LUCAS 6

Jesuspaj yachajujcunaca, samana punllapimi trigo umata fitinajushca

(Mat. 12:1-8; Mar. 2:23-28)

1Samana punllapimi, cashna tucurca: Jesusca, paipaj yachajujcunandimi, trigo pambata yalinajurca. Chaipica, paipaj yachajujcunaca trigo umata fitishpami, maquihuan jacushpa granogutaca micunajurca. 2Huaquin fariseocunaca, cashnami ninajurca:

—¿Imashpata samana punllapica, na chashna ruranachu nishpa mandashcata na cazushpa, cangunaca chashna ruranajunguichi?— ninajurcami.

3Shina nijpimi Jesusca, cashna nishpa tigrachirca:

—Davidca, paihuan purijcunandi ninanda yarjachishpaca, imata rurashcatapash, ¿nachu leyishcanguichi? 4Chashna yarjachishpaca Davidca, Taita Diospaj huasimanmi yaicurca. Chaipica, Diosman carashca tandacunatami, paihuan purijcunandi micunajurca. Chai tandataca, mandashca shimipi nishcashnaca, na micunallachu carca. Chaitaca, curacunallami micui ushana carca— nijurcami.

5Shinallata cashnatapashmi nirca:

—Runa Aichayu tucushca ñucami, samana punllatapash mandaita ushani— nircami.

Maqui chaquishpa curparishca runatami, Jesusca alichishca

(Mat. 12:9-14; Mar. 3:1-6)

6Samana punlla cutin chayajpimi, cashna tucurca: Jesusca, tandanajuna huasiman yaicushpami yachachijurca. Chai ucupica, ali lado maqui chaquishca runagupashmi tiajurca. 7Chaipica, mandashca shimita yachachijcunapash, fariseocunapashmi tianajurca. Paicunaca, samana punllapi cai runata alichijpica, imashnallapash juchachishpa llaquichishun yashpami, Jesustaca ricurianajurca. 8Ashtahuangarin paicuna imata yarinajujtapash, Jesusca yacharcami. Shina yachashpami, maqui chaquishpa curparishca tiajuj runataca:

—Jatarishpa, cai chaupiman shamui— nirca.

Shina nijpimi, chai runaguca jatarishpa shayarirca. 9Chai jipami Jesusca, paita ricurianajuj runacunataca, cashna nirca:

—Cangunataca caitami tapuni: Mandashcapi nijunshnaca samana punllapica, ¿alita ruranachu ali, na cashpaca nalita ruranachu ali? ¿Causaita caranachu ali, na cashpaca huañuchinachu ali?— nishpami tapurca.

10Jesusca, chashna tapushca jipami, muyundi tucuilla gentecunata ricushpa, chai runagutaca:

—Maquita chutai— nirca.

Shina nijpi chutajpica, ñapash ali tucurcallami. 11Paicunaca, ninandapacha fiñashpami:

—Cai runataca, ¿imatata rurashunchi?— nishpa, paicunapura parlarinajurca.

Chunga ishcai villajcunatami, Jesusca agllashca

(Mat. 10:1-4; Mar. 3:13-19)

12Chai punllacunapimi Jesusca, Diosta mañangapaj urcuman rirca. Chai urcupimi, Taita Diosta mañashpa pacarirca. 13Ña punllayajpimi Jesusca, paita catijcunata cayashpa, paicuna puramanda chunga ishcaita agllarca. Shina agllashpami paicunataca, ñucamanda villajcunami canguichi nirca. 14Jesusca, paicunata agllashpami, Simón runataca, Pedro nishpa shutichirca. Paipaj huauqui Andrestapashmi agllarca. Shinallata Jacobo, Juan, Felipe, Bartolomé shuti runacunata agllarca. 15Mateo shuti, Tomás shuti runacunatapash, Alfeo shuti runapaj churi Jacobotapash, Zelote nishca Simón runatapashmi agllarca. 16Jacobopaj huauqui Judas shuti runatapashmi agllarca. Shinallata Judas Iscariote runatapashmi agllarca. Chai runami, Jesusta japichirca.

