Lucuotuv 12

Jeim Kha Thie Yite Piter Thaw Ama Pathla

1Capa cuo hrawning ca Siepahruo Herod ta khrihsaa ming chekha kha a hrisaathierue yi. 2Johan uvnu Jeim kha zueziy ta a pathie sa yi. 3Hingpa hing ta Judah ming palung a patluo sa yi tapa kha a hmung tiyta Piter zaw kha patuv aa nang. Hing hmang hing thiynung phuv lipa viechuo pyi cuo ningta a cuo. 4A patuv khu taata thaw pathla te phuvkha lie rieka papaliy a awpa rieka phuvpaliy kha rie a pave sa yi. Lawsena pyi khu taata cawsaazaapuv hmielie a bie ripa riypata aa tingpa a cuo. 5Cacuonakawta Piter ca thaw chunglie aw te cadyiseca khrihsaabuv ta ama cuota Khazing'a luo kha khuopuv ta thlaa ama chuo.

Piter Thaw-ing Chung Taata Hya A Zang

6Herod ta mawluo zaapuv hmielie bie i ripa aa a ta ningpa zuo ta Piter ca thaabuoliriy suohning ta ciy yite rieka pahning a lala lie kha a zie. Thaw ing chiypakaa zaw kha ama huo. 7Sungkha ta Abyipa avuoming pakha a luo te thaw-ing chunglie ca khena ta a ka. Avuoming ta Piter ca a ke lie kha cabe te, “A catli pata thu!” ta te a pahra. A kuv taata thaabuoliriy ca a pathluo te a tla. 8Avuoming cata, “Na tesaw kha a saw la na phyipakaw kha a pakaw tie,” a ta. Piter ta a changpa haa cata a tue. Cakhutaa avuoming ta, “Na pang kha a buv la na ziy,” a ta. 9Piter ta thaw-ing le luo kha ziyle te cadyiseca avuoming ta a tuepa hing a cuo sasawpa a cuo ma tapa kha a nang vuo vyi; muocuo na i hmung tapata a rue. 10Rie a vepa tie ama huonapa thaw ingchiypakaa suokhanapa hne suohningnapa law yite khychung luo pyanapa thaathlakelepa luo ama chiy. Thaathlake ca ama ta tah a pahaw te ale luo pya yite luopuv lie ama cakuole pata avuoming ta a thuse.

11Piter ca a palung kya vuo te, “Ata hing ca i pasie tli, Abyipa ta a avuoming kha za pathlie te Herod kuv chung taa hne Judah ming bangkhuo amaa mangkhuopa taata ina khuo tli,” a ta.

12A kya pachangpasie pahne ta a ming hrangpa ta Marka ama tapa Johan a nung Mary ing luo kha a vaa. 13Piter ta ingle luo ingchiypakaa kha a cakhaw ca a changtaapa nung Roda ama ta nung ta a kya chaw. 14Piter ueryi tapa kha a pachang nakawta a palung tluotuv te ingchiy pahaw cuo pata ing chung luo kha a ruo te Piter na ingchiypakaa lie a daa thluo e,” tapata a pathyi yi. 15Iema ta, “Ngaa tli kanaa ca maw?” ama ta. Cuorasala a cuo hrahring ne, a ta ngiethie nakawta, “Aa vuoming muo a cuo'a lie,” ama ta. 16Capa chung bangkhuo ca Piter ca ingchiy kha a cakhaw byalya; ingchiy kya pahaw yite ama hmung ca ama nang ta a uo thluo. 17Piter ta a dieta tah aw riypata a kuv pazuu te Khazing ta tuokhaatama thaw-ing taata a papya sa tapa kha a chang khu taayita, “Hingpa kaw hing Jeim hne zangtuv tie#12:17 Gk Uvnu zaw kha chang mya ung,” a ta yi. Cakhutaa pya te a hrang luo a cakuo se yi.

18Maw khy a dyi tiyta rieka tie ca Piter khaapama a cuo tapa kawlie kha amaa taw amaa hrie patlaw ciemuo. 19Herod ta pahuv sa yite ama hmung khu li taata thaw-ing rievetuv tie kha bie hiehriyna a tue khu taayita thie riypata bie a pi yi. Cakhutaata ama ca Judea ruo taakhata Sisaria luo si te cuo pachangta chung a aw.

Herod Thiyna

20Herod ca Tair ming hne Sidon ming cunglie kha a hi a haa. Cacuonakaw ta iema ca a phuv ta vya chiy yite siepahruo ing uvtuv byi Blastas kha amaa ku khu taata siepahruo kha a rena tue riypata amaa nue. Tahematapakieca ama ruo lie sa ning riypa kha siepahruopa ruo taata a vawpa a cuo nakawta a cuo.

21Ama thli ciepa ningkhue a vya chiy tiyta Herod ca a siepahruo cawsie kha a tue te siepahruo thude lie a tu te cawsaazaapuv'a lie kha bie a ri. 22Cawsaa zaw cata, “khazing ueryi tana a cuo, cawsaa ueryi ta cuo vyi,” ama ta. 23Herod ca rungnaana kha Khazing a pi li nakawta Abyipa avuoming ta sungkha ta tuv te alungpa ta ce yite a thiy.

24Cuorasala Khazing bie ca lethaw te aa ze hryly. 25Barnabas hne Saul ca ama re ama patlung khu taata, Jerusalem luo kha kaa yite a ming hrang ta Marka ama tapa Johan kha amaa chiyle.

Currently Selected:

Lucuotuv 12: LNT1

Highlight

Copy