LUCAS 4
4
Jesusmanmi, diabloca nali yuyaita cujushca
(Mat. 4:1-11; Mar. 1:12-13)
1Jesusca, Diospaj jucha illaj Espíritu jundami, Jordán yacumandaca tigrajurca. Shina tigrajujpica, Diospaj Espiritumi jichushca pambaman pusharca. 2Chuscu chunga punllacaman chaipi cajpimi diabloca, Jesusman nali yuyaita cujurca. Chai punllacunapica, imatapash na micushpami purijurcachu. Chai punllacuna yalishca jipami, ninanda yarjachirca. 3Shina yarjachijpimi diabloca, cashna nirca:
—Taita Diospaj Churipacha cashpaca, cai rumita tandaman tigrachi— nircami.
4Shina nijpimi Jesusca, cashna nirca:
—Escribishcapica cashnami nijun: ‘Gentecunaca, na tandahuanlla causangachu. Ashtahuangarin Taita Diospaj tucui Shimihuanmi causanga’ nijunmi— nircami.
5Chai jipami diabloca, shuj jatun urcuman, Jesustaca pusharca. Chai urcumandaca, cai pachapi tiaj tucui llactacunatami, ñapash ricuchirca. 6Shina ricuchishpami diabloca, Jesusta cashna nirca:
—Cai llactacunata mandana ushaitapash, chai juyailla llactacunatapash, ñucami canman cusha. Chaicunata mandajuchunga, ñucamanmi saquirca. Chaitaca, piman cungapaj munashpapash cushallami. 7Ñucata can cungurishpa mañajpica, tucuillatami canmanlla cusha— nircami.
8Shina nijpimi Jesusca, cashna nishpa tigrachirca:
—Satanás, ñuca ñaupajmanda anchuri. Escribishcapica cashnami nijun: ‘Canda Mandaj Taita Diostalla cungurishpa mañangui. Paitalla servishpa causangui’ nijunmi— nircami.
9Chai jipami diabloca, Jerusalenman Jesustaca pusharca. Chaipica, Diospaj huasi jahuaman vitsiachishpami, diabloca cashna nirca:
—Taita Diospaj Churipacha cashpaca, caimanda ucuman urmai. 10Cashna nishpami escribichishca tiajun:
‘Canda aliguta cuidachunga Taita
Diosca, paipaj angelcunatami cachamunga.
11Paicunami, rumipi can ama nitijachunga,
candaca maquipi charinajunga’ nijunmi— nircami.
12Shina nijpimi Jesusca, diablotaca cashna nishpa tigrachirca:
—Cashnatapashmi nijun: ‘Canda Mandaj Taita Diostaca, ama can munashcata rurachun mandanguichu’ nijunmi— nircami.
13Chashna nali yuyaita cungapaj munajushca jipami diabloca, asha punllacunata Jesusta saquishpa rirca.
Diospajta Jesús rurai callarishcatami villajun
(Mat. 4:12-17; Mar. 1:14-15)
14Jesusca, Diospaj jucha illaj Espiritupaj ushaihuan cashpami, Galilea llactaman tigrarca. Pai chaiman tigrashcataca, tucuilla muyundi llactacunapimi yachanajurca. 15Paica, chai gentecuna tandanajuna huasicunapimi yachachijurca. Shina yachachijujpimi Jesustaca, tucui gentecuna ninanda alicachinajurca.
Nazaret pueblomanmi, Jesusca rishca
(Mat. 13:53-58; Mar. 6:1-6)
16Jesusca, pai viñashca Nazaret pueblomanmi shamurca. Samana punllapica, tandanajuna huasiman rinata yachashpami, chai huasiman yaicurca. Chaipica, Diospaj Shimita leyingapajmi shayarirca. 17Shina shayajujpimi, profeta Isaías escribishca librota leyichun curca. Chai librota pascashpaca, cashna escribishca tiajujtami Jesusca tarirca:
18“Jatun Diospaj Espiritumi, ñucapi causajun.
Imagutapash na charijcunaman ali villaita villachunmi,
Taita Diosca aceiteta talishpa javihuashca.
Shungu faquirinshna llaquirishpa causajcunatapash,
cushichijuchunmi cachamuhuashca.
Prezu tiajcunamambash, ñami cachari tucugringuichi
nishpa villachunmi cachamuhuashca.
Ñausacunatapash alichijuchunmi cachamuhuashca.
Ninanda llaquichijpi causajcunatapash, cacharichunmi cachamuhuashca.
19Jatun Dios quishpichina huata chayamushcata
villachumbashmi cachamuhuashca” nijurcami.
20Shina leyishpaca, chai librogutaca pillushpami, chai huasipi servij runaman cushpa, Jesusca tiarirca. Chai huasi ucupi tandanajushca gentecunaca, tucuillami Jesustalla ricurianajurca. 21Shina ricunajujpimi Jesusca, cashna nishpa villai callarirca:
—Dios escribichishca Shimipi chashna nijushca shimicunaca, cunanllatami canguna uyanajujpi pactamushca— nircami.
22Chashna uyanayaita juyailla villajujpimi, tucuicuna manllarishpa ricushpa, Jesusta alicachishpa parlanajurca. Paicunapura parlarishpami:
—Cai runaca, ¿nachu Josepaj churi?— ninajurca.
23Shina nijpimi Jesusca, cashna nirca:
—Cangunaca, yarichij shimicunahuan cashna nihuanguichipachami: ‘Jambij runami cangui. Canllata jambirilla’ nihuanguichimi. Ñucataca: ‘Capernaum shuti pueblopi imata rurajtapash uyarcanchimi. Chashnallata cai cambaj llactapipash rurailla’ nihuanguichi— nircami.
