ZACARÍAS 9
9
Ladolla llactacunataca, ninandami llaquichinga
1Mandaj Dios llaquichinata villashca shimicunaca, Hadrac shuti llactata, Damasco shuti pueblota llaquichinatami villajun. Cai pachapi tucui causajcunapash, tucui Israel aillucunapash, Mandaj Diostami chapariana. 2Hamat shuti pueblopash, Israel llactahuan tandachi tucushcami canga. Tiro shuti, Sidón shuti pueblocunapi causajcunaca, ninandapacha yachajushca cashpapash, llaquichi tucungami. 3Alipajmi Tiro shuti pueblopi causajcunaca, shinlli torreta ruranajurca. Culquitapash ñutu alpatashna, orotapash ñambi sirij turutashnami mundunarca. 4Ricui, paicunataca Jatun Diosmi imatapash na charijcunata ruranga. Paicuna ashtaca charishcacunataca, mama cuchapimi chingachinga. Chai pueblotaca, ninami tucuchinga.
5Chaita ricushpaca, Ascalón shuti pueblopi causajcunapash, Gaza shuti pueblopi causajcunapash ninandapachami llaquirinajunga. Ecrón pueblopi causajcunapash, paicuna shuyanajushca panda ricurijpimi, chashnallata llaquirinajunga. Shinallata shuti Gaza pueblota jatun mandajpashmi huañunga. Ascalón shuti pueblopica, pipash na causangachu. 6Asdod shuti pueblopica, shuj llactamanda shamuj runami causanga. Chaipimi, jariyashca filisteocunatapash tucuchisha. 7Paicuna micunajushca yahuartapash, shimimandami quichusha. Shinallata millanayai micunatapash ña acunajujtami quichusha. Huaquin puchushca gentecunaca, ñucanchi Taita Diospajmi canga. Paicunami, Judá llactapica, soldadocunata mandajcunashna canga. Ecrón shuti pueblopi causajcunapash, jebuseocunashnami canga. 8“Shinamandami ñuca huasi muyundipica, pipash ama richun, pipash ama shamuchun, cuidaj runashna carpata shayachishpa cuidajusha. Shina cuidajpimi paicunata llaquichij runaca, na ashtahuan yaicunga. Cunanga, ñuca ñavihuambacha ricujujpimi, na yaicui ushanga”.
Sion pueblopi causajcunapaj jatun mandaj shamunatami villajun
9Sion pueblopi causajcunalla, ninanda cushijuichiyari. Jerusalenbi causajcunalla, cushijushpa caparichiyari. Ricuichi, cangunata jatun mandajca, cangunapajman shamungami. Paica, imatapash cashcatapacha ruraj, quishpichij, ali shunguta charijmi canga. Paica, burropi tiarishcami shamunga, aparij burropaj huahua, maltun burropimi paica tiarishpa shamunga. 10Efraín llactapaj carretacunataca, Jerusalenbi causajcunapaj caballocunandimi tucuchisha. Macanajuna arcocunapashmi faquiringa. Llactacunapi causajcunamanmi, casilla ali causaita villajunga. Paica, caishuj lado mama cuchamandaca, chaishuj lado mama cuchacamanmi mandajunga. Jatun yacumanda callarishpaca, cai pacha maipi tucuringacamanmi mandajunga.
11“Cangunahuan ari nishcamanda, cushca yahuarhuanmi quishpiringuichi. Cangunapajmanda prezu apai tucushcacunataca, yacuta tandachingapaj rurashca, yacu illaj jatun utujumandami llujchircani. 12Prezu apai tucushcamanda tigramunata shuyajujcunalla, pacajuna shinlli torreman tigraichiyari. Cangunataca, chaupi yalihuanmi alichisha nishpami, cunambash villajuni. 13Judá llactapi causajcunataca, arcotashnami ñucapajlla alichircani. Efraín aillutaca, chai arcopi churashpa cacharina flechatashnami rurarcani. Sion pueblopi causajcunalla, cangunataca rijchachishami. Cangunapaj churicunataca, Grecia shuti llactapi causajcunata llaquichingapaj, ninan shinlli runapaj espadatashnami rurasha” ninmi.
14Mandaj Diosmi, paicunapaj vichaipi ricuringa. Paipaj flechapash, punchapambata shitamujunshnami llujshinga. Mandaj Jatun Diosmi, trompetata huacachinga. Paica, urai lado jatun acapana chaupipimi puringa. 15Paicunataca, tucuita Mandaj Diosmi ayudanga. Paicunami fiñajcunataca, micunshna tucuchinajunga. Huaracahuan shitashca rumicunatapashmi sarunajunga. Ufiashpapash, vinota ufiashpa machashcashnami, ninanda caparinajunga. Paicunaca, jatun tastapi yahuarta jundachishcashna, na cashpaca cachucunapi jundachishcashnami canga.
16Chai punllapica, paicunata Mandaj Diosmi, pai agllashca gentecunataca llamacunatashna quishpichinga. Paipaj llactapica, umapi churajuna diadema nishcapi churashca juyailla rumicunashnami jatunyachi tucunajunga. 17¡Paicunapaj juyaica ashtacamari! ¡Paicunaca, ninan juyaillagumari! Trigoca chairalla viñaicunata, vinoca jarihuan nara tacarishca cuitsacunatami cushichinga.
Currently Selected:
ZACARÍAS 9: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
