MATEO 1
1
Jesucristopaj ñaupa taitacunapaj shuticunami
(Luc. 3:23-38)
1Cai libropica, Jesucristopaj ñaupa taitacunapaj shuticunatami villajun. Jesucristoca Davidpaj, Abrahambaj miraimi. 2Abrahamga, Isaac shuti churitami charirca. Isaac runaca, Jacobo shuti churitami charirca. Jacoboca, Judá shuti churitapash, Judá runapaj huauquicunatapashmi charirca. 3Judá runaca, Tamar shuti huarmihuanga, Fares shuti, Zara shuti churicunatami charirca. Fares shuti runaca, Esrom shuti churitami charirca. Esrom shuti runaca, Aram shuti churitami charirca. 4Aram shuti runaca, Aminadab shuti churitami charirca. Aminadab shuti runaca, Naasón shuti churitami charirca. Naasón shuti runaca, Salmón shuti churitami charirca. 5Salmón shuti runaca, Rahab shuti huarmihuanga, Booz shuti churitami charirca. Booz shuti runaca, Rut shuti huarmihuanga, Obed shuti churitami charirca. Obed shuti runaca, Isaí shuti churitami charirca. 6Isaí runaca, jatun mandaj Davidpaj taitami carca. Jatun mandaj Davidca, Salomón shuti churitami charirca. Salomonbaj mamaca, Urías shuti runapaj huarmimi carca.
7Salomón runaca, Roboam shuti churitami charirca. Roboam shuti runaca, Abías shuti churitami charirca. Abías shuti runaca, Asa shuti churitami charirca. 8Asa shuti runaca, Josafat shuti churitami charirca. Josafat shuti runaca, Joram shuti churitami charirca. Joram shuti runaca, Uzías shuti churitami charirca. 9Uzías runaca, Jotam shuti churitami charirca. Jotam shuti runaca, Acaz shuti churitami charirca. Acaz shuti runaca, Ezequías shuti churitami charirca. 10Ezequías runaca, Manasés shuti churitami charirca. Manasesca, Amón shuti churitami charirca. Amón shuti runaca, Josías shuti churitami charirca. 11Josías runaca, Jeconías shuti churitami charirca. Jeconías runaca, ashtahuan shuj huauquicunatapashmi charirca. Paicuna causanajui punllacunapimi israelcunaca, Babilonia llactaman apai tucunajurca.
12Babilonia llactaman apai tucushca jipami, Jeconías shuti runaca, Salatiel shuti churita charirca. Salatiel runaca, Zorobabel shuti churitami charirca. 13Zorobabel runaca, Abiud shuti churitami charirca. Abiud shuti runaca, Eliaquim shuti churitami charirca. Eliaquim runaca, Azor shuti churitami charirca. 14Azor shuti runaca, Zadoc shuti churitami charirca. Zadoc runaca, Aquim shuti churitami charirca. Aquim shuti runaca, Eliud shuti churitami charirca. 15Eliud runaca, Eleazar shuti churitami charirca. Eleazarca, Matán shuti churitami charirca. Matán shuti runaca, Jacobo shuti churitami charirca. 16Jacoboca, José shuti churitami charirca. Paimi, Mariapaj cusa carca. Chai Mariami, Jesuspaj mama carca. Jesusca, Quishpichij Cristo shutimi.
17Ñaupa taita Abrahammanda, David causajui punllacaman, tucuimandaca chunga chuscu miraicunami carca. David causajui punllamanda Babilonia llactaman apai tucushca punllacamambash, chunga chuscu miraicunallatami carca. Shinallata Babilonia llactaman apai tucushca punllamanda Quishpichij Cristo huacharimui punllacamambash, chunga chuscu miraicunallatami carca.
Jesucristo huacharishcatami villajun
(Luc. 2:1-7)
18Jesucristo huacharimunaca, cashnami carca: Paipaj mama Mariaca, Josehuan cazarangapajmi ari nishca carca. Josehuan nara cazarajpillatami, Diospaj jucha illaj Espíritu Mariapajman shamujpi, Mariaca vijsayu tucushca carca. 19Shinamandami, paipaj cusa tucuna Joseca, imatapash cashcatapacha ruraj cashpa, tucuicunapaj ñaupajpi Mariata ama pingaichingapaj, upallamanda saquingapaj yarijurca. 20Chaita yarijujpimi, Taita Diospaj angelca, muscuipi ricurishpa Josetaca, cashna nirca: “Davidpaj mirai José, Mariataca ama saquishpa cazarailla. Paica, Diospaj jucha illaj Espíritu paipajman shamujpimi, vijsayu tucushca. 21Paica, shuj jari huahuagutami ungunga. Chai huahuagutaca, JESÚS shutitami shutichingui. Paica, paipaj gentecunata, paicunapaj juchamanda quishpichina cashpami, chashna shutiguta charinga” nircami.
22Tucui caicunaca, Jatun Dios yarichijpi profeta villashca pactachunmi, chashna tucurca. Paica cashnami nirca:
23“Jarihuan nara tacarishca cuitsagumi, vijsayu tucushpa,
shuj jari huahuaguta ungunga.
Paipaj shutica, Emanuelmi canga” nircami.
Emanuel nishpaca: “Taita Diosca ñucanchihuanmi” nijunmi.
24José rijcharishpaca, Jatun Diospaj ángel imashna paita mandashcashnallatami, Mariataca cazararca. 25Shina cazarashpapash, punda churiguta ungungacaman Joseca, na tacarircachu. Chai huahuagutaca, JESÚS shutitami shutichirca.
Currently Selected:
MATEO 1: QUII
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.