NAHUM 1
1
Taita Dios fiñarishpa llaquichinatami villajun
1Nínive shuti pueblota Dios llaquichinatami villashca. Elcos shuti pueblomanda Nahum shuti runa, muscuipishna ricushcata escribishca libromi.
2Mandaj Diosca, paipajlla cachun munaj Taita Diosmi. Imashna llaquichishcashnallata llaquichij Diosmi. Mandaj Diosca, imashna llaquichishcashnallata llaquichij, ninanda fiñarij Diosmi. Paita na ricunayachijcunatapash, imashna llaquichishcashnallata randi llaquichin. Pai fiñarishcataca, paita fiñajcunamanmi alichin. 3Mandaj Diosca na ñapash fiñarij, ninan ushaita charij Diosmi. Nalita ruraj runataca, ima nalitapash na rurajtashnaca na ricungachu. Mandaj Diosca ninan huairahuan tamiapi, jatun acapanapimi purin. Fuyupash, pai purina ñutu alpashnami. 4Paica, mama cucha yacutapash rimashpami chaquichin. Chaimandami jatun yacucunapash, tucuilla chaquin. Basán shuti llactapash, Carmelo shuti, Líbano shuti urcucunapi tiaj sisacunapashmi tucuchi tucurca. 5Paipaj ñaupajpica, urcucunapash chujchunmi, lomacunapash yacuyanmi. Pai ricurijpica, alpapash manllarinmi. Cai pachapash, paipi causajcunapash tucuillami manllarin. 6Pai fiñarishcapaj ñaupajpica, ¿pita shayajungallayari? Nina japirinshna pai fiñarishcapaj ñaupajpica, ¿pita shayarishpa quedai ushangayari? Pai ninanda fiñarishcapash, rupajuj ninashnami talirijun. Chaihuanmi, jatun jaca rumicunapash chaupirin. 7Mandaj Diosca alimi. Paica, ninan llaqui punllapipash shinlli torreshnami. Paitalla yariashpa causajcunataca rijsinmi. 8Ashtahuangarin paita na ricunayachijcunataca, manllanayai yacuta jundachimunshnami tucuchinga. Paita fiñajcunataca, yana yana tutami catiriashpa llaquichinga. 9¿Cangunaca, imata yarishpata Mandaj Diostaca fiñanguichi? Paica tucuchingami. Paita fiñajcunataca, na ishcai viajeta llaquichingachu. 10Huatarishpa viñashca cashacunashna cashpapash, ninandapacha machashcacuna cashpapash, alipacha chaquishca fangashnami tucuchi tucunga.
11Canmandami, Mandaj Diosta fiñashpa nalita yarij runaca llujshirca. Paica, jatun nali yuyaita cuj runami. 12Chaimandami Mandaj Diosca, cashna nin: “Paicunaca, casilla ali causaita charishpapash, ashtaca ashtacacuna cashpapash, anchuchi tucungami. Paicunaca chingangami. Candaca, ninandapachami ña llaquichircani, na ashtahuan llaquichishachu. 13Cunanga, paicuna huatashca cambaj jahuapi yugotapash faquishpami, canda huatashca yugo caracunatapash fitisha” ninmi.
14Ashtahuangarin Mandaj Diosca, canmandaca cambaj shutita yarinallapash ama tiachunmi mandanga. “Cambaj diospaj huasipi tiajuj labrashpa rurashca diostapash, yacuyachishpa rurashca diostapash tucuchishami. Cambash imapajpash na valij tucushcamandami, canda pambana utujutapash chaipillata churasha” ninmi.
Nínive shuti pueblota llaquichinatami villashca
15Ricuichi, casilla ali causaimanda ali villaita villajmari, jahua urcucunata shamujun. Judá llactalla, canga fiestacunata rurailla. Can imagutapash Diosman carasha nishcataca pactachilla. Chai nalita ruraj runaca, cutinga na ashtahuan llaquichingachu, paica ñami chingaita chingarca.
Currently Selected:
NAHUM 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
