Matthai 21

Zingsuv Rungnaana Hne Jerusalem Luo A Ngie

(Mar 11:1-11; Luk 19:28-40; Jhn 12:12-19)

1Zingsuv hne ziytuv tie ca Jerusalem khy a thaa luo kha a vya ngie viele yite, Oliv tluo lie a awpa Bethfeih khy ama vya phapa khata, Zingsuv ta ziytuv tie pahning kha hmie luo pathlielu yite, 2“Nama hmielie a awpa khy luo kha va si ungla a taata cangpa laa sakha a zaa hre thluopa kha hmung paluo'a ung cate, pathluo ungla kama'a luo namaa vya chiy aa. 3Cawsaa ta cuvkhaa aca ta kie yi ca, “Abyipa na a hu,” ta ungla aca pathlie paluo'a yi,” a ta. 4Hingpa hmang hing profet ta a za ri ciepa a tlingna riypatana a cuo. Profet ta:

5Zion sacanung ca chang tie ung

Na siepahruo na nama'a luo a vaw nguoluo

Ama ca cawsaa nangnepa cuote

laa na aa vya khang

Laa panuta na a vya khang,

va ta tie ung,” a ta.

6Ziytuv tie ca si yite Zingsuv ta a changpa haa yi khata ama tue. 7Laa hne a taata kha a vya chiy yite, pang kha a ke lie padie yite Zingsuv ca aa khang. 8Cawsaa hluvpuv ta ama pang kha luo lie phaa yite, chekha ta chinghmya kha sa yite luo lie ama phaa. 9Zingsuv hmie luo ta a cakuolepa tie hne a hnang luo taata a paziylepa zaapuv khata,

“Hosanna! David Saacapaa ca

pathuosa tie ung!

Abyipa ming ta a vawpa ca

Khazing ta thluechiy pi se!

A suocepa vuoruo lie khiy Hosanna tapata

pathuosa pata cuose!” ta yite ama khi.

10Jerusalem luo a ngie tiyta, khypuv chung bangkhuo ca a cali te, “Ahung tama a cuo,” ta yite ama hiehriy. 11Cawsaazaapuv ta, “Galilee ruo Nazareth khy ming profet Zingsuv na a cuo,” ama ta.

Zingsuv Ta Biena-ing A Pathe

(Mar 11:15-19; Luk 19:45-48; Jhn 2:13-22)

12Zingsuv ca biena-ing luo kha a ngie te biena-ing chunglie sue a zaapa tie hne a calyipa tie kha a papya diy yi. Tuokaa a thlepa tie cabya hne valale a zaapa tie thude zaw kha nuopatyi diy te, 13“Caapathepa chunglie ta,

‘I ing ca thlaachuona ing ama ta aa’;

cuorasala niema ta ca

a paruvpa khue tana nama tue,” a ta yi.

14Mingcuepa hne a phyi cabiepa tie kha biena-ing lieca ama'a luo a vaw yite a patluo sa yi. 15Cuorasala tluobyilepa tie hne phungbiesaya tie ta kharuehaa hmang a tuepa kha hmung yite, haatiy zaw ta, “David Saacapaa ca pathuosa tie ung,” ta yite biena-ing lie ama khipa kha ama thyi tiyta ama hi a haa. 16Cacuonakaw Zingsuv kha, “Ama ripa ca na thyi ma?” ama ta. Zingsuv ta, “I thyi samaw! Caapathepa ta,

‘Haatiy zaw'a nata meme a pazaw kaliepa

haaseta zaw kha nama pathuosana ca

napa ri sa yi,’ a tapa kha

ri buo va ung cama?” a ta yi.

17Zingsuv ta a ruose yite, khypuv chung taakhata pya te Bethani khy luo kha vaa te capa lieca aa ri.

Zingsuv Ta Thyikuvkung Chie A Sa

(Mar 11:12-14, 20-24)

18A mawluo mawdiy ta khypuv chung luo a vya kaa pakhaa ning kha Zingsuv ca a nang a diy. 19Luopuv kielie thyikuv kung kha hmung te a va pangie ca a hnaa ri li pata khaapahmuo hmung vyi. Cacuonakaw thyikuv kung ca, “Khatiy tahmuo na thyi pathyi kha tie,” a ta. Cakhupatahne thyikuv kung ca a caa. 20Ziytuv tie ta capa ca ama hmung tiyta ama nang uo te, “Tuokhaatama thyikuv kung hing sungkha ta a caa diy hmuo,” ama ta. 21Zingsuv ta, “Biehmisi tana ica chang yi: palung luoluena hnyi li pata nama zang kieca thyikuv kung lie i tuepa haa dyi hing tahmuo cuo li pata, hingpa tluo hing hmuo, ‘A hnyi la riyliy luo hue a thaw tie,’ ta ungla aa thaw aa. 22Zangna hneta, thlaa nama chuo kieca nama hiepa bangkhuo ca pi pata nama cuo aa,” a ta yi.

