MATEO 9
9
Na cuyuri ushajuj runagutami, Jesusca alichishca
(Mar. 2:1-12; Luc. 5:17-26)
1Chai jipallami Jesusca, canoapi tiarishpa, pai causajushca puebloman cuchata chimbarca. 2Chaiman chayajpimi, cashna tucurca: Na cuyuri ushajuj runatami, camapi sirijujta apamunajurca. Paicunataca, tucui shunguhuan crishpa shamunajujta Jesús ricushpami, chai na cuyuri ushajuj runataca cashna nirca:
—Ñuca huahualla, cunanga shinlli tucuilla. Cambaj juchacunataca, ñami anchuchishca— nircami.
3Shina nijpimi, mandashca shimita yachachij puramanda huaquingunaca, paicunapaj shungu ucupilla cashna ninajurca: “Cai runaca, Diostami nali shimicunata rimajun” ninajurcami. 4Chashna yarinajujta Jesús yachashpami, paicunataca cashna nirca:
—¿Imashpata cangunapaj shungupica, chashna nalitara yarinajunguichi? 5Cai runagutaca: ‘Cambaj juchacunataca, ñami anchuchishca’ ¿ninachu ali? Na cashpaca: ‘Jatarishpa rilla’ ¿ninachu ashtahuan ali canga? 6Runa Aichayu tucushca ñucataca, juchacunata anchuchi ushachunmi, Diosca cai pachaman cachamuhuarca. Chaitaca cunanmi, cangunaman ricuchisha— nishpami, chai na cuyuri ushajuj runagutaca:
—Cunanga jatari, cambaj jatanata apashpa, huasiman rilla— nirca.
7Shina nijpimi chai runaguca, jatarishpa huasiman rirca. 8Shina ali tucujta ricushpami, gentecunaca ninanda manllarirca. Gentecunaman ninan ushaita caraj Taita Diostaca, punchapambagumi cangui ninajurcami.
Mateo shuti runatami, Jesús cayashca
(Mar. 2:13-17; Luc. 5:27-32)
9Jesusca, chaimanda rijushpami, Mateo shuti runaguta ricurca. Paica, impuestota japina huasipimi tiajurca. Paitami Jesusca:
—Ñucata catihuai— nirca.
Shina nijpica, jatarishpa catishpa rircallami.
10Chai jipami, cashna tucurca: Jesusca, Mateopaj huasipi mezapi micungapaj tiajujpimi, impuestota japishpa causanajuj ashtaca runacunapash, juchayu gentecunapash shamushca carca. Chai shamushcacunami Jesushuan, paipaj yachajujcunahuan tandanajushpa, mezapi micungapaj tiarinajurca. 11Shina tianajujta fariseocuna ricushpami, Jesuspaj yachajujcunataca cashna ninajurca:
—¿Imashpata cangunata Yachachijca, impuestota japishpa causajcunahuan, juchayu runacunahuan micushpa tiajun?— ninajurcami.
12Chashna ninajujta Jesús uyashpami, paicunataca cashna nirca:
—Nanaita na charijcunaca, jambij runataca na mascanllu. Huañujujcunallami jambij runataca mascan. 13“Shuj gentecunata llaquishpa causachunmi munani. Animalcunata huañuchishpa ñucaman carachunga, napacha munanichu” nishpa, escribishcapi ima nijujta yachajungapaj richi. Imatapash cashcatapacha rurajcunata cayangapaca, na shamurcanichu. Ashtahuangarin juchayu gentecuna ninanda llaquirishpa, Diospajman tigrarichun cayangapajmi shamurcani— nijurcami.
Na micushpa, Diosta mañanamandami tapushca
(Mar. 2:18-22; Luc. 5:33-39)
14Chai jipallami, Bautizaj Juanbaj yachajujcunaca, Jesuspajman shamushpa, cashna tapunajurca:
—Ñucanchipash, fariseocunapash, tauca punllacunatami na micushpa paita mañashpa chishanchi. Cambaj yachajujcunaca, ¿imashpata micushpa chishan?— ninajurcami.
15Shina nijpimi Jesusca, cashna nijurca:
—¿Boda huasipica, cazarajuj noviohuan tianajushpaca, llaquilla chishai ushanllu? Shina cajpipash cusata apana punllacunaca chayamungami. Chai punllacunami na micushpa chishanajunga.
16Mauca churajuna liquirishcataca, mushuj telahuanga pipash na siranllu. Shina sirajpica, mauca churajunataca mushuj tela aisashpami, ashtahuan liquin. 17Shinallata chaira rurashca vinotaca, mauca cara muchilapica na churanllu. Chashna churajpica, chaira rurashca vinoca muchilata liquishpa jicharishpami, muchilandi tucurin. Shinamandami chaira rurashca vinotaca, mushuj cara muchilapi churana. Shina churajpica vinondi, muchilandi ali tiajunllami— nijurcami.
