Matthai 8
8
Zingsuv Ta Caahminghmaa A phyapa Pakha A Patluo Sa
(Mar 1:40-45; Luk 5:12-16)
1Zingsuv ca tluocung taakhata za cung te cawsaa hluvpuv ta ama ziy. 2Caahminghmaa#8:2 Caahminghmaa tapa biesuo hingpasana phangphang tana zaw a cuo khu a phyapa pakha a vaw te a hmielie a pakhuv pane te, “Abyipa, na khing kieca ina pathe sa khu ciy,” a ta.
3Zingsuv ta a kuv pazuo te a hrie, “I khing. Pathe tie,” a ta. Capapaa ca a pasana taata sungkha ta a tluo. 4Cakhutaa Zingsuv ta, “Ahunghmuo chang kha yi, cadyiseca tluobyipa'a luo kha vaa la vaa pahmung sa tie, cakhutaa cawsaa hmiekunglie i tluo tli tapa paluosana ta Moses ta tue riypa a tapa hriykhungrina kha tue tie”, a ta.
Zingsuv Ta Rom Riebyipa Changtaapa A Patluo Sa
(Luk 7:1-10)
5Zingsuv ca Kapernaum khy luo a vaa ngie ning kha riebyi pakha ta a vya taw te, 6“Abyipa, i changtaapa pakha ca pakya te a pasa a ruv hringhruo nakawta ing liena a laa thluo,” a ta.
7Zingsuv ta, “A vaw'a ang te i patluo sa aa,” a ta.
8Riebyipa ta, “Abyipa, kama ca i ingchung luo nama a vaw riypata a tla va ang. Cuorasala na ryi kaakha na pathlie kieca i changtaapa ca a tluo aa. 9Kama zaw hing Abyi le viepa rawlie a awpa i cuo pahaata, i rawlie rieka i hnyi ra. Pakha kha, “Cakuo,” i ta kie cakuo te, a hrangpa pakha kha, “A vaw,” i ta kieca aa vaw; cakhutaa i sii kha, “Hingpa hing tue,” i ta kieca a tue,” a ta.
10Zingsuv ta capa bie ca a thyi tiyta a nang-uosa te a ziypa tie kha, “Hinghaapa zangna a hnyipa Israel ming pakha hmuo hmung buo va ang. 11Biehmisi tana ica chang yi: hinghaapaapa zangna hing Israel ming chunglie hmuota hmung va ang. Ica chang yi, ningchiy ningtla taata cawsaa hluvpuv ca a vaw'a yite, vuoruo pena chunglie kha Abraham, Isak, Jakob zaw hneta sa ama ning pakhaw nguoluo ning kha 12vuoruo pena a cu riypa tie tlaku kha ale khyzingna luo thawpa ta cuo'a yite, ama lie kha caa yite ama haa ama rie aa,” a ta. 13Cakhutaa Zingsuv ta riebyipa kha, “Cakuo tie; na zangna haata na cuota tuepa cuose,” a ta. Riebyipa changtaapa ca capa cuo lie cata a tluo.
Zingsuv Ta Piter Ing Lie Cawsaa Hluvpuv A Patluo Sa
(Mar 1:29-34; Luk 4:38-41)
14Zingsuv ta Piter ing luo kha a ngie ca, Peter piynung ca luvce ta za pasa te iehmang lie aa zie pakha a hmung. 15A kuv kha hrie te, a nge lingpa kha tluo te, thu te ama kha a mangsang.
16Capa zuoluo cata khuevuo ta a tuepa cawsaa a hluvpuv kha ama'a luo ama vya chiykhyi. A ryi kaakha ta thlaapa kha papya diy te a pasapa bangkhuo kha a patluo sa yi. 17Hingpa hing profet Isaiah ta, “Ama ta ma tluo linapa kha la te ma pasana zaw kha phya te a sikhyi,” a tapa a tlingna riypata a cuo.
Zingsuv Ziytuv A Cuo Riypa Tie
(Luk 9:57-62)
18Zingsuv ta a thaalie cawsaa hluvpuv kha a hmung tiy yi ta, riyliy huesuo luo vaa riypata a chang yi. 19Phungbie saya pakha a vaw te, “Saya, na sina bangkhuo tana ica ziy aa,” a ta.
20Zingsuv ta, “Cahnie zaw ta khue hnyi yite pavaa zaw ta buv ama hnyi, cuorasala Cawsaa Saacapaa ca luv china hmang hmuota hnyi vyi,” a ta.
21Ama a ziytuv a cuopa a hrangpa pakha ta, “Abyipa, kaa'a ang te i paa kha va paby taa thi'a ang,” a ta.
22Zingsuv ta, “Na ziy tie, a thiypa tie khata ama'a thiypa ca paby thluo yi se,” a ta.
Zingsuv Ta Thliychie A Padie
(Mar 4:35-41; Luk 8:22-25)
23Zingsuv ca sawkawpalaw luo kie te ziytuv tie ta ama paziy. 24Thliychie khuopuv ta a vya hruo te sawkawpalaw ca tiylaw ta buvkhung aa nang, cuorasala Zingsuv ca aa hmung. 25Ziytuv tie ta vaa yite ama pathu. “Malie khuo tie, Abyipa! vuotaa ma thiy diy'a nang hing” ama ta.
26Zingsuv ta, “Zangna diydyapa zaw, Khaapanakawma nama thlaa a zang?” a ta yi. Cakhutaa thu te thliy hne riyliy kha a chuo ca nesiyliy khata ama die.
27Ama kharue ta haa te, “Tuokhaapa cawsaa ma a cuo ryarya, thliy hne riyliy tahmuo a ri amaa ngie,” ama ta.
Zingsuv Ta Khuevuo Ta A Tuepa Tie A Patluo Sa Yi
(Mar 5:1-20; Luk 8:26-39)
28Zingsuv ca riyliy huesuo Gadara ama tapa ruo luo kha a va chiy tiyta khuevuo ta aa hryipa cawsaa pahning ca thluo taata kya pya yite ama kha amaa taw. Hingpa tie hing ciy amaa chiysa nakawta capa luopuv ca ahungtahmuo ziy nguo vayi. 29Sungkhapuv ta khi yite, “Khazing Saacapaa, tuokhaama malie na tue khing? A cuo aa de hluo tama kiema riethyi pi riypata naa vaw,” ama ta. 30Iema'a taata a hla lina hmang lie va a hluvpuv kha ama tle nguoluo. 31Khuevuo tie ta Zingsuv kha paakie yite, “Malie na papya kieca va chung luo hue malie pangie sa thi tie,” ama ta. 32Zingsuv ta, vaa ung! a ta yi. Cacuonakaw pya yite va chung luo ca ama vaa ngie. Va bangkhuo ca lungkuo taata riyliy chung luo a zupathla yite tiy lieta ama thiy diy. 33Va a khiepa tie ca khychung luo kha a ruo yite khuevuo a hnyipa cunglie a cuopa bangkhuo kha ama va chang. 34Cacuonakaw khychung taata cawsaa bangkhuo kha Zingsuv a taw riypata pya yite, ama hmung ca, ama ruo taata pya riypata paa ama kie.
Currently Selected:
Matthai 8: LNT1
Highlight
Share
Copy
Want to have your highlights saved across all your devices? Sign up or sign in
New Testament in Chin Lautu © Bible Society of Myanmar, 2015.
