MATEO 18

¿Maijanshi ashtahuan yali ali canchi? ninajushcami

(Mar. 9:33-37; Luc. 9:46-48)

1Chai punllacunapimi paipaj yachajujcunaca, Jesuspajman quimirishpa cashna ninajurca:

—¿Maijanshi jahua pachamanda Dios mandajpi causaj puracunapica, ashtahuan yali alicachi tucunajushun?— ninajurcami.

2Shina nijpimi Jesusca, shuj huahuata cayashpa, paicunapaj chaupipi shayachishpa, 3cashna nijurca:

—Na llullashpami, cangunataca cashna nini: Huahuacunashnalla yarishpa causangapaj na tigrashpaca, jahua pachapi Dios mandajuj llactaguman yaicuitaca, napacha ushangachu. 4Maijambash cai huahuagushna, ali shunguhuambacha causashpami, jahua pachapi Dios mandajuj llactagupica, ninanda alicachi tucujunga. 5Maijambash ñuca shutipi cai huahuatashna chasquishpaca, ñucatami chasquihuan.

Juchapi urmanaca, jatun llaquimi

(Mar. 9:42-48; Luc. 17:1-2)

6Maijambash cai uchillagucunashna ñucata crishpa catinajujta, nitijanshna pandachij runataca, molino jatun rumita cungapi huatashpa, mama cuchapi ucu ucuman huashajuchun shitashpachari, ashtahuan ali canman. 7Gentecunata pandachingapaca, imapash nalicunallami cai pachapica, ashtaca tian. Chaicunaca, ¡aij imachari tucunajunga! Chashna pandachijca tianapachamari. Shina cajpipash juchata rurachun pandachij runaca, ¡aij imachari tucunga!

8Shinamandami cambaj maqui cashpa, chaqui cashpapash, imatapash nalita rurachingapaj munajpica, muchushpa shitana cangui. Chashna shujlla maquihuan, shujlla chaquihuan causaita causangapaj rinami, cambaca ashtahuan ali. Ashtahuangarin ucu pachapi na huañushpa rupajuj ninaman ishcandi maquihuan, ishcandi chaquihuan shitai tucunaca, napacha alichu. 9Shinallata cambaj ñavi, imatapash nalita ricushpa rurachingapaj munajpica, surcushpa shitangui. Chashna shujlla ñavihuan causaita causangapaj rinami, cambaca ashtahuan ali. Ashtahuangarin ucu pachapi rupajuj ninaman ishcandi ñavihuan shitai tucunaca, napacha alichu.

Chingashca llamaguhuan chimbapurashpami parlashca

(Luc. 15:3-7)

10Cai uchillagucunatara, maijandapash na ricunayanllu ninguichiman. Cangunataca, cashnami nini: Paicunata cuidaj angelcunaca, jahua pachapimi tianajun. Chai angelcunami, jahua pachapi tiajuj ñuca Taitapaj ñavitaca ricushpa, causaita causaicaman tianajun. 11Runa Aichayu tucushca ñucami, chingashca causajcunataca quishpichingapaj shamurcani.

12Cangunaca, ¿imata yanguichiman? Patsaj llamata shuj runa charijpi, shuj llamagu chingajpica, ¿nacha iscun chunga iscun llamacunata chai urcupi saquishpa, chai chingashca llamagutara mascangapaj rinman? 13Na llullashpami, cangunataca cashna nini: Chai chingashca llamaguta tarishpaca, chai na chingashca, iscun chunga iscun llamamandapash yalimi chai llamaguta tarishcamanda, ninanda cushijunman. 14Shinallatami jahua pachapi tiajuj cangunapaj Taitaca, cai uchillagushna puramandaca, shujllapash chingagrichunga na munan.

Crijpura imashna ali tucunatami yachachijun

(Luc. 17:3)

15Maijan crijpash, canda fiñashpa juchata rurajpica, paipajman rishpami ñavi ñavi jarcashpa rimana cangui. Canda cazushpa uyajpica, cambaj huauquishna purichunmi crichishcangui. 16Ashtahuangarin canda na cazungapaj munajpica, shujta cashpa ishcaita cashpapash pushashpami, cutin rina cangui. Ishcai cashpa, quimsa cashpapash, paicunami imata uyashcatapash, tucuita aliguta villajunajunga. 17Paicunatapash na cazungapaj munajpica, tandanajuj crijcunamanmi villana cangui. Tandanajuj crijcunatapash na cazujpica, na Israel runatashna, impuestota japishpa causaj runatashna ricungui.