Jesusca, ashtaca gentecunamanmi alita rurajushca

(Mat. 4:23-25)

17Jesusca, paipaj yachajujcunandi urcumunda urai shamushpami, shuj pambaman chayarca. Chaipimi, paita catijcunahuan tandanajurca. Paicunaca, tucui Judea llactamanda, Jerusalenmanda, mama cucha manñapi tiaj Tiro shuti, Sidón shuti pueblocunamandapashmi, ashtaca gentecuna shamushca carca. Paicunaca, Jesús villajujta uyangapajpash, paicunapaj nanaicunata alichi tucungapajpashmi shamunajurca. 18Chaipica, nali ayacuna llaquichijpi causajcunatapashmi, Jesusca alichijurca. 19Jesusca, ninan ushaita charishpa tucuicunata alichijujpimi, paitaca tucuilla gentecuna tacaringapaj munarca.

Cushijushpa causanamandapash, aij nishpa causanamandapashmi villashca

(Mat. 5:1-12)

20Chai jipami Jesusca, paipaj yachajujcunata ricushpa, cashna nijurca: “Imagutapash na charij cangunaca, ninanda cushijuichi. Taita Dios mandanaca cangunapajmi. 21Cai causaipi yarjachishpa causajcunaca, ninanda cushijuichi. Diosmi, ashtacata cangunaman caranga. Cunambi huacashpa causajcunaca, ninanda cushijuichi. Cangunaca, jipamanmi asishpa causanguichi. 22Runa Aichayu tucushca ñucata catishcamanda, cangunata millanayachijpi, paicunahuan ama tandanajuchun cangunata caruyachijpi, nalicachishpa rimanajujpi, cangunapaj shutitapash nalita rurajcunapaj shutitashna yangapi churanajujpica, ninanda cushijuichi. 23Chashna llaquichijui punllacunapica, ninandapacha cushijunguichilla. Ricuichi, canguna juyailla japinaca, jahua pachapimi. Chashnallatami paicunapaj ñaupa taitacunapash, Dios ima nishcata villajcunataca llaquichinajurca.

24Ashtahuangarin ninan charijcunaca, ¡aij imachari tucunguichi! Cangunaca, ñami caipillata cushijushpa causanajunguichi.

25Cunambi na ushangacaman micushpa causajcunaca, ¡aij imachari tucunguichi! Cangunaca, jipamanmi yarjachinguichi. Cai causaipi cushijushpa asijcuna, ¡aij imachari tucunguichi! Cangunaca, jipamanmi ninanda llaquirishpa huacanguichi. 26Tucuicuna alicachijpi causajcunaca, ¡aij imachari tucunguichi! Chashnallatami paicunapaj ñaupa taitacunapash, llullashpa villajcunatara alicachishpa causanajurca.

Fiñajcunatapash juyachunmi, juyaillaguta yachachishca

(Mat. 5:38-48; 7:12)

27Ñuca villajujta uyanajuj cangunatami, cashna nini: Cangunata fiñajcunatapash, juyanami canguichi. Cangunata na ricunayachij runacunamambash, imatapash aligutami rurana canguichi. 28Imapash tucushpaca alichari canman nijcunatapash, bendicianami canguichi. Cangunata yangamanda juchachishpa rimajcunamandapash, Diosta mañanami canguichi. 29Pipash canda lado ñavipi huactajpica, caishuj ladotapash ricuchinguilla. Cambaj jahualla churajunata maijambash quichujpica, túnica nishca churajunatapash apachun saquinguilla. 30Pipash imagutapash mañaj shamujpica caranguilla. Shinallata cambajta imatapash apajpica, ama tigrachihuai ninguichu. 31Imashnami shuj gentecuna cangunaman imatapash aliguta rurachun munanguichi, chashnallatami cangunapash paicunaman alita rurana canguichi. 32Cangunata juyajcunatalla juyashpa causashpaca, ¿ima alitata ruranguichi? Juchata rurajcunapash, paicunata juyajcunatalla juyashpami causan. 33Shinallata cangunaman aliguta rurajcunatalla aliguta rurashpaca, ¿ima alitata ruranguichi? Juchata rurajcunapash, paicuna puralla aliguta rurashpami causanajun. 34Pimambash imata mañachishpapash, ucha tigrachinata yachajcunamanlla mañachishpaca, ¿ima alitata ruranguichi? Juchata rurajcunapash, paicuna purallami ashtacata japishallami yashpa mañachirinajun. 35Ashtahuangarin cangunata fiñajcunatapash, juyanami canguichi. Paicunaman alita rurashpa imagutapash mañachishpaca, imatapash japinataca na yarinachu canguichi. Shina rurajpimi, canguna japinaca ashtaca tianga. Shinallata jahua pachapi causajuj Diospaj huahuacunapachami canguichi. Paica, pashi ninata na yachajcunatapash, nalita rurashpa causajcunatapash llaquijunmi. 36Cangunapaj Taitaca, cangunata llaquishpami juyajun. Chashnallatami cangunapash shujcunataca, llaquishpa juyana canguichi.

