FILIPENSES 2

Cristoca na jariyashpa causashpami, jatumbi churai tucushca

1Cristopi cangunapaj cushijui tiajpi, juyaimanda cushui tiajpi, Diospaj Espiritupash cangunahuan cajpi, tucui shunguhuan juyarina tiajpi, shujcunata llaquina yuyai tiajpica, 2ñucatami cushichihuanguichi. Shujlla cashcata yarishpa, chai juyaitallata charishpa, shujllashnapacha yuyai tucushpami, chashna cushichihuanguichi. 3Randimanda fiñanajungapajlla, na cashpaca yanga jariyangapajllapash, na imatapash ruranachu canguichi. Ashtahuangarin paimi ñucatapash yali ashtahuan ali yashpami, na jariyashpa tucuicunatallata alicachina canguichi. 4Maijan cashpapash quiquimbajlla ali cachunga, na yarinachu canguichi. Ashtahuangarin shujcunapajpash ali cachunmi, tucuicunallata yarina canguichi.

5Cristo Jesús yarishpa causashcashnallatami, cangunapash yarishpa causana canguichi. 6Taita Diosman rijchaj cashpapash, paica Taita Dioshuan chimbapurapachami cani, chaitaca na saquishachu nishpaca na causarcachu. 7Ashtahuangarin Cristoca, imata charishcatapash tucuillata saquishpami, servij tucushpa, runaman rijchajpacha tucushpa shamurca. 8Pai runapacha tucushpaca, ashtahuan yangallagu tucushpami causajurca. Diosta cazuj cashpami, pinganayaita cruzpi chacatashpa huañuchi tucuna cashpapash, huañuchi tucurcalla. 9Shina cajpimi Taita Diosca, tucuita yali ashtahuan alicachishpa, paitaca jatumbi churarca. Shinallata tucuicunapaj shuticunata yali ashtahuan ali shutigutami cararca. 10Chaimandami, Jesuspaj shutita uyashpaca, jahua pachapi tiajcunapash, cai pachapi tiajcunapash, alpa ucupi tiajcunapash, tucui ima tiashcapash cunguringa. 11Taita Diosca punchapambagumari cangui ni tucuchunmi, tucuicunapaj shimihuambacha Jesucristotaca, Mandajmari cangui ninajunga.

Crijcunaca, cai pachata punchayachij luzerocunashnami

12Huauquicuna, panicuna, cangunahuan cajpica ñucataca aligutami cazurcanguichi. Na cangunahuan cajpilla cazunachu canguichi, ashtahuangarin cunambi na cangunahuan cajpipash, ashtahuanmi ñucataca cazuna canguichi. Quishpirinamandaca, manllaihuan chujchuihuan rurashpami causana canguichi. 13Canguna aliguta ruranata yarichumbash, imagutapash Taita Diosmi caramujun. Chaita pactachishpa causachumbash, paillatami pai munashcashna cangunaman ushaita caramujun.

14Tucui imata rurashpapash, nalicachishpa parlashpa, fiñanajushpa rimarishpaca, na ruranachu canguichi. 15Taita Diospaj huahuacuna cashcamandaca, na juchachi tucushpa, na jariyashpa, ima mapapash illajmi causana canguichi. Shina causashpami, cai pachapi causanajuj, jatun nali miraicunapaj chaupipica, punchayachij luzerogushna causanguichi. 16Causaita caraj Shimitaca, villanami canguichi. Shina villanajujpimi, Cristo tigramui punllapica, ñucapash na yanga causashpa, na yanga villajushcata ricushpa ninandapacha cushijusha. 17Ñuca servishpa causajpi canguna crishcamandami, Diosman carashpa rupachinshna ñucataca, yahuarta llujchishpa huañuchihuanga. Huañunata yachashpapash, cangunahuanga tucuicunahuanmi, ninandapacha cushijuni. 18Shinallata cangunapash, ñucahuan ninandapacha cushijunguichi.

Timoteomandapash, Epafrodito shuti runamandapashmi villajun

19Apunchi Jesús munajpica, Timoteotaca cangunapajman ucha cachamusha yajunimi. Canguna aliguta causanajujta ricushpa tigramushpa villajpimi, ñucapash cushijuita japisha. 20Cangunapaj ali cachunmi, Timoteopash cangunataca ñucashnallata tucui shunguhuan yariajun. Paishnaca, pipash na tianllu. 21Tucuicunami, quiquimbajlla ali cachun mascanajun, Jesucristopaj ali canataca na mascanajunllu. 22Ashtahuangarin Timoteotaca, aliguta rurashpa causajtaca ñami yachanguichi. Ali villaita ñuca villajujpica, taitahuan churi imagutapash rurashpa purijunshnami, paipash ñucahuan villajurca. 23Shina cajpimi, ñucata imata ruranatapash ali ricushpaca, Timoteota cangunapajman cachamusha yajuni. 24Ashtahuangarin ñucapacha cangunata ricungapaj ucha rishcaiman yashpami, Apunchi Jesustalla ninanda yariajuni.

25Ashtahuangarin Epafrodito shuti huauquitaca, cachanapacha cajpimi cachamugrini. Ñucahuan cumba tucushpami, paica maipipash na manllashpa villajun. Paitaca, ñucata ayudashpa imagutapash rurashpa carachunmi cachamurcanguichi. 26Paica, tucuilla cangunata ricungapaj ringapaca, ninandapachami munajurca. Shinallata pai huañujushcata canguna yachashcamandapash, paica ninandapachami llaquirirca. 27Paica, ungushcapacha cashpami, ña huañunallapacha carca. Ashtahuangarin ama jahuan jahuan llaquita ñuca apajuchunmi, Taita Diosca paitapash, ñucatapash llaquihuashca. 28Shina cajpimi, cutin paita ricushpa cushijuchun, ñucapash ama cashna llaquilla tiajungapaj, cangunata ricuchun ucha cachamungapaj munajuni. 29Paica, Apunchi Jesusta alipacha crijmi. Paitaca, tucui shunguhuan cushijushpa mingachipanguichi ninimi. Paishnalla ali crijcunataca, ninanda alicachipanguichi. 30Cristopajta rurajushpami, paica ashagumandalla na huañuparca. Paipaj causaitapash na llaquishpami, canguna carupi causashpa, ñucata na servi ushashcata paica rurajurca.

Currently Selected:

FILIPENSES 2: QUII

Highlight

Copy