HAKKAI 1
1
Taigüim cawh ba vai ah Bawipa ah Thumkhän
1Persia khaw ung Darius ghangpughang ah a kyak nak, a kum goi nak, a cha chuk nak ah hnüüp ät hnüüp ung Bawipa naw prophet Hakkai ung ng’thu pyen ci. Cun ah ng’thu cu Judah uktu bawi Shealtiel ahta Zerubbabel la taigütung Joshua, Jehozadak ah hta ah phäh ah kyak ci.
2Hlüngtasi säih ciah Bawipa naw Hakkai a pyen nak cu, “Shin ah chang gui naw Taigüim cawh ba vai ah kä khin phak ci nei, cik ci gui,” ci neta, 3Bawipa naw shin ah ng’thu cu prophet Hakkai ungka naw a chang gui am m’thein gui ci. 4“Ka chang gui aw, ka Taigüim she ne a kyak sang ung, a i ah kyasei im ni cine nami om ang? 5Nangmi ah khan ah a i a gawk law cu kä nami hmu ne ma? 6Nangmi cu akda geit u ne phi api hta nami khäm ci. Nami ei vai om sei phi kä nami phü ci, nami awk vai om sei phi kä nami ng’büh ci. Nami sui vai om sei phi oh khai ah kä nami sui ci. Bii bik ci naw ang cheng awn a hnun a m’ghin nak vai ah kä ng’büh ci. 7A i ah kyasei shin ah a kyak cu kä nami hmuk ci ma? 8Atuhbäi khawgui ah kai ne, k’peen aat ne, Taigüim cu co ba vä. Cun kawn ah nami na yeikyai nak khai, ka om ah mäih ah nami na khawihnah khai.
9“Akda nami khäm khai ah ngai u ci sei phi, api ah taang ci. Im ah nami law püi ung kei naw ka muh phyit ci. A i ah kyasei cun ah ka ci ang? A chang sing nami im ah ng’ä ne co u ci sei, ka Taigüim seka ne a kyak ah phäh ah kyak ci. 10Cun ah kyasei khaw kä aa ci, geit kä tho ci. 11Kei naw khomdekkhan ah khaw käu nak ka yuk chah khai — khogui, khomhtung, loma lai ma, oliv-loma — m’dek ung tho ciah geit avan ah khan — chang avan, khisa avan, ah khan la nami geit nü ah khan ah.”
Chang gui naw Bawipa ah Thumkhän Ngai ci gui
12Zerubabel la Joshua ni, Babilonia ah ka dawng nak ah kaa law ba ciah chang avan naw Bawipa ami Khanpughi naw bi vai ah a pyen cu bik ci gui. Ngami cu kyi u neta Bawipa ah ng’shä tüih prophet Hakkai ah ng’thu cu ngai ci gui. 13Hakkai naw Bawipa ah ng’thu chang gui am a pek gui cu, “Kei cu nangmi awn atäng ah ka om khai, cun cu ka shaitak nei” ciah kyak ci. 14Chang avan naw Taigüim ami bi vai ah Bawipa aw chäng gui ci. Zerubabel, Judah uktu bawi, Joshua taigütung la ami k’täm nak ah kaa law ba ci gui ami van ah kyak ci. Ngami naw ami Khanpughi, Hlüngtai ciah Bawipa ah Taigüim cu tün ne bik ci gui. 15Cun cu Darius ah uknak a kum goi nak, a cha chuk nak ah a hnüüp m’ku lei phli nak ung ah kyak ci.
Currently Selected:
HAKKAI 1: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
