JOHAN 8
8
Pawmyau Ciah Hnumi Ami Pha
1(Cun kawn ah chang gui cu ami im phäh phäh ah hteit ba ci gui. 2Cun ung phi Bawipa Jesuh läi cu Olive m’htung ah kai ci. A ngawi ung kho ngawi hta ah Taigüim ah hteit ba ne chang gui akda law u sei, ngo netah m’theithang gui ci. 3Thukhän saya gui la pharise gui naw, hnumi tumat cu pami awn ani ng’yaw yah ung hmu u netah pha ne law püi ci gui. Ngami naw cun ah hnumi cu ami ma ah m’düih u netah; 4Bawipa Jesuh ah ma ah, “Sayapa, shin ah hnumi cu, pami awn ng’yaw ni sei hmu ne kami phaa nei. 5Thukhän ung Moses naw, “shin ah mäih hnumi cu lung awn vawi ne ngawn vai” cine thu na khän gui ci, nang naw a i ah na pyein khai ang?” cine ng’shik ci gui. 6Ngami naw Bawipa Jesuh cu m’kat hlü guih u netah, a i ah a pyein law hman ah cine, ami m’nüm nak ah kyak ci. Cun ung phi Bawipa Jesuh cu kawp netah, a kut khiu awn m’dek chüüt ne gu ne ngok ci.
7Ngami naw cun ah leng ba ba ne ng’shi laih u khäh tah, Bawipa Jesuh naw, “Nangmi ungka ah ma katnak kä om ciah chang naw, ani cu lung awn vawi law ma sä” cine pyen na gui ci. 8Cun kawn ah kawp ne m’dek chüüt ne ngoh ba ci. 9Cun aci ng’ya u netah ang vai ba gui ma ba u sei, tumat täi ah hteit ba yawp ci gui. Hnumi amät bäng Bawipa Jesuh ah pei ah ng’düi ba shüt ci. 10Bawipa Jesuh cu täu law ba netah, cun ah hnumi am, “Ahawi ang ami hteh yawp, nang na katnak ning m’khoichaa pek khai, tumat phi kä om ba ne ma?” cine pyen nak ci. 11Cun ah hnumi naw, “Bawipa, tumat phi kä om ba ci nei” ci ne pyein ci.
Bawipa Jesuh naw, “Kei naw phi na katnak kä ka ning m’khoichaa khai, hteit baä, cun kawn ah katnak kä na bi ba vai” ci ne kiak nak ci.)
Khomdek Khan ah Akdei ah kyak Ciah Bawipa Jesuh
12 Bawipa Jesuh naw, Pharise gui-am,” Kei cu khomdek khan ah akdei ah ka kyak ci, kei ah hnu ah na läk ciah chang cu ghin nak akdei gah khai, a i yah ung phi kho hmüp khui ung kä hteit ba khai”, cik ci.
13Pharise gui naw, “Nang cu na mät ah hmawk ah na saksi ci, cun ah kyasei ngaih gep vai kä kyak ci” cik ci gui. 14Bawipa Jesuh naw, “Kei naw ka mät ah mawng ka saksi cu, ngaih gep ci. A i ah kyasei ci ung, a hawi lam ah kaa law ne, a hawi lam ah hteh ba vai cu kei naw ka hmat ci, Nangmi naw a hawi lam ah kaa law ne, a hawi lam ah hteh ba vai cu kä nami hmat ci. 15Nangmi naw chang ah ng’yak hlü bäng ah m’khoichaa nak nami bik ci; kei naw a u ah khan ah phi m’khoichaa nak kä ka bik ci. 16Kei naw m’khoichaa nak ka bi ung phi cun cu ng’düng ci. A i ah kiasei ci ung kei cu ka mät ka om ciah kä kyak ci, na tüi lawk ciah Kapa Khanpughi awn a täng ah kani om ci. 17Nangmi ah thukhän ung saksi hnih naw a kawng ät ah ani pyein cu akcang ah kyak ci,” ciah om ci. 18Kei naw ka mät ah mawng ka saksi ci, na tüi lawk ciah Kapa naw phi, kei ah mawng cu saksi ci” cine pyen na gui ci.
19Ngami naw, “Napa cu a hawi ang?” cine ng’shik ci gui. Bawipa Jesuh naw, “Nangmi naw kei phi kä nami na hmat ci, Kapa phi kä nami hmat ci. Kei nami na hmat vai sü ung Kapa phi nami hmat khai sü te” cine pyen na gui ci.
