Bawipa Jesuh naw, “Ka hnu ah na läk nä, chang phak ciah ngakpha ah ka ning pyang goi khai,” cine khü goi ci. 20Ngahni cu acun vai-am ani ng’vai nawng shüt ni ne, Bawipa Jesuh ah hnu ah läk ci goi.

21Cun ungka hteit ba netah, Zebedee ah hta goi James la Johan ng’phäi nau goi cu hmu ba goi ci. Ngahni cu ani pa Zebedee awn a täng ah hleiko ung ng’vai kiang ne om ci goi. Bawipa Jesuh naw ngahni cu a hnu ah ani läk vai ah khü goi khätah, 22ani hleiko la ani pa nawng shüt ne läk tuk ci goi.

Bawipa Jesuh ah Am Theithang, ang Thu Pyein la Agai Sak Nak Gui

(Lk 6:17-19)

23 Bawipa Jesuh cu Kalile kho avan ung hteit ne pum im gui ung m’theithang gui ci. Khankho ah mawng ng’thu phi pyein ci, a hlü hlü ah gawpai ci gui phi gai sak gui ci. 24Bawipa Jesuh ah mawng cu Siria kho avan ung thang law khätah, chang gui naw khoshe ah kai gui, mangtak ci gui, a kut kho shum ci gui la agü a hlü ah gawpai ciah chang gui cu a om nak ah law püi ci gui. Bawipa Jesuh naw cun gui ami van gai sak gui ci. 25Kalile kho, kho pagha ah ming ciah Dekapoli kho, Jerusalem gawnu, Judea kho la Jordan tuinu vang ga ah om ciah chang khli naw Bawipa Jesuh cu a hnu ah läk lawk ci gui.

Currently Selected:

MATTHE 4: CBC

Highlight

Copy