18Na llullashpami, cangunataca cashna nini: Cai pachapi tucui imatapash huatashcashna saquijpica, jahua pachapipash huatashcashnami canga. Shinallata cai pachapi tucui imatapash cacharijpica, jahua pachapipash cacharishcami canga.

19Cashnatapashmi nini: Shujllashnalla yarishpa, imagutapash Taita Diosta canguna puramanda ishcaipura tucushpa cai pachapi mañajpica, jahua pachapi tiajuj ñuca Taitami caranga. 20Shinallata maipimi ñuca shutipi ishcai cashpa, na cashpaca quimsa cashpapash tandanajujpica, ñucaca paicunapaj chaupipimi cani— nijurcami.

21Shina nijpi quimirishpami, Pedroca cashna nirca:

—Apunchi Jesús, maijan huauqui cashpapash, ñucata fiñashpa juchata rurajpica, ¿mashnacamanda perdonasha? ¿Canchiscaman perdonanaca alichu, imata?— nishpami tapurca.

22Shina tapujpimi Jesusca, cashna nijurca:

—Canchiscamanlla perdonaitaca, na ninichu. Ashtahuangarin canchis chunga canchistapash yalishpami perdonana cangui ninimi.

Culquita divi tucushca ishcai runacunamandami parlashca

23Jahua pachapi Dios mandajujca, shuj llactata jatun mandaj mandajunshnami. Chai mandajca: ‘Ñuca imata charishcatapash, ¿imatata rurarcanguichi?’ nishpami, paipaj servijcunataca tapuchirca. 24Tapuchi callarijpica, sucta huaranga pusaj patsaj quintal culquita na tigrachishpa purij runatami, jatun mandajpaj ñaupajman apamunajurca. 25Chai runagutaca na tigrachi ushajpimi, divimanda japingapaca: ‘Paipaj huarmindi, huahuacunandi, imata charishcatapash tucuilla jatugrichi’ nishpa mandarca. 26Shina nijpimi, jatun mandajpaj ñaupajpica cungurishpa: ‘Culquigutaca, tucuillagutamari tigrachipasha. Ashaguta shuyapai, amo taitalla’ nishpami mañarca. 27Shina nijpica, ninanda llaquishpami: ‘Chai culquitaca, ama tigrachishpa saquinguilla’ nishpa chai amoca, chai servijtaca yanga cacharirca. 28Shina cacharijpi chai servij runa rijushpaca, paiman patsaj denario nishca culquita na tigrachishpa purij cumba runatami tuparirca. Chai runagutaca, cungapi llapishpami: ‘Ñuca culquita tigrachihuai’ nijurca. 29Shina nijpi, paipaj ñaupajpi chai runagu cungurishpami: ‘Culquigutaca, tucuillaguta tigrachishamari. Ashaguta shuyapai’ nishpa mañajurca. 30Ashtahuangarin shina mañajpipash, paica na shuyashpami chai runagutaca, prezuna huasipi churachirca. Divishca culquita tigrachingacamanmi, shina churachirca. 31Chashna llaquichijujta caishuj servijcuna ricushpaca, ninandami llaquirirca. Paicunami, chashna rurashcataca, paicunata mandajman villangapaj rinajurca. 32Shina villajpimi chai amoca, chai runata cayachun cachashpa cashna nirca: ‘Canga, jatun nali runami cashcangui. Can ñucaman cunata charishcata cungapaca, ashaguta shuyapai nishpa mañajpica, saquinguilla nishpami candaca cacharircani. 33¿Nachu cambash, cambaj cumbataca chashnallata llaquina carcangui? Candaca llaquishpami, ñucaca yanga cacharircani’ nircami. 34Shina nishpami, chai mandajca ninanda fiñarishpa, culquita tucuilla cungacaman, macachun macaj runacunaman cugrichi nishpa, chai runataca cacharca.

35Maijan crijpash, cangunata imatapash nalita rurajpi, na tucui shunguhuan perdonajpica, chashnallatami jahua pachapi tiajuj ñuca Taitapash, cangunataca llaquichinga— nijurcami.

Currently Selected:

MATEO 18: QUII

Highlight

Copy