20Shin cu Bawipa Jesuh naw, Taigüim khawh peit nak ah kyong khui ah am theithang gui ah kyak ci. Cun ung phi amät ah akhin kä gawk law phak ciah kyak sei, ani cu a u naw phi kä phak ci.
Ka Hteh nak ah Kä Nami Hteit Tu Hlawt Khai
21 Bawipa Jesuh naw, “Kei ka hteit ba khai, nangmi naw nami na shui khai, cun ung phi nangmi nami katnak awn nami sik khai, kei ah hteh nak ah nangmi kä nami hteit tu hlawt khai,” cine kyak na gui ci.
22Jew chang vai gui naw, “Ani a hteh nak ah mikmi kä mi hteit tu hlawt khai ah pyein ci, amät naw amät ngawn ne sik khai ang?” cik ci gui.
23 Bawipa Jesuh naw, “Nangmi cu shin ah m’dek nami kho nak ci, kei cu khan ah kaa ka lawk ci. Nangmi cu shin ah khomdek chang ah nami kyak ci, kei cu shin ah khomdek chang ah kä ka kyak ci. 24Cun ah kyasei nangmi cu, nami katnak awn nami sik khai, “Kei cu kei ah ka kyak ci” ka cicu kä nami yum ah a kyak ung nami kat nak awn nami sik khai” cine pyen na gui ci.
25Ngami naw, “Nang a u ang?” cine ng’shik ci gui. Bawipa Jesuh naw, “Kei a u ah ka kyak cu, a htük ung ka ning m’thein gui pyi ci. 26Nangmi ah mawng ka pyein vai akda om ci, nami katnak ka ning m’kat gui vai phi akda om ci. Kei na tüi lawk cicu düng ci, ani ung kang yak gui bäng vah, khomdek chang gui-am ka ning m’thein gui ci,” cine pyen na gui ci.
27 Bawipa Jesuh naw Apa Khanpughi ah mawng a pyein phung cu ngami naw kä hmat ci gui. 28Cun ah kyasei ani naw, “Chang ah hta cu häi ne nami tai kawn ah vah,’ Kei cu kei ah’ka kyak ah mawng la kei naw ka mät ah ng’yak hlü ah kä kyak ciah, Pa Khanpughi ah nam cäi ah mäih ah ka bilawh cu nami hmat khai. 29Kei na tüi lawk cicu kei awn a täng ah om ci; ani ah ng’yak hlü bäng ah angtäi sei ka bik ci kyasei, ani naw kei ka mät bäng kä na nawng ci” cine m’thein gui ci.
30Cun ah Bawipa Jesuh ah ng’thu ng’yak ciah chang akda naw, Bawipa Jesuh cu yum lawk ci gui.
Chang Pängye La Chang Shäm
31 Bawipa Jesuh naw yum ciah chang gui-am, “Nangmi cu kei ah kang thu yum ne, nami bi ung kei ah kang düihpüi ah nami kyak ci; 32Nangmi naw düng nak cu nami hmat khai, düng nak naw nangmi cu ning m’hlawt gui khai,” cine pyen na gui ci.
33Cun ah chang gui naw, “Keimi cu Abraham ah hta ng’shon ah kami kiak ci. A u ah changshäm ah phi kä kami kya man ci, a i ah kia sei ning m’hlawt gui khai, na ci ang?” cik ci gui.
34 Bawipa Jesuh naw, “Kei naw akcang ka pyein cu katnak bik ciah chang phung cu, katnak ah changshäm ah kyak ci. 35Chang shäm cu im kyong ung angtäi ah kä om tuk ci, cun ung phi htapa läi cu angtäi ah om ci. 36Htapa naw a ning m’hlawt gui ah a kyak ung nangmi cu akcang ah nami phyawng khai. 37Nangmi cu Abraham ah hta ng’shon gui ah ka ning hmat gui ci. Cun ung phi kei ah m’theithang kä ng’ya hlü u ne, kei nami na ngawn khai ah nami tha nak ci. 38Kei cu Kapa ah nam cäi ah mäih ah kang thu ci, nangmi cu nami pa ah pyein ah mäih ah nami bik ci,” cine kya ne gui ci.
39Ngami naw, “Keimi ah pa cu Abraham nei” cik ci gui. Bawipa Jesuh naw, “Nangmi cu Abraham ah hta gui ah nami kyak ung, Abraham ah mäih ah nami bik khai. 40Khanpughi ah ng’thu kang yak ah mäih ah kei naw ka ning m’thein ba gui ci, cun ung phi nami na ngawn khai ah nami tha nak ci, Abraham naw cun ah kä bi te ci. 41Nangmi läi nami pa ah bi ah mäih ah nami bi ba ci” ci na gui ci.
