Lucuotuv 16

Paul Hne Silas'a Luo Timote A vaa Hlaw Yi

1Paul ca Derbe khy hne Listra khy luo kha a va chiy. Capa lieca Khrihsaa a cuopa, a ming Timote ama tapa kha a aw. A nung ca Judah ming, zangtuv pakha ta cuote, cuorasala a paa ca Grik ming ta a cuo. 2Listra hne Ikonium lie a awpa zangtuv tie#16:2 Gk Uvnu zaw ta ama ca a thuophaa ama risapa ta a cuo. 3Paul ta Timote ca aa chiyle khing nakawta a vangdaw a pate sa, tahematapakieca a paa Grik ming a cuopa kha capa lie a awpa Judah ming khata ama pachang. 4Khykha hnang khykha ta ama tlawle pa khata, Jerusalem lie a awpa lucuotuv tie hne khrihsaa uvthyi tie ta ama za chi ciepa phung kha ziy riypata iema kha ama changle. 5Cacuonakawta khrihsaabuv ca zangna lie kya cahra vie hryly yite ning kha hnang ning kha mingluv zaw ama hluv hryly.

Paul Ta Muocuo A Hmung

6Asia ruo chunglie kha Thlaapa Pathe ta thuophaabie ri riypata a pa-aw li nakawyita Frizia ruo hne Galatia ruo chung kha khy ama tlaw. 7Misia ruoriy ama pha pa khata Bithinia ruo chung luo kha a ngie amaa ting. Cuorasala Zingsuv Thlaapa ta pa-aw vayi. 8Cacuonakawta Troas luo kha ama sibung. 9Zuo ta Paul ca muocuo a hmung: Masidonia cawsaa pakha a daa te ama kha “Masidonia luo a vaw la malie a vya bya tie,” a ta. 10Paul ta muocuo a hmung khu taata Masidonia luo si riypa kha maa pachie paluo, tahematapakieca Khazing na iema'a luo thuophaabie phu riypata malie a ku tapa kha ma pachangpasie.

Lidia Palung A Thlena

11Troas taata tiypalaw ta a tha pate Samothrasia luo kha a dangsa pata ma si. A mawluopa ta Neapolis luo ma chiy. 12Ama taacata Rom uvna ruo chung, Masidonia pe#16:12 Hluo vie caa-uv hrangpa lieca pekhanapa khypuv a ta. chunglie ta khypuv ta a cuopa Filipi khy luo ma chiy. Capa khy lieca ningcuo syipuv ma aw. 13Sabbath ning ca khychung taakhata pya pate cavaa kie luo ma cakuo. Capa lieca thlaachuona hmang a aw thlu'a tapata ma rue. A tu pate capa lie a hmyapa canung zaw hne cata bie ma ri. 14Lidia ama ta nung, Khazing abiepa pakha ca ma bie kha naa a thlie ra. Ama ca Thiatira khy ming ta cuote caw sedungpa a zaanung ta a cuo. Paul ta a ripa bie kha hmisi ta naathlie riypata Abyipa ta a pathiypalung a pahaw nung tana a cuo. 15Ama hne a ingchungkhue tie tiy amaa naw khu taata, Lidia ta, “Abyipa a zang hrahring tapata ina ruepa ung cata a cuo kieca, a vaw ungla i ing luo kha a vya pahy tie ung,” tapata kiema kha paa malie a kie.

Filipi Thaw-ing Lie Paul Hne Silas

16Ningkha ca thlaachuona hmang luo ma vaa pata hmie luo kaw a ri khupa thlaapa a hryipa siicanung nung hneta maa taw. Hmie luo kaw a rilu khunapa khata a ziybyi tie kha tuokaa a hluvsa a hmungpa yi. 17Paul hne kiema malie a vya ziypuole pata, “Hing cawsaa zaw hing Cungnungce Khazing sii, khuona thuophaabie niema'a luo#16:17 Hluo vie caa-uv hrangpa lieca kiema'a luo a ta. a phutuv tie tana ama cuo,” a ta. 18Ning hluvpuv cahaa cata a ta. Cuorasala Paul ca a hihaasa pata thlaapa kha a pali hnue te, “Hingpa nung chung taahingta pya riypatana bie ica pi,” a ta. A ta khupa tahne ta thlaapa ca a pya.

