MATEO 14

Bautizaj Juanda huañuchishcatami villajun

(Mar. 6:14-29; Luc. 9:7-9)

1Chai punllacunapica quimsapaj cati mandaj Herodesmi, Galilea llactataca mandajurca. Paimi, Jesús imata rurashpa purijujta uyashpaca, 2paita servijcunataca, cashna nirca: “Paica, Bautizaj Juanmari canga. Huañushcacunapaj chaupimandami causarishcanga. Shina cashpami paica, cashna ruraicunata rurangapaj, ushaita charinga” nircami.

3Paimi, Juandaca cadenahuan huatashpa, prezuna huasipi churachun mandashca carca. Herodías shuti huarmimi, chashna rurachun munarca. Chai huarmica, Herodespaj huauqui Felipepaj huarmimi cashca carca. 4Juanga cashnami nijurca: “Cambaj huauquipaj huarmihuan causanaca, mandashcapi nijunshnaca, napacha alichu” nijurcallami.

5Shina nishcamandami Herodesca, Juanda huañuchingapaj munarca. Ashtahuangarin: “Juandaca, Profeta runami” nishpa gentecuna alicachijpimi, Herodesca gentecunata manllashpa, na huañuchi usharca. 6Herodespaj huacharishca huata chayashca cajpimi, fiestata rurajurca. Herodías shuti huarmipaj ushica, tucuicunapaj ñaupajpi danzajujpimi, Herodesca ninanda ricunayachirca. 7Shinamandami:

—Can imata mañajpipash, tucuitami carasha— nishpa, chai cuitsaman Herodesca juramenturca.

8Shina nijpimi:

—Bautizaj Juanbaj umata caipillata, shuj platopi carahuai— nishpa, paipaj mama yachachishcashnallata Herodesta mañarca.

9Shina mañajpimi, jatun mandaj Herodesca llaquirirca. Ashtahuangarin paihuan mezapi tianajujcunapash uyajta juramentushca cashpami, cuchun mandashpa cacharca. 10Shina cachashpami, prezuna huasipi, Juanbaj umata muchugrichun mandarca.

11Juanbaj umata platopi apamushpami, chai cuitsaman cunajurca. Chai cuitsaca, paipaj mamamanmi curca.

12Chai jipami, paipaj yachajujcuna chayagrishpa, Juanbaj cuerpogutaca apashpa pambarca. Chai jipami, Jesusman villangapaj rinajurca.

Jesusca, picha huaranga runacunamanmi micuchun carashca

(Mar. 6:30-44; Luc. 9:10-17; Juan 6:1-14)

13Shina uyashpami canoapi tiarishpa, gentecuna na causaj, jichushca pambaman ringapaj Jesusca, pailla cuchata chimbarca. Chashna rishcata uyashpami, gentecunaca pueblocunamanda llujshishpa, chaquilla catishpa rinajurca. 14Canoamanda llujshijushpaca, ashtaca ashtaca gentecunata ricushpami, Jesusca ninanda llaquirca. Shina llaquishpami, paicuna purapi tiaj huañujujcunata alichijurca. 15Ña tutayajujpimi, Jesuspaj yachajujcunaca, paipaj ladoman quimirishpa, cashna ninajurca:

—Ñamari tutayan. Cai pushtuca, jichushca pambami. Cai tucui gentecunaca, llactacunaman rishpa, imagutapash randishpa micunajuchun, cayacaman nishpa cachaillayari— ninajurcami.

16Shina nijpimi Jesusca, cashna nirca:

—Paicunaca na rinata charinllu. Cangunami, micunataca carana canguichi— nircami.

17Shina nijpimi, paipaj yachajujcunaca:

—Caipica na charinchica. Picha tandaguta, ishcai pijigutallami charinchi— ninajurca.

18Shina nijpimi, Jesusca:

—Chaigutallapash apamuichi— nirca.

