Johan 17

Zingsuv Ta Ziytuv Tie Cuota Thlaa A Chuo

1Zingsuv ta capa bie a ri khu taata vuoruo luo kha mang te, “I Paa, a cuo ca a vya pha tli; na Saacapaa ta rungnaana aca pi the riypata, na Saacapaa hing rungnaana pi tie. 2Nama ta na pipa cawsaa zaw bangkhuo kha chuozaa hringna pi riypata nawhnyina kha na pi tli. 3Chuozaa hringna tapa ca nama dyi aa hmuopa Khazing na cuopa pachangna hne na pathliepa Zingsuv Khrih pachangna kha a cuo. 4Hrie riypata ina pipa ciy re patlung tli ang te hing chuelyi lie na ming ica pa rungnaa sa mangtli. 5Cacuonakawta, I Paa, chuelyi sa hluo ta namaa lie i za hnyipa rungnaana kha ata na minghmungna lie hing na pi thi tie.

6“Chuelyi taata ku yi cate ina pipa tie cunglie na ming kha i paluo sa tli. Na huopa ta cuo yite nama ta kama kha ina pi ciy; na bie kha ziy yite 7kama ina pipa bangkhuo cakha nama'a taatana a cuo tapa kha ama pachang. 8Ina pipa ciy na bie kha chang yi ang te iema ta ama cuhluo. Nama'a taata a vawpa i cuopa kha pachang hmisi yite nama pathliepa i cuopa zaw kha ama zang. 9Iema cuota thlaa i chuo; chuelyi cuota thlaa chuo va ang, cuorasala na huopa ta a cuopa ina pipa tie cuo khata thlaa i chuo. 10Kama huopa bangkhuo hing nama huopa ta cuo yite iema chung taahingta i rungnaana aa luo. 11Cakhutaata, ata hing kama ca chuelyi lie aw'a va tli ang, nama'a luo i vaw'a tli; cuorasala iema ca chuelyi lie ama aw kalie aa. A pathepa i Paa, nama hne kama ca pangkha ima cuopa haata pangkha ama cuo the ra riypata, ina pipa tie yi cahing na ming cahrana ta mangchiy thi tie yi. 12Iema'a lie i aw ning hing ca, ina pipa tie ca hingna na ming cahrana ta mangchiy yi ang te a phasa pata i chi yi. Kama ta i mangchiy yi, Caapathepa a tlingna riypata, vie riypa hrahring ta lieriyuopuopa paa ri li pata pakha hmuo vie vayi. 13Ata hing kama ca nama'a luo i vaw'a mangtli; chuelyi lie i aw ningta hingpa bie i ripa hing i palungtluona kha ama chunglie tluotlingsa pata ama hnyina riypata a cuo. 14Na bie kha chang yi ang te chuelyi ta iema ca a hue yi, tahematapakieca kama ca chuelyi huopa i cuo lipa haakhata iema zaw chuelyi huopa ama cuo li nakawta a cuo. 15Iema hing chuelyi taata la riypata ica hiepa cuo vyi, cuorasala cawsaa pha lipapaa'a taata naa daakhuole riypa yi tana ica hie. 16Kama hing chuelyi huopa i cuo li pahaata iema zaw chuelyi huopa cuo ra vayi. 17Iema hing biehmisipa ta pathe sa tie yi. Na bie ca biehmisipa ta a cuo. 18Nama ta chuelyi luo ina pathliepa haa cata kama ta chuelyi luo i pathlie ra yi. 19Iema zaw biehmisipa lie pathe sapa ama cuo riypata kama zaw i pathe sa.

20“Iema cuo dyi hingta thlaa i chuopa cuo vyi, cuorasala iema ama ripa bie thueta kama naa zangpa tie cuo zaw ta thlaa i chuo. Ama bangkhuo ta pangkha ama cuo the riypata thlaa i chuo. 21I Paa, chuelyi ming ta kama ca nama pathliepa i cuopa kha ama zang the riypata nama ca kama chunglie aw cate kama ca nama chunglie i awpa haata iema zaw kiema chunglie ama aw riypata thlaa i chuo. 22Kiema pangkha ma cuopa haata iema zaw pangkha ama cuo riypata rungnaana ina pipa cakha i pi yi. 23Chuelyi ta kama ca nama pathliepa cuo ang te kama ina duepa haa cata iema zaw na duepa yi kha ama pachang riypa hne iema zaw pangkha ama cuokaruv riypata kama ca iema chunglie aw ang te nama ca kama chunglie na awpa a cuo. 24“I Paa, ina pipa tie yi cahing ina pipa ciy i rungnaana ama hmungna riypata kama i awna lie aw ra yi sala tapata i khing, tahematapakieca kama kha chuelyi sa hluo taata ina due tli ciy.

25Aa dangpa i Paa, chuelyi taca ca pachang vyi, cuorasala kama taca ca pachang ang te hingpa tie hingta ina pathliepa cakha ama pachang. 26Nama ta ina duenapa ciy duena kha iema chunglie aw'a te kama kha iema chunglie i aw riypata na ming ca iema kha pachang sa tli yi ang te i pachang sa kalie'a yi,” a ta.

Currently Selected:

Johan 17: LNT1

Highlight

Copy