LUKA 18

Hmeinu La Suki awn M’Tumtäng nak

1Cun kawn ah Bawipa Jesuh naw, ang düihpüi gui-am, kä kya düt en ne angtäi ah ami taigü vai ah, m’tumtäng ne m’thei gui ci. 2Pigawnu tumat ung suki tumat om ci. Ani cu Khanpughi phi kä kyih ci, chang phi kä aa cih chang ah kyak ci. 3A cun ah pigaw ung hmeinu tumat om ci. Ani cu suki ah a shäng shäng law ne, “Ka ng’küükneet püi ah chang cä, ka näng vai ah na ci pe ä” cik ci. 4Hmeinu ah pyein cu suki naw akda vei maa nak ci. Cun ung phi ak hnu ah “Kei cu Khanpughi phi kä ka kyih ci, chang phi kä ka aa ci. 5Shin ah hmeinu, k’paamcai aih ci, ani ah mawngma düng khai ah ka pyein tu pek khai. Kä cun ung kei nak paamcai lä ne, na yaica sak khai” cine amät naw ngai ci.

6“Shin ah kä nik ciah suki ah ng’thu cu ngai shüm vä, 7Khanpughi naw akchang gui cu, am gein gui vai ah amü akhnüüp m’lau ne ami ng’yoih ung kä m’khoichaa gui ah om khai ang? Ani naw ngami am gein gui vai ah düngyeng düt khai ang? Kei naw akcang ka pyein cu; 8Bawipa naw ang ghit ah ng’düng khai ah m’khoichaa pe gui khai nei. Cun ung phi chang ah Htapa a law ba ung khomdek khan ah yumnak cu hmuk khai ang” cik ci.

Pharisee La Akhawnlook awn Amtumtäng Nak

9Amät naw amät chang khän ah ngai ne, chang k’shedam nak ciah chang gui-am Bawipa Jesuh naw, shin ah m’tumtäng nak cu m’thein gui ci. 10“Kho hnüüp ät ung chang hnih cu taigü khai goi ah pum im ah hteit ci goi: tumat cu pharisee, tumat cu akhawnlook ciah kyak ci.

11Pharisee cu amät bäng ng’düi hnga netah, “Aw, Khanpughi aw, chang gui cu, a i baw ng’ya hlük tat ci ni, kä düng ci ni, chang ah hta kat püi ci ni ah kyak ci gui. Kei cu cun ah chang gui ah mäih ah kä ka kyak ci. Shin ah akhawnlook ciah chang ah mäih ah phi kä ka kya tuk ci, cun ah kyasei Khanpughi ka ning m’hlüngtai ci. 12Kho hnüüp chih ung hnüüp goi ci, ei hlawi ne ka taigü ci, ka gah phung ah bum ghaa bum ät phi Khanpughi-am ka pek ci,” cine taigü ci.

13Cun ung phi akhawnlook ciah chang läi cu, ani awn ang shawng ah ng’düi net, khan kä dang dat ah kawp netah, “Aw, Khanpughi aw, kat nak ka bik ciah kei chang kaa cu nam gein ä” cine ang kyang k’beeih ne taigü ci. 14Kei naw ka ning m’thein gui cu, cun ah akhawnlook cu akat nak k’phiawn sei a im ah hteit ba ci, pharisee läi cu akat nak kä k’phiawn ci. A i ah kyasei ci ung, amät naw amät m’hlüngtai ci cu neim saknak gah khai, amät naw amät neim sak ci cu m’hlüngtai nak gah khai” cine m’cäi gui ci.

Bawipa Jesuh naw Akhmaw Hta gui Hrilham Pe Gui Ci

(Mt 19:13-15; Mk 10:13-16)

15Cun sang ung chang amshah gui naw ami hta k’hmaw gui cu Bawipa Jesuh naw ami khan ah a kut taih ne hrilham a peit gui vai ah law püi ci gui. Cun cu ang düihpüi gui naw hmu u netah, gen gui ci gui. 16Cun ung phi Bawipa Jesuh naw ak hmaw gui cu khü gui netah, “Akhmaw hta gui kei ah law u sä, kä maa na gui vä, Khanpughi ah uknak kho cu ngami ah kho ah kyak ci nei; 17Kei naw akcang ka pyein cu, akhmawhta ah mäih ah kä yum ciah chang phung cu Khanpughi ah uknak kho ah kä lut hlawt khai nei,” cine m’thein gui ci.

Bühmang Ciah Chang

(Mt 19:16-30; Mk 10:17-31)

18Jew changvai tumat naw, “Nik ciah saya aw, angtäi ghin nak gah vai ah a i ang ka bi kaw” cine Bawipa Jesuh cu ng’shi lawk ci.

19“Bawipa Jesuh naw,” a i ah kyasei kei cu chang k’ni ah na na khü ang? Khanpughi ah kawn ah chang k’ni a u kä om ci nei. 20Thukhän gui na hmat pyi ci kya ne; changah chuhta kä kat püi vai, chang kä ngawn vai, kä m’guuk vai, hleei pyein ne kä saksi vai, nupa chang m’sui vai, ci gui cu na läk vai” cine kyak nak ci.

