Johan 9

Puvkhyi Ming Cuepa A Patluo Sa

1Zingsuv ca a cakuole nguoluopa khata a mingcue pata zaa puvpapaa kha a hmung. 2A ziytuv tie ta, “Rabbi, ahung suena kawlie ma mingcue pata a za puv? Ama suena kawlie ma, a nung hne a paa suena kawlie ma?” ama ta. 3Zingsuv ta, “Ama suena kawlie zaw cuo vyi, a nung hne paa suena kawlie zaw cuo vyi. Khazing hmang tue khuna aa luona riypatana mingcue pata a za puvpa hing a cuo. 4Ningchung a cuo chung hingta naa#9:4 Hluo vie caa-uv lieca malie a pathlietuv a ta. pathlietuv re ca ma hrie a hu; ahungtahmuo re ama hrie khu lina zuo cuo ca a vaw nguoluo tli. 5Chuelyi lie i aw chung hing ca, kama hingna chuelyi khena ta a cuo ang,” a ta yi. 6Cahaa cata a ri khu taata, Zingsuv ta a lyi kha a paciy ta pacha te a cyi kha a tue khu taata cawsaapapaa ming lie kha thuv te, 7“Cakuo la Siloam Tiy-ang lie kha na hmie vaa siy tie,” a ta. (Siloam tana siyluo ca pathlie tana ta a cuo). Cacuonakaw vaa te a hmie ca vaa siy te a ming ca vuo te a vya kaa. 8A ingpaa tie hne sa a hiele tawpa zaa hmung tawpa tie khata, “Hingpapaa hing a tu te sa a hie tawpa kha cuo va ma?” ama ta. 9A che ta, “A cuo,” ama ta, a che ta, “Cuo vyi, ama hne aa lupa pakha tana a cuo,” ama ta. Cacuonakawta ama ta, “Kama na a cuo ang,” a ta yi. 10Cuorasala Iema ta, “Tuokhaatama na hmung pakhaa?” ta yite ama hiehriy. 11Ama ta, “Zingsuv ama tapapaa ta acyi tue te, i ming lie na thuv te, Siloam luo kha vaa la na hmie vaa siy tie, ina ta. Vaa ang te i hmie i siy pahne ta i ming a hmung,” a ta yi. 12Iema ta, “Capapaa ca khaapaliema a aw,” ama ta. Ama ta, “Pachang va ang,” a ta yi.

Farasi Tie Ta A Tluonapa Kaw Ama Hiehriy Paruv

13Iema ta a ming zaa cuepapaa kha Farasi tie'a luo ama vaa khyi. 14Zingsuv ta acyi tue te a ming a patluo sa ning kha Sabbath ning ta a cuo. 15Cacuonakawta Farasi tie ta cawsaapapaa a ming a hmung pakhaana kaw ca ama hiehriy pakhaa. Ama paa cata, “I ming lie acyi ina thuv, i hmie a siy ang te ata hing i hmung tli,” a ta yi. 16Farasi chekha tie ta, “Hingpapaa hing Khazing'a taata cuo vyi, tahematapakieca Sabbath kha a uv vyi,” ama ta. Cuorasala, a hrangpa tie ta, “Tuokhaatama a suepa ta hinghaapa kharuehaa hmang hing a tue khu aa?” ama ta ra. Cacuonakawta amaa che. 17Cacuonakawta mingcuepapaa kha hiehriy pakhaa yite, “Na ming caa pahmung sa pakhaapapaa ca tuokhaatama na rue?” ama ta. Ama ta, “Profet tana a cuo,” a ta.