19Shina nishpallami gentecunataca: “Cai jihua pambapi tiaripaichi” nishpa, Jesusca mandarca. Ña tiarijpimi, picha tandagutapash, ishcai pijigutapash Jesusca japishpa, jahua pachata ricushpa, Diosta pashi nirca. Chai tandacunata asha asha chaupishpami, paipaj yachajujcunaman cujpi paicunaca, tucuilla gentecunaman caranajurca. 20Shina carajpimi gentecunaca, na munangacaman micunajurca. Paicuna na micui ushashcataca, chunga ishcai canasta jundatami, paipaj yachajujcunaca tandachirca. 21Chaipi micushpa tianajuj purapica jaricunallami, picha huarangashna carca. Huarmicunata, huahuacunatacarin na cuentashcachu carca.

Jesusca, yacu jahuatami purijushca

(Mar. 6:45-52; Juan 6:15-21)

22Chai jipami, canoapi tiarishpa cuchata chimbachun, Jesusca paipaj yachajujcunata ñaupachishpa cacharca. Shina cachashpallami Jesusca, chai tucui gentecunata cayacaman nirca. 23Ña tucuicunata cayacaman nishpallami, Diosta mañangapaj Jesusca, urcuman pailla rirca. Ña tutayashcapimi Jesusca, pailla tiajurca. 24Paipaj yachajujcunaca, ñami chaupi cuchata canoapi rinajurca. Ninan huaira tuparimushpa, yacuta caiman chaiman shitajujpimi, canoatapash ninanda cuyuchijurca. 25Ña punllayanalla tucujujpimi Jesusca, yacu jahuata purishpa, paicunapajman shamujurca. 26Yacu jahuata Jesús shamujujta ricushpami, paipaj yachajujcunaca ninanda musparirca. Shina musparishpami:

—¡Ayamari shamujun!— nishpa, ninanda manllarishpa caparinajurca.

27Ashtahuangarin Jesusca, paicunata uchalla rimashpami:

—¡Ñucami shamujuni, ama manllarishpa, shinlli tucuichi!— nirca.

28Shina nijpimi, Pedroca:

—Apunchi Jesús, can cashpaca yacu jahuata shamushpa, canda tuparichun cayahuayari— nishpa tigrachirca.

29Shina nijpimi, Jesusca:

—Shamuilla— nirca.

Shina nijpimi canoamanda llujshishpa, Jesusta tuparingapaj Pedroca, yacu jahuata rijurca. 30Ashtahuangarin ninan huaira jatarimujta ricushpami, Pedroca manllarirca. Ña asha asha huashajui callarishpami:

—¡Apunchi Jesús, quishpichihuayari!— nishpa, ninanda caparirca.

31Shina caparijhuanmi Jesusca, Pedrota maquimanda japishpa:

—¡Na tucui shunguhuan crij runa! ¿Imashpata na ali crircangui?— nirca.

32Paicuna canoapi tiarijpica, huairapash chulunlla quedarcallami. 33Shinamandami, canoa ucupi tianajuj paipaj yachajujcunaca, Jesuspaj ñaupajpi ninanda alicachinajurca. Shina alicachishpami:

—Canga, Taita Diospaj Churipachami capangui— ninajurca.

Genesaret llactapimi, Jesusca huañujujcunata alichishca

(Mar. 6:53-56)

34Chai cuchata chimbashpaca, Genesaret shuti llactamanmi, paicunaca chayamurca. 35Chai llactapi causanajuj gentecuna Jesusta rijsishpami, chai muyundi llactacunapi tucuicuna yachachun, villachun cacharca. Shina cachajpimi, tucuilla huañunajuj gentecunataca Jesuspajman apamunajurca. 36Chai huañujujcunaca: “Cambaj churajushca pundagupillapash tacarichun saquihuai” ninajurcami. Jesús churajushcapi tacarijcunaca, tucuilla ali tucurcallami.

Currently Selected:

MATEO 14: QUII

Highlight

Copy