21Cun ah chang naw, “Cun ah thukhän gui cu ka hmaw sang ung tün ne ka läk pyi ci” cik ci.

22Cun aci cu Bawipa Jesuh naw ng’ya netah, “Nang ung tumat hlü ba ci, na khawhchaam avan yoi ne, ghawipyam ci gui-am na peit gui vai, cun ung nang cu khankho ah na bühmang khai; cun kawn ah kahnu ah na na läk vai” cine pyen nak ci. 23Cun ah chang cu bühmang ciah kya ne, Bawipa Jesuh ah ng’thu cu ng’ya netah a hmai m’kyuum ne hteit ba ci.

24Cun cu Bawipa Jesuh naw hmu netah, “Bühmang ciah chang Khanpughi ah uknak kho ah aluh vai cu khak aih ci nei, 25Ng’pyüm mik ung seikong a luh vai cu ayäi ung yäi hngaw khai, cun ung phi bühmang ciah chang Khanpughi ah uknak kho ah a gawk vai cu kä yäi ci nei” cine pyen na gui ci.

26Cun ah ng’thu ng’yak ciah chang gui naw, “Cun ah a kyak ung a u hun nak ah gawk hlawt khai ang?” cik ci gui.

27 Bawipa Jesuh naw, “Chang naw kä am khüt cu Khanpughi naw m’khüt ci nei” cine pyen na gui ci.

28Cun kawn ah Peter naw, “Bawipa, keimi cu kami pyu im nawng shüt ne kami ning läk pyi ci nei” ci khätah,

29 Bawipa Jesuh naw, “Kei naw akcang ka pyein cu, Khanpughi ah uknak kho ah hmawk ah, a im lo, akchu hta, anu pa, a phäi nau nawng shüt ciah chang cu. 30Tuhchü a ghin yah ung khawhchaam ang peeih a gah kawn ah, maa ah lawk khai ah kho ung angtäi ghin nak gah khai nei” cine m’cäi gui ci.

Asih Vai ah Mawng Akthum Nakah A Pyein Nak

(Mt 20:7-19; Mk 10:32-34)

31 Bawipa Jesuh naw, ang düihpüi gui gha-lei-goi cu khü gui netah, “Ngai vä, mikmi cu Jerusalem ah mi hteit lawk ci. Chang ah Htapa ah mawng profet gui naw ami guk ah mäih ah kümbe lawk khai nei. 32Chang ah Htapa cu changpakhui hei ah kut ung ap khai gui, päipih khai gui, ami m’shi awn m’thui khai gui; 33htung awn that khai gui, ngawn khai gui. Cun ung phi ak hnüüp thum hnüüp ung tho ba ne ghing ba khai nei” cik ci.

34Cun ung phi ang düihpüi gui naw, ani ah ng’thu cu api phi kä hmat ci gui. Bawipa ah ng’thu cu thuuk aih ne, ng’yih khätah, ngami naw kä hmat hlawt ci gui.

Ng’yoi Ne Ei Ciah Amik M’dauh M’Dei Ba Sak Ci

(Mt 20:29-34; Mk 10:46-52)

35 Bawipa Jesuh cu, Jerikho gawnu pei ah a gawk law sang ung amik m’dauh tumat cu lam pei ah ngo ne, ng’yoi ne om ci. 36Ani cu chang gui ah hteh hton shim netah, ng’shi tu gui ci.

37Chang gui naw, Nazaret ah kaa Bawipa Jesuh a law ah mawng m’thein tuk ci gui.

38A cun ah chang naw, “David ah Htapa, Jesuh Bawipa, kei cu na m’gein ä” cine m’lau ci.

39Ama ah om ciah chang gui naw, adüm ah a om vai ah ng’lii ne pyein ci gui. Cun ung phi ani cu, “David ah Htapa, Jesuh Bawipa, kei cu nam gein ä” cine m’lau gäk gäk ci.

40Cun ah kyasei Bawipa Jesuh cu ng’düi netah, cun ah chang cu ami law püi vai ah pyein ci. Cun ah chang cu a pei ah gawk law khätah; 41Bawipa Jesuh naw, “Nang ah hmawk ah a i ka ning bi peit vai ang?” cine ng’shik ci.

Amik m’dauh naw, “Bawipa, ka mik ma ne m’dei sak ä” cik ci.

42 Bawipa Jesuh naw, “Na mik m’dei sä, na yum nak naw, na mik ning m’dei sak pyi ci nei” ci nak ci.

43A cun vai-am ani cu amik m’dei lawk ci Cun kawn ah Khanpughi ah bämang nak m’hlüngtai ne, Bawipa Jesuh ah hnu ah läk tuk ci. A cun gui cu hmu tuk ciah chang gui ami van cu Khanpughi ah ming m’hlüngtai ci gui.

Currently Selected:

LUKA 18: CBC

Highlight

Copy