18Judah ming ta ama ca a ming za cue te ata hing a hmung khu pakhaa tapa kha zang vayi. Cacuonakawta cawsaapapaa a nung hne a paa kha ku yite, 19“Ama hing nama saacapaapa, a ming cuepa tana a za puv nama tapa ca a cuo ma? Tuokhaatama a hmung khu pakhaa?” ama ta. 20A nung hne a paa ta, “Ama hing ma saacapaa a cuopa ma pachang, a ming cuepa ta a za puvpa zaw ma pachang. 21Cuorasala tuokhaatama ata hing a hmung pakhaa tapa hne, ahungma a patluo sa tapa kha pachang va puv. Ama hing hiehriy tie ung, uvthyi ra tli te ama ta aca palie'a yi,” ama ta. 22A nung hne a paa ta cahaa cata ama tapa ca Judah ming kha ama ciy nakawta a cuo; iema ta ahunghmuota Zingsuv hing Messiah#9:22 Or Khrih tana a cuo tapata i zang a tapa ca apungna-ing taata papyapa cuose tapata naatlana ama za hnyi pacie tlipa a cuo. 23Cacuonakawta, a nung hne a paa ta, uvthyi ra tli te ama kha hiehriy tie ung,” ama tapa kha a cuo.

24Cacuonakawta a ming zaa cuepapaa ca a yihningnapa ku pakhaa yite, “Khazing kha pathuosa tie! Ama cawsaapapaa hing a suepa a cuopa kha ma pachang,” ama ta. 25Ama ta, “A suepa a cuo hne a cuo li pachang va ang. I pachang tangepa suokha ca: I ming a za cue, ata hing i hmung,” a ta. 26Iema ta, “Tuokhaatama aca tue? Na ming hing tuokhaatama aca patluo sa?” ama ta. 27Ama ta, “Ca chang tli raalaa yi ang te naathlie va ungciy. Khaapanakawma nama thyi khing pakhaa? A ziytuv cuo khing ra kanaa ungciy?” a ta yi. 28Iema ta, esepuo pata “Nama hingna ama a ziytuv ta a cuo ciy, kiema ca Moses a ziytuv tana ma cuo,” ama ta. 29Khazing ta Moses'a lie bie a ripa kha ma pachang; cadyiseca hingpapaa hingca khaapa taatama aa vaw tapa hmuo pachang va puv,” ama ta. 30Cawsaapapaa ta, “Nang-uopa tana a cuo de! Niema ta khaapa taama a vaw tapa nama pachang va, cuorasala ama ta i ming ina patluo sa! 31Khazing ta a suepa bie ca naa thlie vyi tapa kha ma pachang; ama abiepa hne ama khingna a ziypa kha a bie naa a thliepa. 32Mingcue pata a puvpa na pakhakha ta a ming a pahmung sa pakhaa tapa hing chuelyi hruothu baataata thyi buo va puv. 33Hingpapaa hing Khazing'a taata a zuvpa a cuo li kieca khaahmuo tue khu'a vyi,” a ta. 34Iema ta, “Suena chunglie puv cate suena chunglie a lepa ma pacuv malie a ting ciy?” ta yite apungna-ing chung taata ama papya.

Thlaapa Mingcuena

35Zingsuv ta ama papyapa kha a thyi khu taata cawsaapapaa kha a taw te, “Cawsaa Saacapaa#9:35 Hluo vie caa-uv lieca Khazing Saacapaa a ta. hing na zang ma?” a ta. 36Cawsaapapaa ta, “Abyipa, ama ca i zang khu riypata ahungma tapa kha na chang tie,” a ta. 37Zingsuv ta, “Ama ca hmung tli cate, nama hne bie a ri nguoluopa hingna a cuo,” a ta. 38Cawsaapapaa ta, “Abyipa! ica zang ta te aa bie. 39Zingsuv ta, “Hing chuelyi luo i zuv pahing mingcuepa tie ta hmung'a yite a hmungpa tie kha mingcue pata amaa li riypata bie ripa riypatana a cuo,” a ta. 40A thaalie a awpa Farasi tie chekha ta a ripa kha thyi yite, “Kiema hing mingcuepa ma cuo ma?” ama ta. 41Zingsuv ta, “Mingcuepa cuo ungla ca suena hnyi'a va ungciy; cuorasala ma hmung thluo ne nama ta nakaw hingtana nama suena ca aa hmang,” a ta yi.

Currently Selected:

Johan 9: LNT1

Highlight

Copy