Luka 20

Zingsuv Nawhnyina Kha Ama Hiehriy

(Mat 21:23-27; Mar 11:27-33)

1Ningkha ca Zingsuv kha Biena-ing chunglie cawsaa kha pacuv yite thuophaabie a ri nguoluo pata, tluobyilepa tie, phungbiesaya tie hne uvthyi tie kha a vaw yite, 2“Malie chang tie, Hingpa hmang zaw hing khaapa nawhnyina tama na tue? Ahungma naw caa pi?” ama ta. 3Zingsuv ta, “Bie suokha ca hiehriy ra'a yi ang te na chang tie ung, 4Johan tiynawna hing vuoruo taata ma aa zuv, cawsaa'a taata ma a hmung?” a ta yi. 5Iema hne iema kha a ruepakhaw yite, “Tuokhaatama ma ri'a ung? ‘Vuoruo taata ne ta'a pate, ‘Cacuokie, khaapanakawma nama zang va?’ malie a ta aa. 6Cawsaapa'a taata ne ta'a pate hingpa lie a awpa cawsaazaapuv hingta alung ta malie ama vaa aa, tahematapakieca Johan ca profet tapata ama zang diypa a cuo hyi,” amaa ta. 7Cacuonakawta, “Khaapa taata ma a hmung tapa pachang va puv,” ama ta. 8Zingsuv ta iema kha, “Kama zaw ahung'a taata ma hingpa hmang tue khuna naw i hmung tapa hing ca chang ra'a vayi ang,” a ta yi.

Rehrietuv Pha Lipa Tie Pakhingpuonabie

(Mat 21:33-46; Mar 12:1-12)

9Zingsuv ta cawsaazaapuv kha hing pakhingpuonabie hing a chang yi: “Luokha ca cawsaa pakha ta mingsuv diedung tue te, rehrietuv tie'a luo kha pahlie yite cuo syipuv chung khy a tlaw. 10Mingsuv thyi lu cuo aa de tiyta, diedung a hluotuv tie'a luo kha a cuvu va la riypata a sii pakha a pathlie. Cuorasala rehrietuv tie ta a siipaapa ca tuv yite a kuv cahri pata ama pakaa sa. 11Cakhutaata a sii hrangpa pakha kha a pathlie; cuorasala rehrietuv tie ta tuv ngiethie yite nangzaahmiechi ta ama tue khu taata a kuv cahri pata ama pakaa sa. 12Cakhutaata a sii pathungnapapaa kha a pathlie ngiethie; rehrietuv tie cata hmaa a phyana te ta tuv yite khungthing luo ama thaw. 13Catiyta mingsuv diedung a hnyituvpapaa cata, ‘Tuokhaatama i tue aa? I duepa i saacapaa hingna i pathlie aa, ama hing ca ama hmiezaa ngiethie aa!’ a ta. 14Cuorasala rehrietuv tie ta ama kha ama hmung pahne, pakha hne pakha kha, ‘Ama hingna a rucutuv ta a cuo. Thie'a ungpuv, cakiedyina a ru bangkhuo hing kiema huopa ta a cuo aa,’ amaa ta. 15Cacuonakawta ama kha diedung khungthing luo kha thaw yite ama thie. Cacuonakawta mingsuv diedung a hnyituvpapaa ta rehrietuv tie kha tuokhaatana a tue thlu'a mang yi nama ta ma? 16Ama ca a vaw'a te capa tie ca thie'a yite diedung kha rehrietuv hrangpa tie a pahlie'a yi,” a ta. Capaca ama thyi tiyta, “Cuo hrue thi kha se!” ama ta. 17Cuorasala Zingsuv ta iema kha mang yite, A cuo kie, Caapathepa chunglie ta,

‘Ing a satuvpa tie ta ama thawpa alung ca,

ingkiy lung tana aa li,’

a tapa hing a siyluo khaapatama a cuo?

18Ahunghmuo cuose hingpa alung cunglie a tlapa ca kyipatlaa yite capa alung ta a tlasuepa tie ca ama zapatlaa diy aa.

19Phungbie saya tie hne tluobyilepa tie ta kiema na malie a tapasue tapa kha ama pachang tiyta, Zingsuv kha patuv paluopa ama khing, cuorasala cawsaazaapuv kha ama ciy.

