Luka 15

Tuv Viepa Pakhingpuonabie

(Mat 18:12-14)

1Luokha ca, ngukhyituv tie hne a suepa tie kha Zingsuv bie naathlie riypata a maa vaw. 2Farasi tie hne Phungbie saya tie kha a cie yite, “Hingpapaa hing a suepa tie kha a khe yite iema hne sa zaw a ning!” ama ta.

3Cacuonakaw Zingsuv ta hingpa pakhingpuonabie hing a chang yi: 4“Niema hrawlie pakha ta tuv zakha hnyi sala sakha a vie pata a cuo kieca tuv sawcaky hne sacaky kha ruochung lie patle siy'a te a viepa sakha kha a hmung hluo li a huv aa, cuo vama?. 5A va hmung tiyta, a letung cunglie vya khangle te a palung a tluo hringhruo. 6Ing luo a vya chiy tiyta a viesaa hne a ingpaa zaw kha ku yite, ‘A viepa i tuv kha hmung ang te naa lawkhyi tie ung,’ a ta yi. 7Ica chang yi: cahaa cata, sue a ngiepachiy a hu lipa aa dangpa saw caky pacaky laata a suena a ngiepachiypa a suepa pakha kawlieta vuoruo lie palungtluona a le vie a aw aa,” a ta.

Tuokaa Viepa Pakhingpuonabie

8“A cuo li kie, canung pakha ta ngu tuokaa#15:8 Gk drachmas phiekha hing kuliy re a hrietuv pakha ning kha thavie tana a cuo. phiehraa hnyi sela phiekha a pavie kieca myi-ing kha a vuo'a te, a ing kha phiy'a te, a hmung hluo li a cakiy a capie te ta a phasa pata a huv aa cuo vama?. 9A hmung tiyta, a viesaa hne a ingpaa zaw kha ku'a yite, ‘I paviepa i tuokaa kha hmung pakhaa ang te naa lawkhyi tie ung,’ a ta yi. 10Ica chang yi: cahaa cata, a suena a ngiepachiypa a suepa pakha kawlieta Khazing vuocung ming ama palung a tluo,’ a ta.

Saacapaa Viepa Pakhingpuonabie

11Zingsuv ta a ri kaliepa ca, “Luokha ca saacapaa pahning a hnyipapaa a za aw. 12A syi viepapaa ta a paa kha, ‘I paa, i hmung riypata a cuopa ru ca na pi tie,’ a ta. Cacuonakaw a paa ta ru ca a che yi. 13Cakhutaa ning a ru hluo ta saacapaa a syi viepa ca a hnyipa bangkhuo kha la te khy luohlaa luo kha a tlaw. A duv a khing ta hring te a hnyipa bangkhuo ca a pahli diy. 14A hnyipa bangkhuo a hmuo diy khu taata capa ruo lieca khuopuv ta cakuo tlung te a kuv cahri pata a aw. 15Cacuonakawta capa khy ming pakha'a luo kha re hrie riypata vaa te, ama paa cata va mangchiy riypata a lu luo kha a paphya. 16Va ta a ningpa khukhuhaw kha a riybina te ta a ning khingsa raalaa pata ahungtahmuo pi vayi. 17A palung kya sing te, ‘I paa rehrietuv tie kha ning tie li tamuo ama hnyi ta, kama tlaku ca hinglie hing i maasa'a nang! 18Thu'a ang te na i paa luo kha si'a ang te, ‘I Paa, Khazing cunglie hne nama cunglie ta i sue tli. 19Na saacapaa cuo riypata a tla va tli ang; na rehrietuv pakha haata na chi ra thi tie, i ta aa,’ a ta. 20Cacuonakaw thu te a paa luo kha a si. Luohlaapuv lie a aw kalie pata a paa ta a va hmung ca, a palung tluo hringhruo te, vaa ruo te, cakuv te a pahnuo. 21A saacapaapa ta, ‘I Paa, Khazing cunglie hne nama cunglie ta i sue tli. Na saacapaa cuo riypata a tla va tli ang,’#15:21 Hluo vie caa-uv lieca naa hluo chawpa na changtaapa pakha haata na tue tie, a ta chiy a ta. 22Cuorasala a paa ta a sii zaw kha u yite, ‘A catli pata a vaw ung! Pang phacepa kha vya cyi ungla pabuv ung. A kuvdaw lie hing kuvpahryi vya pahryi ungla, a phyi lie hing phyipakaw vya pakaw tie ung. 23Cakhutaata, cuetaata a thucepa kha patuv ungla thie tie ung, ning ung sala a nuo ung siy; 24tahematapakieca, i saacapaa hing za thiy te a hring pakhaa; za vie te i hmung pakhaa,’ a ta. Cahaa cata pyi tue ca ama patha.

25A saacapaa uvthyipa kha lu taata vya si te ing a thaa luo a vya chiy tiyta, hlaa sa pu hne luo pu kha a thyi. 26Cacuonakawta a siipaapa pakha kha u te, ‘Khaapa ma a cuo nguoluo?’ ta te a hiehriy. 27Ama ta, ‘Na nuta kha ing luo vya kaa tena, hnaatluosapa hne a bangta tah a vya chiy nakawta, na paa ta cuetaata a thucepa kha a thiepa,’ a ta. 28Saacapaa uvthyipa ca a hi haa te ingchung luo a ngie khing li pata a aw. A paa ta kya pya te a ripasa. 29Cuorasala a paa kha, ‘Mang tie, hing zaw kungnung na re kha sii haata hrie ang te, na ri caa ngie li pata aw buo va ang. Cuorasala i viesaa zaw hne a nuona pyi tue riypata mie taata sakha hmuo na pi buo vaciy! 30Cuorasala siyhrawnung tie'a lieta na hnyipa bangkhuo a pachuo diypa, hingpa na saacapaapa ing luo a vya kaa tiyta cuetaata a thucepa na thiepa!’ tapata a palie. 31A paa ta, ‘I saacapaa, nama ca kama'a lie aw pari cate i hnyipa bangkhuo hing nama huopa tana a cuo. 32Cuorasala na nuta ca za thiy te ata hing a hring pakhaa; za vie te ata hing hmung pakhaa pata a cuo; cacuonakawta pyi tue pata palungtluona hne maa nuo riypa hrahring na a cuo, a ta,’ a ta.

Currently Selected:

Luka 15: LNT1

Highlight

Copy