Zingsuv Naw Hnyina

(Mar 11:27-33; Luk 20:1-8)

23Zingsuv ca biena-ing luo kha a ngie te a pacuv nguoluo ning yi kha tluobyilepa tie hne uvthyi tie kha a thaa luo a vaw yite, “Khaapa nawhnyina tama hingpa hmang hing na tue? Ahungma hing nawhnyina hing caa pi? ama ta. 24Zingsuv ta, “Bie suokha ca hiehriy'a yi ang te ina palie khu kie ung caca khaapa nawhnyina tama hing hmang hing i tue tapa kha ica chang'a yi. 25Johan ta tiy a nawpa yi hing vuoruo taata ma a cuo, cawsaa taata? a ta yi. Iema'a na iema kha a i yite, “Tuokhaatama ma pa lie'a ung? “Vuoruo taata,” ta se pala, “Khaapaakawma Johan ca nama zang va?” malie a ta aa. 26“Cawsaa'a taata,” ta hyi'a pate, Johan ca cawsaa bangkhuo ta profet tapata ama zang nakawta iema ca ciy amaa chiy hyi,” amaa ta. 27Cacuonakawta Zingsuv kha, “Pachang va puv,” ama ta. Zingsuv ta, “A cuo kieca, kama zaw, khaapa nawhnyina tama hingpa hmang hing i tue tapa kha ca chang raa vayi ang,” a ta yi.

Saacapaa Pahning Pakhingpuonabie

28Tuokhaatama nama rue? Cawsaa pakha za aw te saacapaa pahning a hnyi. A uvthyipa kha, ‘I sapaa, ata ning ca mingsuv diedung luo si la re va hrie tie,’ a ta. 29Ama ta, ‘Si khing va ang,’ a ta, cuorasala a hnang taata a palung a thle te a si. 30A saata a syipa'a luo kha vaa te, capa haa ngiethie cata a chang ra. ‘I si'a ne, abyipa,’ a ta, cuorasala si li pata a aw. 31Hingpa tie pahning lie hing ahung hingma a paa khingnapa kha a tue? a ta yi. “A uvthyipa,” ama ta. Cacuonakaw Zingsuv ta, “Biehmisi tana ica chang yi: ngukhyituv tie hne siyhrawnung tie zaw na Khazing pena luo caa ngie khuo'a yi. 32Johan kha aa hmuopa hringna luopuv pahmung sa riypata a vaw te zang va ungciy; cuorasala ngukhyituv tie hne siyhrawnung tie zaw ta ama zang. Nama hmung thluo patahmuo, a hnang taata nama palung kha a thle pata zang va ungciy.

Rehrietuv Pha Lipa Tie Pakhingpuonabie

(Mar 12:1-12; Luk 20:9-19)

33“Pakhingpuonabie a hrangpa kha naathlie tie ung: “Luruo a hnyituvpa khata mingsuv diedung kha tue te, piehu a padung, mingsuv nawna khue kha cu te, rievena tluophie zaw a sa. Cakhutaata rehrietuv tie kha pahlie yite ama ca khy tlaw riypata aa tha. 34Mingsuv thyi lu tiy a ta taata a cuvu la riypata rehrietuv tie'a luo kha a sii zaw a pathlie yi. 35Rehrietuv tie ta a sii zaw kha patuv yite, pakha ama tuv, pakha thie yite pakha ca alung ta ama vaa. 36Luruo a hnyituvpapaa ta a sii zaw kha a hluv vie ta a pathlie yi. Rehrietuv tie ta a hluo nig ama za tue taapa haakhata ama tue pakhaa. 37A hnangcawce ta a saacapaapa kha pathlie te, “I saacapaa hing ca ama hmiezaa ngiethie aa,” a ta. 38Cuorasala rehrietuv tie ta ama hmung pahne ta, “Hingpapaa hingna a rucutuv ta a cuo, a vaw tie ung, thie ung sala a hnyipa hing a la'a ungpuv,” amaa ta. 39Cacuonakawta patuv yite diedung khungthing luo kha thaw yite ama thie. 40“A cuo kieca diedung a hnyituvpa a vya chiy tiyta rehrietuv tie kha tuokhaatana a tue thlu'a mang yi nama ta ma? a ta yi. 41“Capa cawsaa chiepa tie ca thie'a yite, mingsuv lu cuo ningta a cuvu a pi khupa rehrietuv tie kha diedung ca a pahlie'a yi,” ama ta.

42Zingsuv ta, “Caapathepa ta:

‘Ing satuv tie ta ama thawpa alung ca

Ingkiy lung ta aa li.

Capa hmang ca Abyipa tuepa cuote

Ma hmungna lieta nang-uo a chiy vama?’

a ta pakha ri buo va ung ca ma?” a ta yi.

43Cacuonakawta, ica chang yi: “Khazing pena ca niema'a taata lapa cuo'a te, pena thyipaa pha a hnyi riy'apa tie kha pi pata ama cuo aa,” a ta. 44Ahunghmuo cuose hing alung cunglie a tlapa ca kyipatlaa'a te, hing alung ta a tlasuepa ca a zapatlaa diy aa,” a ta.#21:44 Hluo vie caa-uv lieca rina tluo 44 hing aw vyi.

45Tluobyilepa tie hne Farasi ming ta Zingsuv ripa pakhingpuonabie ca ama thyi tiyta, kiema na malie a ta tapa kha ama pachang. 46Cacuonakawta Zingsuv kha ama patuv khing, cuorasala zaapuv ta Zingsuv kha profet tana a cuo tapa ama zang nakawta zaapuv kha ciy yite patuv nguo vayi.

Currently Selected:

Matthai 21: LNT1

Highlight

Copy