Matthai 16

Kharuehaa Hmang Tue Riypa Ama Hie

(Mar 8:11-13; Luk 12:54-56)

1Farasi tie hne Sadusi tie kha Zingsuv'a luo a vaw yite a suenapa ama patuv khing nakawta, vuoruo taata a cuopa kharuehaa hmang malie tuepa la ama ta. 2Zingsuv ta, “Ning a tla caw ta avuo a se kieca, ‘Ningkhue na a pha aa,’ nama ta. 3Mawdiy ta avuo se te khy a paning kieca, ‘Khy na a saa aa,’ nama ta. Avuo kha mang ung cate ningkhue khaama a lu aa tapa nama ridaw khu, cuorasala ata chuo pamangsana ca a siyluo pachang khu va ungciy,” a ta. 4A pha lipa hne Khazing siysaa a ri lipa mingphang ta kharuehaa hmang namaa hie, cuorasala Jonah kharuehaa hmang ri li pata kharuehaa hmang hrangpa tuepa pata cuo'a va ungciy,” a ta.

Cakhutaa iema kha thuse yite pya te a cakuo.

Farasi Tie Hne Sadusi Tie Thiynung

(Mar 8:14-21)

5Ziytuv tie ca huesuo luo ama va pha tiyta viechuo a phyale kha ama maw. 6Zingsuv ta, Farasi tie hne Sadusi tie thiynung kha a raaring tie ung,” a ta yi. 7Ziytuv tie ta pakha hne pakha kha, “Viechuo ma phyale li nakaw na ama haahingta bie a ri thlu aa,” amaa ta. 8Zingsuv ta khaama ama ri tapa kha a pachang nakawta, “Zangna a cawpa zaw, khaapanakawma viechuo nama hnyi lina kaw kha nama ri nguoluo thluo? 9Pachang the tang va ung cama? Viechuo tluo pangaa ta cawsaa thawpangaa duo yi ang te, a hlyipa beke zung khazaa ma nama pakhaw tapa kha a thyi va ung cama? 10Viechuo tluo sariy ta cawsaa thawpaliy i duo ning yi kha haw a hlyipa beke zung khazaa ma nama pakhaw? 11Viechuo kaw ri vyi tapa kha tuokhaatama pachang li pata nama aw the? Farasi ming hne Sadusi ming thiynung kha a raaring tie ung!” a ta yi. 12Cakhutaata ziytuv tie ta, a raaringnapa malie a pipa hing viechuo lie ama hmuopa thiynung cuo li pata Farasi ming hne Sadusi ming pacuvnapa na a cuo tapa kha ama pachang.

Piter Ta Zingsuv Kaw A Phu

(Mar 8:27-30; Luk 9:18-21)

13Zingsuv ca Sisaria Filipi pe luo kha si te ama lieca ziytuv tie kha, “Cawsaa zaw ta Cawsaa Saacapaa hing ahung ama ta ma?” tapata a hie hriy yi. 14Iema ta, “Chekha ta tiynawtuv Johan aca ta yi, chekha ta Elijah ne ca ta yite, chekha ta Jeremiah a cuo li kie profet pakhakha tana a cuo, aca ta yi,” ama ta. 15“Niema haw? Kama hing a ahung ina ta ung cama?” a ta yi. 16Simon Piter ta, “Nama ca a hringpa Khazing Saacapaa, Messiah#16:16 Or Khrih tana na cuo,” a ta. 17Zingsuv ta, “Johan saacapaa Simon, thluechiypa tana na cuo! Tahematapakieca hingpa hing thiy hne saa taata aca pachang sapa cuo vyi, cuorasala vuoruo lie a awpa i Paa taata na a cuo,” a ta. 18Cacuonakaw ica chang: nama ca Piter#16:18 Gk Petros tana na cuo, hingpa alungpuvnung#16:18 Gk Petra cunglie hing i Khrihsaabuv kha padaa'a ang te thiyna tahmuo te khu buo hluo'a vyi. 19Vuoruo Pena taw kha ca pi'a ang te, alyi lie na khaapa ca vuoruo lie khaapa cuo ra'a te alyi lie na pahawpa ca vuoruo lie pahaw pata a cuo ra aa,” a ta. 20Cakhutaa Zingsuv ta Messiah a cuopa kha ahunghmuo chang li riypata ziytuv tie kha a thlu yi.

Zingsuv Ta A Thiyna Hne A Thupakhaana Riypa A Ri

(Mar 8:31—9:1; Luk 9:22-27)

21Capa cuo taakhata Zingsuv ta ziytuv tie kha, Jerusalem luo vaa'a ang te uvthyi tie, tluobyilepa tie hne phungbiesaya tie kuv lie ruvnaana khuopuv ta i taw aa. Ina thie'a yi, cuorasala ningthungna lieta pathu pakhaapa i cuo aa,” tapa kha a chang yi. 22Piter ta Zingsuv kha a hrang luo dya cakuo khyi te a chuo. “Abyipa, hingpa hmang hing ca Khazing ta na cunglie patlung sa thi kha se,” a ta. 23Zingsuv ta a vya pali te Piter kha, “Setaa, i thaa taahing cakuo! Luo naa khuotuv tana na cuo, tahematapakieca na ruenapa hing Khazing'a taata cuo vyi, cawsaa cuona taata a vawpa tana a cuo,” a ta.

Vieluo Hne Ma Khingna Thaw Khuna

24Cakhutaa Zingsuv ta ziytuv tie kha, “Ahunghmuota kama naa ziytuv a cuo khingpa ca iema khingnapa kha thuse pata ama vieluotung kha a puv yi sala na ziy yi se. 25Tahematapakieca ahunghmuota a hringna kha a khuo khingpa ca a hringna kha a sung'a te, kama kawlieta a hringna a sungpa ca hringna kha a hmung aa. 26Cawsaa hingta chuelyi bangkhuo hing cu rahmuo sala a hringna a sung kie khaama a thlahne aa? A hringna kha khaapatahmuo ta calyi pakhaa khu'a va tli.

27Cawsaa Saacapaa hing a Paa rungnaana cangta avuoming hneta a zuv'a te cawsaa bangkhuo kha ama rehriena haakhata a pakaa'a yi. 28Biehmisi tana ica chang yi: Cawsaa Saacapaa hing a pena luo aa zuvpa nama hmung hluo li a thiy li riypa hingpa lie hing nama aw,” a ta yi.

Currently Selected:

Matthai 16: LNT1

Highlight

Copy