19Ama a hnyituvpa tie ta ma tuokaa hmungnapa na a ra tli tapa kha ama hmung tiyta Paul hne Silas kha patuv yite chadawtluo luo, nawhnyituv tie hmiekung luo kha amaa dale. 20Bieripatuv byi zaw hmiekung luo kha chiykhyi yite, “Hing cawsaa zaw hing Judah ming ta cuo yite, ma khypuv chunglie hnaahnawnapa a chiykhyituv tana ama cuo, 21kiema Rom ming ta maa paw khu li riypa hne ma ziy khu li riypa, phung kha ri yite a daakhyipa tana ama cuo,” ama ta. 22Cawsaazaapuv ca Paul hne Silas a duna kuo luo khata ama aw diy. Bie ripatuv byi tie khata ama caw thlie pata asung ta tuv riypata naw ama pi. 23Khuopuv ta ama tuv khu taata, thaw pathla yite, thaw-ing byipa kha a phata tah pahuo sa riypata naw ama pi. 24Naw ama pipa haakhata thaw-ing aa thuvcena khuo chunglie kha chi yite ama phyi kha akyi ama de.

25Zuocang hraw khiy taca Paul hne Silas ca thlaachuona hne hlaasana ta Khazing kha pathuosa yite thaw a tlapa tie ta naa ama thlie. 26Sungkhapuv ta aling khuosa ta a siy te thaw-ing ca a thabaw te ta a cahang; thlaluo-aw bangkhuo a pahaw te thaw a tlapa tie thaabuoliriy bangkhuo kha ama kuv taata aa pathluo diy. 27Thaw-ing byipa ca a kya cha te thaw-ing thlaluo-aw bangkhuo aa pahawpa kha a hmung tiyta thaw a tlapa tie na a ruo diy tli yi tapata a rue nakawta a zueziy kha a da te ama hne ama kha a thie a nang. 28Cuorasala Paul kha khuopuv ta khi te, “Nama hne nama kha ruvnaana a pi kha, ma bangkhuo ta ma aw diy tli hing,” a ta. 29Thaw-ing byipa cata, myi vya cyi ungla ta yite, thaw-ing chung luo kha a ruo te, a cathangsapuo pata Paul hne Silas phyi thabaw lie kha a vaa bu. 30Cakhutaata ale luo pyakhyi yite, “I byipaa zaw, khuona hmung riypata khaapama i tue aa? a ta yi. 31Iema ta, “Abyipa Zingsuv kha zang la nama hne na ingchungkhue hneta khuona na hmung aa,” ama ta. 32Abyipa bie#16:32 Hluo vie caa-uv hrangpa lieca Khazing bie a ta. ca ama hne a ing chunglie a awpa bangkhuo kha ama chang. 33Capa zuopa cata ama hmaa kha pasiypa yite cakhutaata ama hne a ingchungkhue bangkhuo ta tiy amaa naw paluo. 34Iema kha ing luo a chiy yite sa a pi yi. Ama ta Khazing kha a zang nakawta ama hne a ingchungkhue bangkhuo ta ama palung a tluo hringhruo.

35A mawluopa ta bieripatuv byi tie khata paliy tie kha vya pathlie yite, “Khapa cawsaa tie kha za pathlie yi se,” ama ta. 36Canakaw cata thaw-ing byipa ta Paul kha chang te, “Bieripatuv byi tie na niema kha pathlie riypata bie naa vya taa yi, cacuonakawta kya pya ungla diena hne cakuo tie ung,” a ta yi. 37Cuorasala Paul ta palie te, “Kiema Rom cawsaa a cuopa kha bie ripa li pata zaapuv hmielie asung ta malie tuv yite thaw malie ama pathla. Cakhutaata ata ca a paruv ta pathlie malie amaa nang. Cahaa cata cuo the'a vyi! Iema hrahring a vaw yi sala malie vya papya yi se,” a ta. 38Paliy tie ta capa bie ca bieripatuv byi tie kha va chang yite, Rom ming tana ma cuo e ama tapa kha ama thyi tiyta ama thlaa a zang. 39Cacuonakawta a vaw yite paa ama vya kie. Thaw-ing taakhata papya yite ama khypuv kha pya se riypata ama chang. 40Caacuonakawta thaw-ing taakhata pya yite Lydia ing luo kha ama vaa. Capa lie ca uvnu sieta zaw#16:40 Gk Uvnu zaw hneta a taw yite thaazuo ama pi khu taata capa khy taacata ama pya.

Currently Selected:

Lucuotuv 16: LNT1

Highlight

Copy