Ngukhyi Pina Kaw Biehiehriyna

(Mat 22:15-22; Mar 12:13-17)

20Cacuonakaw ama kha dya mangpathliy yite a bie mamaapa ta kalaa khu riypa hne naw a hnyituv muokiy byi kuv chung luo kha bie ripa riypata phakhyi khuna riypata cawsaa chekha kha cawsaa phasapa haata dya a pa-aw sa pata, Zingsuv mangpathliy riypa khata ama pathlie. 21Capa cawsaa a mangpathliytuv tie cata Zingsuv kha, “Saya, na ripa hne na pacuvna hing a hmuo tapata ma pachang. Cawsaa pahlyipale lipa cata Khazing khingna biehmisipa kha na pacuv tapa zaw ma pachang. 22Rom siepahruo'a luo ngukhyi pipa hing ma Phungbie ta a thlu ma a pa-aw ma?” ama ta. 23Cuorasala Zingsuv ta ama zyatena kha a pachang nakawta, 24“Ngu tuokaa phiekha na pahmung tie ung. Ahung hmiechang hne ming ma a taa?” a ta yi. Iema ta, “Siepahruopa hmiechang hne ming,” ama ta. 25Zingsuv ta, “Cacuokieca Siepahruo huopa ca Siepahruo kha pi ungla Khazing huopa ca Khazing kha pi tie ung,” a ta yi. 26Cahaa cata cawsaazaapuv hmielie kha patuv amaa nang raalaa pata tuokhaa tahmuo patuv khu vayi; bie a paliepa yi kha ama nang ta uo te a dieta tah ama aw.

Thupakhaana Kaw Bie Hiehriyna

(Mat 22:23-33; Mar 12:18-27)

27Sadusi tie chekha, thupakhaana aw vyi a tapa tie kha Zingsuv'a luo a vaw yite, bie ama hiehriy. 28“Saya, Moses ta malie a capepa siypa ca: Cawsaa pakha ca saata hnyi li pata a napuv a thiyse kieca, capapaa uvnu pakha ta ama ca a hlaw'a te a uvta cuo khata saata ama sapa aa,” a ta. 29Luokha ca uvnu pasariy aw yite; a pakhanapapaa ca nungchiy te saata sa li pata a thiy. 30Cakhutaata a pahningnapapaa hne 31a pathungnapapaa ta a hlaw yite, cahaa cata ama pasariy yalya ta saata sa li pata ama thiy. 32A hnangcawce ta cawsaanung zaw ca a thiy ra. 33Cacuonakawta thupakhaanapa ning thueta capa canungnung ca ahung napuv tama a cuo aa? Ama pasariy yalya ta amaa zaa hlaw kaluo,” ama ta.

34Zingsuv ta iema kha, “Ata chuo capaa hne canung ca amaa chiy amaa hie, 35cuorasala a vaw riypa chuo lie ta hring riypata aa tla tapa tie hne thiyna taata pathu pakhaapa tie ca a chiy a hie'a vayi. 36Iema ca thiy khu'a va tli yi, tahematapakieca avuoming lu'a yite thupakhaana saata ama cuo nakawta Khazing saata tana ama cuo aa. 37A kuo nguoluopa ruohraw kaw a capepa lieta Abyipa kha ‘Abraham Khazing, Isak Khazing, hne Jakob Khazing ta te Moses ta a ripa ca a thiypa tie ca hringna luo pathu pakhaa patana ama cuo tapa kha a paluo sa patana a cuo, a ta. 38Ama ca a hringpa tie Khazing cuote a thiypa tie Khazing cuo vyi, tahematapakieca cawsaa bangkhuo ca amaa lie a hringpa selaw tana ama cuo,” a ta. 39Phungbie saya tie chekha ta, “Saya, na bieripa ca a pha ciemuo!” ama ta. 40Tahematapakieca ama kha bie hiehriy vie nguo va tli yi.

David Saacapaa Kaw Biehiehriyna

(Mat 22:41-46; Mar 12:35-37)

41Cakhutaata Zingsuv ta iema kha, “Tuokhaatama Messiah#20:41 Or Khrih ca David saacapaa tana a cuo, ama ta the? 42David hrahring ta Salm caa-uv chunglie,

Abyipa ta i Byipaapa kha,

43Na cariepa bangkhuo ca na phyi thabaw lie

chaapuo riypata i chi hluo li,

I cacuo luo kuo hingta a tu tie,’ a ta.

44David ta, ‘Abyipa,’ a ta kieca tuokhaatama Messiah ca ama saacapaa ta a cuo the aa? a ta.

Phungbie Saya Tie Kha A Raaringna A Pi Yi

(Mat 23:1-36; Mar 12:38-40)

45Cawsaa bangkhuo thyi pata ziytuv tie kha, 46“Phungbie saya tie kha a raaring tie ung, iema ca buohryipasiypa a hryi pata a khiele khingpa, chadawtluo lie pa-uvsathyina hne bie a changpa a tlechuopa, hne apungna-ing lie hne pyi tuena lieta a tuna phacepa lie a tu khingpa tie tana ama cuo; 47Nunghlyi tie kha ama ing te chuv yite mang a ngiena riypata a pasiypuv ta thlaa ama chuo! A ruv viepa duotena na ama ang aa,” a ta.

Currently Selected:

Luka 20: LNT1

Highlight

Copy