MALAKHI 3
3
1Hlüngtai ciah Bawipa naw, “Kei ah hmawk ah lam pyang khai ah ka ng’shä cu ka tüi lawk khai. Cun kawn ah nang naw na shui ah Bawipa cu ang ghit ah pum im ung gawk lawk khai. Nang naw na hmuh ah ka ng’shä cu law ne ka thukhän cu ng’shäu khai” cik ci.
2Cun ung phi ani a law hnüüp ung a u naw khan hning khai aw? Ani ang dang law ung a u naw phyawn na hlawt khai aw? Ani cu theing khai ah m’si nak ah satpya, m’si shep nak ah mei ah mäih ah kyak khai nei. 3Ani naw ngui ng’ciim khai ah m’cim ah mäih ah m’khoichak khai nei. M’si shep naw ghui la ngui am cim ah mäih ah Bawipa ah ng’shä tüih naw taigü gui cu theing sak gui khai nei, cun ah kyasei ngami naw Bawipa am, ng’düng cicu pe lawk khai gui nei. 4Judah la Jerusalem chang gui naw ami law püi ah pektak nak cu cau kaa ah mäih ah Bawipa naw yei nak khai nei.
5Hlüngtai ciah Khanpughi naw, “Ka ning ng’thumcha gui khai ah nami lung ah ka ng’dang lawk khai. Cun ah chang gui cu kei naw cet ne ang ghit ah ka hnungtuk püi gui khai, ng’pluh ci gui, chang ah chu ih püi ci gui, hleei pyen ne ng’gun ci gui, bii bik ciah ng’cheng mang pek ci gui. Hmeinu hmeihta shedam nak ci gui — kei kä na kyih aa ci phung avan ah kyak ci.
Bum Gha Bum ät Pek ah Mawng
6Kei cu Bawipa ah ka kyak ci, kä ka ng’thawng ci. Jakob ah hta ng’shon gui cu kä maih yawp khai gui nei. 7Nangmi gui phi nami pupa gui ah mäih ah ka ng’thukhän cu ng’hlah ta u ne, kä nami k’pang ci. Kei ah ng’hlat law ba vä, nangmi ah ka ng’hlat lawk khai. Cun ung phi nangmi naw, “Nang ah ng’hlah law ba vai ah a i kami bik khai ang?” nami cik ci. 8Kei naw ka ning shi gui cu, Khanpughi ah khawh, chang naw a guh tep cu hman khai aw? Cun ung phi nangmi naw nami na gut tep ci nei. “A i hawkcha ah kami ning guh ang? nami ci ung, bum gha bum ät la pek tak gui cu nami na gut ci nei. 9Nami van ah khan ah plah tam nak om ci, a i ah kyasei ci ung changpakhui avan naw nami na gut tep ci nei. 10Bum gha bum ät cu akbe ah Taigüim ah nami law püi vai. Cun ung ei awk vai cu nami khaw ung da khai nei. Cun ah bi u ne kei cu nami na m’nüm vai, Kei naw khankho m’kawt hmawng ne akni akbä avan ka ning yuk lawn gui cu nami hmuk khai nei. 11Nami geitkaw gui cu m’kyiit awn kä ka m’di sak khai, nami sapyit ng’shun gui cu akda ah m’theih khai. 12Chang pakhui avan naw yeikyai ciah chang ah ning khü gui khai, nami khaw phi nik ciah om nak ah hmun ah kyak khai.
Khanpughi ah Shaitak ah Chimgein nak
13 Bawipa naw, “Nangmi naw kei ah mawng cu akshe ah nami pyen ci, Cun ung phi nangmi naw, Nang ah mawng a i ang kami pyen?” nami cik ci. 14Nangmi naw, “Khanpughi ah bi bi cu akholä nei, a pyen ah bi ne, hlüngtai ciah Bawipa ah ma ah mi bi lawh ah hmawk ah thüi sei nak m’dang cu a i ah bäni nak om ci ang? 15Mi hmuh ah mäih ah chang k’om ci gui cu yei ci gui nei. Changshe gui cu ng’bühmang ci gui nei,” nami cik ci.
16Cun kawn ah Bawipa kyih aa ci gui cu, ami mät ng’ce ng’cäk u sei, Bawipa naw ngai ne ami ng’thu ng’yak ci. Khanpughi kyih aa ne chang m’sui ciah chang cu, amät ah ma ah ca uk ung gu ne m’hnüt ci. 17Hlüngtai ciah Bawipa naw, “Ngami cu ka chang ah kyak khai gui, kei ka hnün thawh law hnüüp ung ngami cu, ka chang akcang ah kyak khai gui. Amät m’thei ciah a hta ah khan ah apa naw a chimgein ah mäih ah ngami cu ka chimgein gui khai. 18Cun kawn ah mä ng’düng ci gui la chang shekha gui ah khan ah, ka khuut bik ci la kä bik ciah khan ah, a i ah a kyak law cu ka chang gui naw hmuk khai gui nei” cik ci.
Currently Selected:
MALAKHI 3: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