Jairo shuti runapaj ushimandapash, Jesuspaj jahualla churajushcapi tacarishca huarmimandapashmi villajun
(Mar. 5:21-43; Luc. 8:40-56)
18Shina villajujpimi, shuj mandaj runaca, Jesuspajman shamushpa cungurishpa cashna nirca:
—Ñuca ushigumi, chairalla huañupan. Paipaj uma jahuapi, cambaj maquiguta churangapaj ripashunyari. Shina churajpica causaripangami— nircami.
19Shina nijpimi jatarishpa Jesusca, paipaj yachajujcunandi, chai runaguta catishpa rinajurca. 20Shina rijujpimi, huashata catimushpa shuj huarmica, Jesús jahualla churajushca pundapi tacarirca. Paica, chunga ishcai huatata yahuar shamujujpi, huañujujlla causajuj huarmimi carca. 21Chai huarmica, paipaj shungupica cashnami yajurca: “Jesuspaj churajushcapi tacarishpalla, ali tucushallami” yajurcami. 22Chai huarmita tigrarishpa ricushpami, Jesusca cashna nirca:
—Ñuca huahualla, cushijuita japilla. Canga, ñuca alichi ushanata tucui shunguhuan crishpami, ña ali tucushcangui— nircami.
Shina nijpimi, chai huarmica ali tucurca.
23Chai mandaj runapaj huasiman Jesús chayashpaca, gaitata huacachinajujta, gentecuna ninanda caparishpa huacanajujtami ricurca. 24Chai gentecunataca:
—Caimanda llujshipaichi. Cai cuitsaguca, na huañushcachu. Puñuitallami puñujun— nircami.
Shina nijpimi Jesustaca, asishpa ricunajurca. 25Chai gentecunata tucuilla llujchishca jipaca, Jesusca ucuman yaicushpami, chai cuitsagutaca maquimanda japirca. Shina japijhuanmi, chai cuitsaguca jatarirca. 26Chaita rurashcataca, tucui chai llactapimi uyanajurca.
Ishcaipura ñausa runacunatami, Jesusca alichishca
27Jesús chaimanda llujshishpa rijujpica, ishcaipura ñausa runacunami caparishpa, cashna nishpa catimunajurca:
—¡Davidpaj Churi, ñucanchitaca llaquihuayari!— ninajurcami.
28Huasiman Jesús chayajpica, ishcandi ñausa runacunami, paipaj ladoman quimirirca. Paicunatami Jesusca:
—¿Cangunata ñuca alichinata crishpachu shamunguichi?— nirca.
Shina nijpimi:
—Ari cripanchimi, Apunchi Jesús— ninajurca.
29Shina nijpimi:
—Canguna crishcashna, ali tucuichi ninimi— nishpami Jesusca, paicunapaj ñavipi tacarirca.
30Shina tacarijpimi, paicunapaj ñavica pascarirca. Paicunatami:
—Ricuichi, caitaca pipash na yachanachu— nishpa, Jesusca shinllita rimarca.
31Ashtahuangarin paicuna ña rishpaca, Jesús alichishcataca, caipi chaipimi chai tucui llactapica villanajurca.
Na rimai ushaj runatami, Jesusca alichishca
32Chai runacuna ña llujshinajujpicca, aya jundashca cashpa na rimai ushajuj runagutami, Jesuspajman apamunajurca. 33Chai na rimai ushaj runaguca, ayata Jesús llujchijhuanmi, rimai callarirca. Chaita gentecuna ricushpaca, ninanda manllarishpami cashna ninajurca:
—Israel llactapica, cashnapacha rurajtaca, ima horapash na ricushcachu canchi— ninajurca.
34Ashtahuangarin fariseocunaca, cashnami ninajurca:
—Cai runaca, ayacunata mandajpaj ushaihuanmi, ayacunataca llujchishpa cachan— ninajurcami.
Granocunata tandachinaca ashtacami
35Jesusca, tucui pueblocunapi uchilla llactacunapi purijushpami, tandanajuna huasicunaman yaicushpa yachachijurca. Dios mandajuj ali villaitapashmi villajurca. Shinallata tucui nanaihuan, tucui ung:uihuan huañujuj gentecunatapashmi, chai llactapica alichijurca. 36Chai gentecunataca, michij illaj, jichushca llamacunashna causanajujta ricushpami Jesusca, paicunata ninanda llaquirca. 37Shina llaquishpami Jesusca, paipaj yachajujcunata cashna nirca:
—Granota tandachinaca, ashtaca ashtacami. Ashtahuangarin tandachijcunaca huaquingullami. 38Shinamandami granocunata tandachijcunata cachamuchunga, granocunapaj Dueñota ninanda mañana canguichi— nijurcami.
Currently Selected:
MATEO 9: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.