Matthai 14

Tiynawtuv Johan Thiyna

(Mar 6:14-29; Luk 9:7-9)

1Capa cuo ning ca uvtuv Herod ta Zingsuv kaw kha thyi te; 2a kuv rawlie abyi tie kha, “Hingpapaa hing tiynawtuv Johan tana a cuo, thiyna taa na a thupakhaa, cacuonakaw tana hingpa kharuehaa hmang hing a tue khu” a ta yi. 3Herod ta a nuta Filip napuvnung#14:3 Hluo vie caa-uv lieca a nuta napuvnung a ta. Herodias kawlieta Johan kha patuv te, a cakhiy sa khu taayita thaw a za pathla. 4Tahematapakieca tiynawtuv Johan ta Herod kha, Herodias naa hlawpa hing a phung ta cuo vyi,” a za ta nakawta a cuo. 5Herod ta a thie khing raalaa pata zaapuv kha a ciy yi, tahematapakieca iema ta Johan kha profet tana a cuo tapata ama rue. 6Cuorasala Herod puvnapa ning a vya chiy tiyta, Herodias sacanungnung ca zaapuv hmie lie kha luo te Herod ca a palung a tluo hringhruo 7nakawta ama kha khaapa aa hie zaw pi riypata chie a sa te bie aa kuo. 8A nung ta a pasupa haata,” Hingpa daapakhue hingta tiynawtuv Johan luv kha na pi tie,” a ta. 9Siepahruopa ca a ngie a chi, cuorasala chie a sa te bie aa kuopa hne a khyche tie hmie a mang nakaw yi ta pi riypata naw pi yite, 10thaw-ing chunglie Johan luv kha a pate sa yi. 11Johan luv ca daa pakhue ta vya cyi yite lesaanung kha ama pi, ama ta a nung'a luo kha a cyile. 12Johan a ziytuv tie kha a vaw yite a riy ca la yite ama paby; cakhutaata vaa yite Zingsuv kha ama va chang.

Cawsaa Thawpangaa Sa A Duo Yi

(Mar 6:30-44; Luk 9:10-17; Jhn 6:1-14)

13Zingsuv ca Johan thuohlaa a thyi tiyta capa hmang taacata pya te sawkawpalaw ta ruocakung luo kha ama seta a vaa. Cuorasala cawsaa ta capa thuo ca ama thyi tiyta ama khy cyicuo taata pya yite ama kha ama ziy. 14Zingsuv ca sawkawpalaw taata kya cung te cawsaazaapuv kha a hmung yi ca, iema kha ngiechi hringhruo yite, a pasapa kha a patluo sa yi. 15Capa ning zuoluo ta ziytuv tie ca ama'a luo kha a vaw yite, “Ning ta a ngie tli, ruocakung na lie a cuo. Cawsaa hing pathlie yi la, ma cahriy lie a awpa khy luo hing iemata tah ning riypa vaa calyi yi se,” ama ta. 16Zingsuv ta, “Iema cakuo a hu vyi, niema ta ning riypa suokhakha pi tie ung,” a ta yi. 17Iema ta, “Ma hnyipa bangkhuo ca viechuo tluo pangaa hne ngaa sahning hingna a cuo,” ama ta. 18Zingsuv ta, “Kama'a luo vya cyi ung,” a ta yi. 19Cakhutaa cawsaa ca aphuv cunglie a patu sa yi. Viechuo tluo pangaa hne ngaa sahning kha la te, vuoruo luo kha ang te Khazing'a luo alawna bie a ri khu taata viechuo kha chechi te ziytuv tie kha a pi yi, ziytuv tie ta zaapuv kha ama re. 20Ama bangkhuo ta ning yite ama riy a bi. Ziytuv tie ta ama ning buopa kha pakhaw yite beke zung hraa hlyihning a ta. 21A ningpa ca canung hne haatiy ri li pata capaa seta thawpangaa hraw ama ta.

Tiy Cunglie Zingsuv A Cakuo

(Mar 6:45-52; Jhn 6:15-21)

22Cakhutaa Zingsuv ta cawsaazaapuv a pathlie nguoluo ning yi kha ziytuv tie ca sawkawpalaw luo kha pakie sa yite riyliy huesuo luo kha a pasi sa lu yi. 23Cawsaa a pathlie diy khutaa yi khata, tluocung luo kha thlaa chuo riypata ama se ta a kie. Zingsuv ca khy a zing nate khata ama lieca ama se ta a aw. 24Sawkawpalaw ca riyliy cunglie kha a hlapuv a chiy tli pata hmiepachaw ta a vya hruopa thliy aa taw nakawta tiylaw ta a cathlule ciemuo. 25Zingsuv ca mawdiy khata tiy cunglie vya cakuole te ziytuv tie'a luo kha a vaw. 26Ziytuv tie ta, tiy cunglie a phyi ta a vya cakuo pakha ama hmung tiyta ciy hringhruo yite, “Athlaa!” ta yite ama ciylung ta ama khi. 27Zingsuv ta sungkha bala ta iema kha, “Nama thlaa zang kha se, Kama tana i cuo, ciykha ung,” a ta yi.

28Piter ta, “Abyipa, nama ta na cuo pakieca tiy cunglie vya cakuo pata nama'a luo kha na pavaw sa tie,” a ta. 29Zingsuv ta, “A vaw tie,” a ta. Cacuonakaw Piter ca sawkawpalaw chung taa ca cung te tiy cunglie ca a phyi ta cakuo te Zingsuv'a luo ca a vaa. 30Cuorasala khuopuv ta thliy a hruopa#14:30 Hluo vie caa-uv lieca thliy a hruopa a ta. kha a hmung tiyta ciy te tiy chung luo kha a tlale ca, “Abyipa, Na khuo tie!” tapata a khi. 31Zingsuv ta yikha ta va paza te a va patuv khu taata, “Na zangnapa na a caw hringhruo de! Khaapanakawma palung luolue pata na aw,” a ta. 32Ama pahning ta sawkawpalaw luo kha kie yite thliy ca a die. 33Cakhutaa ziytuv tie ta sawkawpalaw chunglie ca abie yite, “Nama ca Khazing Saacapaa hmisi tana na cuo,” ama ta.

Zingsuv Ta Genesaret Lie Cawsaa A Patluo Sa

(Mar 6:53-56)

34Riyliy kha va te yite Genesaret ruo luo kha ama va chiy. 35Capa hmang lie cawsaa zaw khata Zingsuv ca ama pachang. Cacuonakaw a kiecahriy khy bangkhuo kha bie pathyi sa yite a pasapa bangkhuo kha Zingsuv'a luo ca amaa vaw khyi. 36A pangpeta chuo ama hrie the riypata Zingsuv ca paakie yite, a pangpe a hriepa bangkhuo ca ama tluo.

Currently Selected:

Matthai 14: LNT1

Highlight

Copy