24Shina nishpami Jesusca, cashnatapash nijurca:
—Na llullashpami, cangunataca cashna nini: Dios ima nishcata villaj runataca, llacta purallata cashpapash, na ali chasquinllu. 25Cashnatapash, na llullashpami nini: Elías villajui punllacunapica, ashtaca sapalla huarmicunami, cai Israel llactapica tiarca. Chai punllacunapica, quimsa huata chaupicaman na tamiajpimi, tucui cai llactapi causajcunapaca ninan yarjai tiarca. 26Ashtahuangarin Eliastaca, chai sapalla huarmigucunata maijandapash ayudachunga na cachamurcachu. Ashtahuangarin Sidón shuti pueblo ladopi tiaj Sarepta shuti pueblopi causajuj sapalla huarmigutalla ayudachunmi, Diosca cacharca. 27Shinallatami, profeta Eliseo villajui punllacunapipash, lepra ung:uihuan huañujujcunaca, ashtacacuna cai Israel llactapica tiarca. Shina cajpipash chaicunataca, shujllatapash na alichircachu. Ashtahuangarin Siria llactamanda Naamán shuti runatallami alichirca— nijurcami.
28Shina nishpa villajujta uyashpaca, chai huasi ucupi tandanajushca tucuilla gentecunaca, ninandami Jesusta fiñarca. 29Shina fiñashpa jatarishpami Jesustaca, pueblomanda llujchishpa jaca rumicuna tiaj pushtupi shitagringapaj, urcu pundaman apanajurca. Chai puebloca, urcu jahuapimi carca. 30Ashtahuangarin paicunapaj chaupitallatami, Jesusca yalishpa rirca.
Mapata rurachij aya jundashca runamandami villajun
(Mar. 1:21-28)
31Jesusca, Galilea llactapi tiaj Capernaum shuti puebloman urai rishpami, samana punllacunapi yachachijurca. 32Ninan ushaita charishpa juyailla yachachijujpimi, gentecunaca manllarinajurca.
33Tandanajuna huasi ucupica, mapata rurachij aya jundashca runami tiajurca. Chai runami ninanda caparishpa, 34cashna nijurca:
—Nazaret pueblomanda Jesús. ¿Canga, imapajta ñucanchitaca fiñachingapaj shamungui? ¿Canga, ñucanchita tucuchingapajchu shamushcangui? Candaca, maijan cajtapash rijsinipachami. Canga, Taita Dios cachamushca Jucha Illajmi cangui— nijurcami.
35Shina nijpimi Jesusca, chai ayataca:
—Upallai, chai runamandaca llujshi— nishpa shinllita rimarca.
Shina nijpimi chai runataca, tucuicunapaj ñaupajpi urmachishpa, chai ayaca llujshirca. Shina urmachishpapash, na ninanda llaquichircachu. 36Chaita ricushpami, gentecunaca ninanda manllarishpa, caishuj chaishuj cashna nishpa parlarinajurca:
—Cai runaca, ¿imashpata chashna rimai ushan? Mapata rurachij ayacunata ninan ushaihuan rimajpica, llujshinllamari— ninajurcami.
37Jesús chashna rurashcataca, chai llacta tucuilla ladocunapimi yachanajurca.
Pedropaj suedratami, Jesusca alichishca
(Mat. 8:14-15; Mar. 1:29-31)
38Chai tandanajuna huasimanda llujshishpaca, Simonbaj huasimanmi Jesusca yaicurca. Chaipica, Simonbaj suedrami tabardillo ung:uihuan huañujurca. Shina huañujujpimi, alichipai nishpa Jesustaca ninanda mañanajurca. 39Shina nijpimi Jesusca paipajman quimirishpa, chai tabardillo ung:ui yalichun, shinllitapacha rimarca. Shina rimajpimi, tabardillo ung:uica yalirca. Ali tucushpa jatarishpaca, chai mamaguca paicunaman micunaguta cararcallami.
Indi ña huashajujujpimi, ashtaca huañujujcunata alichishca
40Indi ña huashajujujpimi, shuj shuj nanaicunata charishpa huañujujcunata, tucuicunata Jesuspajman apamunajurca. Chai huañujujcunapaj umapi maquita churashpami, Jesusca alichijurca. 41Shinallata ashtaca gentecunamandami, ayacunapash llujshinajurca. Chai ayacunaca:
—Canga, Taita Diospaj Churimari cangui— nishpa ninanda caparishpami llujshinajurca.
Quishpichij Cristo cajta rijsijpimi Jesusca, ayacuna ama ashtahuan rimachun, jarcashpa shinllita rimarca.
Galilea llactapimi, Jesusca villashpa purijushca
(Mar. 1:35-39)
42Ña punllayajujpimi, chai pueblomanda llujshishpa Jesusca, jichushca pambaman rijurca. Gentecunaca, Jesusta mascagrishpa tuparishpami, paicunapaj llactamandaca ama richun jarcanajurca.
43Ashtahuangarin Jesusca, paicunataca cashnami nirca:
—Taita Dios mandajujmanda ali villaitaca, shuj pueblocunapipash villanapachami cani. Shina villachunmi, ñucataca cachamuhuarca— nircami.
44Galilea llactapi purijushpami, tandanajuna huasicunapi Jesusca villajurca.
Currently Selected:
LUCAS 4: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
