PROVERBIOS 30
30
Agur shuti runa rimashca shimicunami
1Jaqué shuti runapaj churi Agur shuti runa rimashca shimicunami. Chai runaca, Dios villashcatami Itiel shuti runaman villashca. Itiel shuti, Ucal shuti runacunamanmi, cashna nishpa villajurca:
2Ñucaca, tucuicunata yali juizu illajmi
cani, runacunapaj ali yuyaitaca na charinichu.
3Ali yachaitapash, na yachajurcanichu.
Jucha illaj Diosmanda yachajunatapash na rijsinichu.
4¿Pita jahua pachaman rishpa, cutin uriajumushcayari?
¿Pita huairata japishpa, maqui
ucupi chari ushangayari?
¿Pita yacuta japishpa shuj baitapi huatashcayari?
¿Pita tucui cai alpa maicamanlla canatapash,
shinllitapacha churashcayari?
¿Paica ima shutitayari?
¿Paipaj churijpaj shutitapash rijsinguichu?
5Mandaj Dios rimashca shimicunaca, jucha illajmi.
Diosca, paita shuyajcunapaca, jarcarina escudoshnami.
6Canda jarcashpa ama rimachunga,
Dios rimashca shimicunataca ama mirachinguichu.
Pactarallapash canra llulla ricuringuiman.
7Taita Dioslla, ishcaigutallami mañashcani.
Chaitaca ñuca causajujpillata,
na mitsashpa carahuayari:
8Imapash yangacunata, llulla shimicunataca
ñucamanda anchuchihuayari.
Shinallata imagutapash na charij canatapash,
ninan charij canatapash ama cuhuaichu.
Micungapaj pactanagutalla carahuayari.
9Na ushajta micushpara, canda cungashpa:
“¿Mandaj Diosca pitayari?” nijupaiman.
Na cashpaca, imagutapash na charishpara shuhuashpa,
ñuca Taita Diospaj shutigutara, nali shimicunata rimapaiman.
10Servij runataca, ama juchachishpa
paipaj amoman villanguichu.
Pactarallapash ima llaquipash japishpachari ali
canman nijpira, llaquita apanguiman.
11Paicunapaj taitatallata ima llaquipash japishpachari
ali canman nishpa nalicachinajuj miraicunapash tianmi.
Paicunaca, paipaj mamatapash na alicachinllu.
12Mapa illajcunami canchi nishpa causanajuj
miraicunapash tianmi.
Paicunapaj juchata nara maillarishca cashpapash,
chashna ninllami.
13Jariyashpa, shujcunata fiña ñavihuan ricushpa,
ñavi alsashca purinajuj miraicunapash tianmi.
14Pungu quirupipash espadatashna, juchu quirupipash
cuchillotashna charij miraicunapash tianmi.
Paicunaca, llactapi causaj, imagutapash na charij
runacunata, runa purapi imagupash illajcunata
langanshna tucuchingapajmi, chashna causanajun.
15Sanguijuela nishca juruca na sajsashpa:
“¡Carahuaira, carahuaira!” nishpa
mañajujlla, ishcai ushicunatami charin.
Shinallata ima horapash napacha vijsa
pactajcunaca, quimsami tian.
Ima horallapash: “¡Chaillata!” ninata na
yachajhuangarin, chuscumi tian.
16Paicunaca: Seolmi, huahuata na tarij huarmimi,
mashnata tamiajpipash chaquijujlla alpami.
Ninaca rupajushpapash, ima horallapash
napacha: “¡Chaillata!” ninllu.
17Taitata na cazushpa ricuj churica,
mama yachachishcatapash yangapimi churan.
Chai ñavitaca, huaicu yacu ladopi causaj
angacuna surcushpa saquichun.
Paitaca, jatun angacunapaj huahuacuna micuchun.
18Ñucapaca, quimsami na ricunalla tiajun.
Chuscutacarin, napacha yachai ushanichu:
19Huairapi jatun anga purijushcatapash,
jaca rumi patacunapi culebra purijushcatapash,
mama cucha chaupipi jatun barco huambujushcatapash,
jarihuan nara tacarishca cuitsapi jari
tacarishcatapash, na yachai ushanichu.
20Cazarashca jahua shujcunahuan causaj huarmica,
cashnami ruran: Micushpalla shimita ficharishpaca:
“Ima nalitapash na rurashcanichu” nijunmi.
21Quimsamandami cai pachapi causajcunaca,
ninanda caparinajun.
Chuscupicarin, paicunapaca llaquita na apai ushanallami:
22Servij runara llactata mandajujpipash,
shinlli shungu runara na ushajta micupipashmi,
chashna caparinajun.
23Tucuicuna na ricunayachishca huarmi
cazarajpipash, servishpa causaj huarmica,
paita mandaj huarmi tucui charishcata
quichujpipashmi, chashna caparinajun.
24Cai pachapica, chuscu uchilla animalcunami tian.
Chaicunaca, ninan alipacha yachajushca
runacunatapash yali yachajushcacunami:
25Añangucunaca, na shinllicuna cashpapash,
rupai punllacunapimi micunata tandachinajun.
26Conejocunaca, na shinllicuna cashpapash,
jatun rumi ucucunapimi huasichishpa causanajun.
27Langostacunaca, jatun mandajta na charishpapash,
tucuicunami tandanajushpa llujshinajun.
28Maquihuan llapinalla arañacunapash,
jatun mandaj mandana ucupimi tianajun.
29Aliguta purijcunaca quimsami tian.
Chuscucarin, juyaillagutami purin:
30Tucui animal purapica, leonmi ashtahuan shinlli.
Paica imata ricushpapash, na huashaman tigranllu.
31Chumbilirishcashna animalpash, jari chivopash,
pipash na jariyai ushanalla jatun mandajpashmi tian.
32Shinlli shungu runashna jariyangapaj
yarijushca cashpa, na cashpaca pitapash
llaquichingapaj yarijushca cashpaca,
shimipi maquita churashpa jarcaringui.
33Lecheta maijambash ninanda cuyuchishpaca, leche
viratapachami llujchinga.
Singata shinlli jacurishpaca, yahuartami llujchinga.
Pitapash ninanda fiñachishpaca, fiñanajuipimi churanga.
Currently Selected:
PROVERBIOS 30: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
