ZACARÍAS 8
8
Jerusalendaca, cutinmi alichisha nishcami
1Tucuita Mandaj Diosca, cai shimicunatami cashna nishpa villahuarca: 2“Tucuita Mandaj Diosca, cashnami nin: ‘Sionbi causajcunataca, ñucapajlla cachunmi munarcani. Ñucapajlla cachun munashcamandami, ninandapacha fiñashpapash, paicunataca ninanda juyarcani’ ninmi” nishpami villahuarca. 3Mandaj Diosca, cashnatapashmi nin: “Siondaca, ñucami cutin alichircani. Shinamandami, Jerusalén chaupipi causasha. Jerusalenga: ‘Na llullaj Pueblo’ shutimi canga. Tucuita Mandaj Diospajlla Sion urcuca: ‘Jucha illaj Urcu’ shutimi canga” ninmi. 4Tucuita Mandaj Diosca, cashnatapashmi nin: “Jerusalén ñangunapica, rucugucunapash, payagucunapash tucuicunallata taunahuan purinajungarami. Paicunaca, unai huatacunata causashcamandami chashna purinajunga. 5Shinallata chai pueblo ñangunapica, jari huahuacunapash, huarmi huahuacunapash, chai ñan jundami pugllanajunga” ninmi. 6Tucuita Mandaj Diosca, cashnatapashmi nin: “Chai punllacunapica, huaquin puchushca cai gentecunapaj ñavipica, juyaillagumi chaicunaca ricuringa. Shina ricurishca cashpalla, ñuca ñavipipash ¿juyaillaguchu ricuringa?” ninmi tucuita Mandaj Diosca. 7Tucuita Mandaj Diosca, cashnatapashmi nin: “Ricuichi, ñuca agllashcacunataca, indi llujshimuj lado llactamandapash, indi huashajuj lado llactamandapash, ñucami quishpichisha. 8Shina quishpichishpami, Jerusalén chaupipi causanajuchun pushamusha. Shinami paicunaca, ñuca agllashca gentecuna canga. Ñucapash paicunapaca, na llullaj, imatapash cashcatapacha ruraj Taita Diosmi casha” ninmi.
9Tucuita Mandaj Diosca, cashnatapashmi nin: “Cangunapaj maquipash, ashtahuan shinlli tucuichi. Tucuita Mandaj Dios ñucapaj huasita shayachingapaj ucuman callari rumita churai callarishca punllamandapachami, ñuca ima nishcata villajcuna cai shimicunata villashcataca, cunan punllacunacaman uyanajunguichi. 10Punda punllacunapica, runacuna imatalla rurashcamanda, animalcuna imatalla rurashcamanda japinaca, imapash na tiarcachu. Fiñajcuna tiashcamandami llujshishpa rijcunapajpash, cutin tigramujcunapajpash, casilla ali causaica na tiarca. Ñucami, tucuicunatallata cangunapaj cumba purallata llaquichirinajuchun saquircani. 11Ashtahuangarin cunanga, huaquin puchushca cai gentecunataca, yalishca punda punllacunapishnaca na llaquichishachu. Tucuita Mandaj Dios ñucami, chashna nini. 12Ashtahuangarin paicunapaca, ali casilla causaimi tarpushcashna tianga. Uvaspash ashtacatami fucunga, alpacunapipash ashtaca granocunami fucunga. Jahua pachapash, paramutami cachamunga. Chai tucui alicunataca, huaquin puchushca cai gentecuna japichunmi carasha. 13Cashnapashmi tucunga: Judá llactapi causajcunalla, israelcunalla. Cangunaca, imashnami shuj llactacunapi causajcunahuan nalicachi tucushca causarcanguichi, chashnallatami chai llaquimandaca quishpichisha. Shina rurajpimi, bendiciai tucushcapacha canguichi. Na manllashpa, ashtahuangarin cangunapaj maquipash ashtahuan shinlli tucuichi” ninmi.
14Tucuita Mandaj Diosca, cashnatapashmi nin: “Cangunapaj ñaupa taitacuna ñucata ninanda fiñachijpi, llaquichinata yarijushcashnallatami cangunatapash rurasha. Chaita yarijushcamandaca, na llaquirircanichu. Tucuita Mandaj Dios ñucami, shina nini. 15Ashtahuangarin cunan punllacunapica, Jerusalenbi causajcunamambash, Judá llactapi causajcunamambash, alita ruranatami yarircani. Shina cashcamanda, na manllanachu canguichi. 16Cangunaca, caicunatami rurana canguichi: Caishujmanda, chaishujmanda na llullashpami parlana canguichi. Tandanajuna pungucunapica, ima llaquita alichina cashpapash chashna cashcatapacha ricushpami, casilla ali causaiman pushangapaj, aliguta alichina canguichi. 17Canguna purapica shuj runaguta llaquichinataca, maijanllapash cangunapaj shungupi na yarinachu canguichi. Llullashpa juramentunatapash, na juyanachu canguichi. Ñucaca, tucui chaicunatami fiñani” ninmi Mandaj Diosca.
18Tucuita Mandaj Diosca, cai shimicunatami cashna nishpa villahuarca: 19“Tucuita Mandaj Dios ñucaca, cashnami nini: ‘Judá llactapi causajcunapaca, chuscu quilla, picha quilla, canchis quilla, chunga quilla chayajpi na micunaca, jatun micuita rurashpa cushijuna punllacunami tucunga. Jatun fiestata rurashpa, micuna punllacunami tucunga. Shina cashcamanda imatapash cashcatapacha ruranata, casilla aliguta causanata juyashpa causaichi’ ninimi” nishpami villahuarca.
20Tucuita Mandaj Diosca, cashnatapashmi nin: “Ashtaca pueblocunapi causaj gentecunapash shamunajungarami. 21Shuj pueblocunapi causajcunaca, caishuj pueblopi causajcunapajman shamushpami, cashna ninajunga: ‘Ñucanchihuan ali cachun, Mandaj Diosta jacuchi, mañashunchi. Jacuchi, tucuita Mandaj Diosta mascashunchi’ ninajungami. Shina nijpimi caishujcunaca: ‘Ñucapash, cangunahuanmi ringapaj munapani’ ninajunga. 22Shina nishpami ashtaca gentecunapash, ninan ushaita charij llactacunapi causajcunapash tucuita Mandaj Diostaca, Jerusalenbi mascangapaj shamunajunga. Mandaj Diostaca, alita rurapai nishpa mañangapajmi shamunajunga” ninmi. 23Tucuita Mandaj Diosca, cashnatapashmi nin: “Chai punllacunapica, cashnami tucunga: Shuj llactacunamanda shuj shuj rimaita rimaj chunga runacunami, Judá llactamanda runapaj jahualla churajushcapi charirishpa, cashna ninajunga: ‘Ñucanchipashmi, cangunahuan ringapaj munapanchi. Taita Diosca, cangunahuan cajtami yachapanchi’ ninajungami” ninmi.
Currently Selected:
ZACARÍAS 8: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