Ngami naw, “Keimi ung Khanpughi bäng kami pa om ci, keimi cu ani ah na hta gui nei” cik ci gui.
42 Bawipa Jesuh naw, “Khanpughi cu nami Pa akcang ah a kyak ung, nangmi naw kei nami nam hni khai, a i ah kyasei ci ung, kei cu Khanpughi ungka law ne, ka gawk lawk ci, ka mät ah ngaih ah ka lawk ciah kä kyak ci, ani naw ana tüih law ah kyak ci. 43Kei ah thu cu a i ah kyasei kä nami hmat ang ci ung, nangmi ung kei ah ng’thu nami hmat nak vai thagui kä ah om su ah kyak ci. 44Nangmi ah pa cu satan ah kyak ci, nangmi cu nami pa ah ng’yak hlü bäng ah nami bi hlük ci. Satan cu a htük ge ung chang ngawn ciah kyak ci, Ani ung düng nak kä om sei, düng nak awn kä om phung ne hleeihlak thei ci. Ani cu hleeihlak nak ah apa ah kia ne, ang tüi püi ge ah hleeihlak thei ci. 45Kei naw düng nak akcang pyein-ä sei, nangmi naw kä nami yum ci. 46Kei naw katnak kabi ah mawng a u naw m’dang hning khai ang? Kei naw düng nak akcang ka pyein ung a i ah kyasei kä nami yum ang? 47Khanpughi ungka lawk ci naw Khanpughi ah thu ngai ci, nangmi cu Khanpughi ungka kä nami lawk ciah kya ne, ani ah ng’thu cu kä nami ngai ci” ci na gui ci.
Bawipa Jesuh La Abraham
48Ngami naw Bawipa Jesuh-am,” Nang cu Samaritan chang, khoshe ah kai nei “Kami cicu kä hman ne ma?” ci nak ci gui.
49 Bawipa Jesuh naw, “Kei cu khoshe naw kä na kai ci, kei naw Kapa cu kamtam khah ci, cun ung phi nangmi naw kei cu nami na ng’yomsho ci. 50Kei naw ka mät ah hlüngtai nak vai kä ka shui ci, cun ung phi kei ah hlüngtai nak vai shui ne, kei lam ah om ne, m’khoichak ci cu om ci. 51Kei naw akcang ka pyein cu, kei ah m’theithang läk ci phung cu ngawi ah phi kä sik khai” ci na gui ci.
52Ngami naw, “Nang cu khoshe naw a ning kai ah kami hmat ci nei, Abraham si pyi ci, profet gui phi si pyi ci gui, cun ung phi kei ah thu ngai cicu kä si hlawt khai” na cik ci. 53Nang cu si pyi ciah kami pa Abraham ah mä na hlüngtai pi ne ma? Profet gui phi si yawp pyi ci gui nei, nang naw na mät cu a u ah nang ngai ci ang?” cine ng’shik ci gui.
54 Bawipa Jesuh naw, “Kei naw ka mät kamtam khah ung, kei ah hlüngtai nak cu a kholä ah kyak ci. Kei namtam khah cicu kei ah Kapa ah kyak ci. Ani cu nangmi naw kami Khanpughi nei” nami cik ci. 55Nangmi naw ani cu kä nami hmat ci, cun ung phi kei naw ka hmat ci. Kä ka hmat ci ka ci ung ka hleei ka pyein ciah kyak khai. Kei naw Kapa cu akcang ah hmat ne ang thu cu ka ngai ci. 56Nami pa Abraham cu kei ka law vai ah a khin hmu lawk khai kya ne yei ci, acun hmu tuk cang ci kya ne yeikyai ci,” ci na gui ci.
57Ngami naw, “Nang cu na khokum hma-kip phi kä be phak ci, a i hawk chaa nei, Abraham cu na hmuh tu man vü” cik ci gui.
58 Bawipa Jesuh naw, “Kei naw akcang ka pyein cu, Abraham kä ang tüi pha ung kei ka om pyi ci nei” ci na gui ci.
59Ngami naw Bawipa Jesuh ami vawih nak vai lung kaw ci gui. Cun ung phi Bawipa Jesuh cu ng’thup ne Taigüim ungka a hei lam ah hteit ci.
Currently Selected:
JOHAN 8: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