Shujcunataca na yangamanda juchachinachu canguichi nishcami

(Mat. 7:1-5)

37Na yangamanda juchachishpa causanachu canguichi. Na chashna rurajpimi, cangunatapash na llaquichinga. Ninandapacha llaquichi tucunami cangui nitallapash, na ninachu canguichi. Na chashna rurajpimi, cangunatapash ninandapacha llaquichi tucunaman na cachanga. Imata nalita rurajpipash, cunganami canguichi. Shina cungajpimi, cangunapaj juchacunatapash Diosca cunganga. 38Shujcunaman caraichi, Diospash cangunaman carangami. Ali medishpa churashpa, tushuchishpa, jicharijta jundachishpami cangunaman migllachinga. Shujcunaman imashna medishpa carajpipash, chashnallatami Diospash cangunaman caranga” nijurcami.

39Jesusca, cashnatapashmi chimbapurashpa parlajurca: “¿Ñausa runaca, shuj ñausa runatallata pushashpa ri ushanmanllu? ¿Nacha paicunaca ishcandillata utujupi huashajunman? 40Yachajuj runaca, paita yachachijtaca na yalichu. Ashtahuangarin maijambash aligutapacha tucuita yachajushpaca, paita yachachij runashnallatami tucun. 41Cambaj huauquipaj ñavipi uchilla jupashna tiajujtara ricungapaj randica, ¿imashpata cambaj ñavipi caspishna tiajujtara, na tigrashpa ricungui? 42Cambaj ñavipi shuj jatun caspishna tiajujtara nara anchuchishpaca, ¿imashnata cambaj huauquipaj ñavipi uchilla jupashna tiajujtara: ‘Huauquigu, shuyai anchuchisha’ nitaca ushanguiyari? Mishqui shimi, nali shungumi cangui. Cambaj ñavipi jatun caspishna tiajujtara anchuchiyari. Chai jipami, cambaj huauqipaj ñavipi uchilla jupashna tiajujtaca, ali ricushpa anchuchi ushangui.

Ima yura cajtapash granota ricushpami rijsinchi

(Mat. 7:15-20)

43Na ali yurapica, alica na fucunllu. Ali yurapipash, imapash nalica na fucunllu. 44Ima yura cajtapash, granota ricushpami rijsirin. Jigostaca, casha yuramandaca na cozechanalla. Uvastapash, casha yuramandaca na pallanllu. 45Ali runaguca, imapash juyaillacunata alicachinshna, aligutalla ruranata paipaj shungupi yarijushpami, imatapash aligutalla riman. Ashtahuangarin nali runaca, imapash juyaillacunata alichinshna nalita ruranatalla, paipaj shungupi yarijushpami, imatapash nali shimicunatalla riman. Imata rimachumbash, shungu ninanda yarichijpimi, shimica riman.

Ishcai huasichij runacunamandami, Jesusca yachachishca

(Mat. 7:24-27)

46Ñucataca, ¿imashpata: ‘Apunchi Jesús, Apunchi Jesús’ nihuanguichi? Shina ninajushpaca, ¿imashpata ñuca mandashcataca, na ruranguichi? 47Ñucapajman shamushpa, ñuca yachachishcata uyashpa tucui pactachijcunaca, piman rijchaj cajtami cangunaman villagrini: 48Paicunaca, ucu ucuta allashpa ucuman jatun rumicunatara churashpa, chai jahuapi huasichij runashnami. Chaitaca, yacu ninanda jatarishpa jatun yacu shamushpami, ninanda huactarimurca. Ashtahuangarin chai huasitaca, jatun rumi jahuapi shayachishca cashcamandami, na cuyuchi usharca. 49Ashtahuangarin ñuca yachachishcata uyashpapash na cazujca, na ucuta allashpa jahualla huasichij runashnami. Chai huasica, yacu ninanda shamushpa huactarimujpica urmarcallami. Chai huasica, tucuilla t'unirishpami urmashpa tucurirca” nijurcami.

Currently Selected:

LUCAS 6: QUII

Highlight

Copy