ATÜNNAK 25

Abraham ah Ahei a Htangshon Gui

(1Stn 1:32-33)

1Abraham naw Keturah chu na tuba ci. 2A chu ba ah hta gui cu, Zimran, Jokshan, Medan, Midian, Ishbak la Shuah ah kyak ci. 3Jokshan ah hta goi cu, Sheba la Dedan ah kyak ci. Dedan ah htangshon gui cu Asshurim, Letushim la Leummin pakhui gui ah kyak ci. 4Midian ah hta gui cu Ephah, Epher, Hanok, Abida la Eldaah ah kyak ci. Shin gui ami van cu Keturah ah ng’shon gui ah kyak ci.

5Abraham naw a khawh avan cu Isaak am ap ci; 6Cun ung phi ani cu ghing yah ci kya neta, a hei ak chu gui awn ami hta gui am phi a khawh cu pe gui ci. Cun ah a hta gui cu Isaak awn ng’shawng ne om khai gui ah hni law lam ah tüi gui ci.

Abraham Ah Sih la Ami M’cim

7-8Abraham cu a khaw kum phia la chih kip lei hma ung a ghi sih ah sik ci. 9A hta goi Isaak la Ishmaela naw Makpelah ng’cim hmun ung phuh ci goi. Cun ah hmun cu Mamre ah hni law täng Hittit pakhui Zohar ah hta Ephron ah khaw man te ah kyak ci. 10Cun cu Hittit chang gui ah ka, Abraham naw a thon ba ah kyak ci. Abraham la ak chu Sarah cu a cun ung m’cim goi ci gui. 11Abraham a sih kawn ah Khanpughi naw Isaak cu hriham pek ci. Ani cu “Ghing ne kei na hmuk ciah tuishawk” ah pei ah om ci.

Ishmaela Ah Htangshon Gui

(1Stn 1:28-31)

12Sarah ah Egypt changshäm Hakarah la Abraham ah hta Ishmaela ah htangshon cu; 13ami ng’tüi nak ah ng’läk ah guk ung: Nebaioth, Kedar, Adbeel, Mibsam, 14Mishma, Dumah, Massa, 15Hadad, Tema, Jetura, Naphish la Kedemah ah kyak ci. 16Ngami cu pakhui gha lei goi ah phighi gui ah kya u ne, ami pigaw la ami khaw hmun ah ng’läk ah ming nak ci gui. 17Ishmaela cu a khawkum phia la thum kip lei chih ung sik ci. 18Ishmaela ah htangshon gui cu Assiria khaw ah hteh nak lam Egypt khaw ah hni law täng Havilah la Shura gawnu goi ah ang lak ung om ci gui. Ngami cu Abraham ah a hei htangshon gui ah om nak vang lam ah om ci gui.

Esau la Jakob Ah Ng’Tüi Nak

19Shin cu Abraham ah hta Isaak ah mawng ah kyak ci. 20Isaak cu a khaw kum phlikip ung (Mesopotamia khaw, Aramean chang) Bethuela ah hta, Laban ah be, Rebekka awn ng’chungla ci goi. 21Rebekka cu kä hta khäta, Isaak naw Bawipa ah taigü pek ci. Bawipa naw a taigü ngai sei Rebekka cu kämah lawk ci. 22A kämah nak cu ang phi ah kya neta, kä a hta nak pha ung ngani cu puk kyong ah ng’tuk ci goi. Rebekka naw, “A i ah kya ne ang, kei ung shin ah a kiak?” cineta, Bawipa cu ng’shik khai ah hteit ci.

23 Bawipa naw ani am,

“Na puk kyong ah

chang pakhui hnih om ci,

Nang cu ng’lakmah ciah

chang pa hnih ah

na hta khai.

Tumat cu gai pi khai,

Ang vaipi cu

ak hmaw pi ah täkphan ah

om khai” cine pyen nak ci.

24A hta nak vai ah akhin gawk law khäta, ani cu angphi pami goi ah hta ci. 25Lut law htük cicu asa sen ci, mu ciah suinu ah mäih ah amu om ci, cun ah kyasei Esau ah a ming sui ci gui. 26Tumat cu Esau ah khaw m’du k’pang ne lut law sei, Jakob ah a ming sui ci gui. Ngani ani ng’tüi law yah ung Isaak cu a khaw kum chuk kip lawk ci.

Esau Naw Hta Htük Ah kyak Nak Yoi Ci

27A hmaw goi cu ng’vai law ni neta, bä ciah sakaap ah kya law ne, bung k’pya ah hteit hton ci, Jakob cu adüm ah om ne im ah om ci. 28Esau naw sa ngawn sei ei ci kya neta, Isaak naw Esau cu m’hni ci, Rebekka naw Jakob cu m’hni ci.

29Hnüüp ät ung Jakob naw bei antui a shon yah ung Esau cu sa a züh nak ah kaa law ba ci. Ani naw ei cawi law neta, Jakob am, 30Kei ei ka cawi ci nei, sen ciah antui cä na m’bei ä” cik ci. (Cun ah kyasei ani cu Edom ah ami sui.)

31Jakob naw, “Hta htük ah kyak nak na na pek vai ung, shin ah ei cu ka ning pek khai nei” cik ci.

32Esau naw, “Bä khai nei, cawi ne ka si lawk khai kyak ci, hta htük ah kyak nak a i ka haw nak vai” cik ci.

33Jakob naw, “Hta htük ah kyak nak na na pek khai ah ng’thu na m’khän ma vai” cik ci.

Esau naw ng’thu m’khän neta, hta htük ah kyak nak cu Jakob am ap ci. 34Cun kawn ah Jakob naw m’htut la k’bei antui cu pek ci. Ani cu ei ne aw neta ng’düi law ne hteit ci. Cun ah Esau naw hta htük ah kyak nak cu a i baw düt ah cik ci.

Currently Selected:

ATÜNNAK 25: CBC

Highlight

Copy