LUCAS 20

Jesuspaj ushaimandami villajun

(Mat. 21:23-27; Mar. 11:27-33)

1Shuj punllami, cashna tucurca: Diospaj huasi ucupi gentecunaman Jesús yachachijushpa, ali villaitapash villajujpimi, curacunata mandajcunapash, mandashca shimita yachachijcunapash, mandaj rucucunapash, Jesuspajman ñapash chayamurca. 2Paicuna chayamushpami, Jesustaca cashna nishpa tapurca:

—¿Pipaj ushaihuanda caicunataca, cashna rurajungui? ¿Pita chashna rurachun, candaca mandarca? Villahuai— ninajurcami.

3Shina nijpimi Jesusca, paicunatapash cashna nirca:

—Ñucapashmi, cangunataca shujta tapugrini. Ñuca tapushcata tigrachihuaichi. 4Juan bautizachunga, ¿jahua pachamandachu cachamushcanga, na cashpaca runacunachu cachamushcanga?— nircami.

5Shina nijpimi, paicunapura cashna nishpa parlarinajurca: “¿Ima nishunchita? ‘Juanga, jahua pachamanda cachamujpimi shamurca’ nijpica: ‘¿Imashpata pai villajujta na crircanguichi?’ ningami. 6‘Runacuna cachamujpillami shamurca’ nijpipash, rumicunahuanmi tucuilla gentecuna ñucanchitaca huañuchinga. Chai gentecunaca: ‘Juanga, Dios ima nishcata villajmi’ ninajunmari” nishpami parlarinajurca. 7Shina parlarishpami: “Maimandacha shamurcapash, na yacharipanllu” ninajurca. 8Shina nijpimi Jesusca, cashna nirca:

—Ñucapash, maijambaj ushaihuan chashna rurajujtaca, na villashachu— nircami.

Alpata trabajaj jatun nali runacunamandami villajun

(Mat. 21:33-44; Mar. 12:1-11)

9Chashna nishpallami Jesusca, cashna chimbapurashpa parlai callarirca:

—Shuj runagumi, paipaj alpapi uvasta tarpurca. Alpata trabajaj shuj runacunaman chai alpata partido cushpami, unai unaipi tigramungapaj rirca. 10Ña fucuna punllacuna pactajpimi, chai alpayu runaca, chai runacunataca uvas fucushcata carahuai nishpa apamugrichun, paipaj servijta cacharca. Ashtahuangarin chai servij runagutaca macashpami, imatapash na cushpa, chai runacunaca tigrachirca. 11Chashna tigrachijpimi, chai alpayu runaca, cutin shuj servijta cacharca. Paitapash macashpa, ninanda rimashpa pingaichishpami, imatapash na cushpa, chai runacunaca tigrachirca. 12Chashna tigrachijpica, caihuanga ña quimsatami cutin shuj servij runaguta cacharca. Ashtahuangarin paitapash chugringacaman macashpami, chagra ucumanda llujchishpa shitarca.

13Chashna rurajpimi, uvas chagrayu runaca, cashna yarirca: ‘¿Cunanga, imatata rurasha? Ñuca juyashca churigutami cachagrini. Ñuca churiguta ricushpaca, napashchari imatapash rurangachu’ yajurcami. 14Ashtahuangarin alpata trabajaj chai runacunaca, chai churigu shamujujta ricushpami, paipura cashna ninajurca: ‘Paimi, cai alpataca japinga. Cai alpata ñucanchi japingapaj, paita huañuchingapaj shamuichi’ ninajurcami. 15Chai churigutacarin, uvas chagramanda llujchishpami huañuchirca. Chashna rurashcamandaca, chai alpayu runaca, ¿imatashi ruranga? 16Pai shamushpaca, chai runacunataca huañuchishpa tucuchishpami, uvas chagratapash shujcunaman cunga— nijurcami.

Jesús chashna nijta uyashpami, gentecunaca:

—¡Chashna rurachunga, Taita Diospash ama saquishcanman!— ninajurcami.

17Ashtahuangarin Jesusca, paicunata ricushpami cashna nirca:

—Dios escribichishca Shimipica, cashnami nijun:

‘Huasichij runacuna na munashpa shitashca rumillatami,

huasichi pirca tigranapi churana rumi tucushca’ nijunmi.

Chaitaca, ¿imashpashi chashna nijun? 18Maijambash chai rumipi urmashpaca, faquiringami. Shinallata maijambaj jahuapipash, chai rumi urmashpaca, ñutuitami ñutunga— nircami.

¿Impuestotaca cunapachachu? nishpami tapushca

(Mat. 21:45-46; 22:15-22; Mar. 12:12-17)

19Paicunata uyachishpa, Jesús chashna chimbapurashpa parlashcata yachashpami curacunata mandajcunapash, mandashca shimita yachachijcunpash Jesustaca, chaipillata japingapaj munanajurca. Ashtahuangarin gentecunata manllashpami, na japi ushanajurca. 20Paicunaca japingapaj munashpami, pacalla imatapash cashcatapacha rurajcunashnalla purishpa, Jesusta catiriashpa ricuchun runacunata cacharca. Imatapash Jesús nalita tigrachijpica, llactata mandashpa ushaita charijman japichingapaj nishpami, chashna cacharca. 21Paicunaca, cashna nishpami Jesustaca tapunajurca:

—Yachachij, canga imatapash cashcatapacha rimashpa yachachijujtami yachapanchi. Canga, nali causaj gentecunamambash, na agllashpami yachachijungui. Ashtahuangarin Taita Diospaj ñambi causachunmi, tucuicunaman na llullashpa yachachijungui. 22Cesarman impuestota cunaca, ¿ñucanchita mandashca shimipi nijunshna alichu, nachu ali?— nishpami tapunajurca.

23Ashtahuangarin imata tigrachijpipash juchachingapaj, chashna tapunajujta yachashpami, Jesusca cashna nirca:

—¿Imashpata cangunaca, cashna pandachij shamuhuanguichi? 24Culquita apamuichi, ricusha. ¿Pipaj ñavita, pipaj shutita cai culquipica tiajun?— nishpa tapujpimi:

—Cesarpajmi— ninajurca.

25Shina nijpimi Jesusca, cashna nirca:

—Cesarpaj cajpica, Cesarmanllatami cuna canguichi. Ashtahuangarin Taita Diospaj cajtaca, Taita Diosmanmi cuna canguichi— nircami.

26Paicuna Jesusta chashna tapushpapash, tucuicunapaj ñaupajpi ima nalita tigrachishcatapash na tarishpami, manllarishpa upalla shayanajurca.

¿Huañushcacunaca causaringachu? nishpami, Jesustaca tapushca

(Mat. 22:23-33; Mar. 12:18-27)

27Chai jipami, Jesusta tapungapajmi huaquin saduceocunaca shamurca. Paicunaca: “Huañushcacunaca na causaringachu” nishpa purijcunami. 28Paicunami, Jesustaca cashna nishpa tapunajurca:

—Yachachij. Ñucanchita mandashpami, Moisesca cashna escribishpa saquishca: ‘Shuj runaca, huahuacunata nara charishpami, paipaj huarmitaca saquishpa huañunga. Chai huarmitaca, paipaj cati huauqui cazarashpa, punda huauquipaj randi huahuacunata charichun’ nishcami. 29Ñucanchi llactapimi, canchis huauqui puracuna tiarca. Punda huauqui cazarashpaca, huahuacunata nara charishpallatami, huarmitaca saquishpa huañurca. 30Chai huarmitaca, cati huauquimi cazararca. Paipash, huahuacunata nara charishpallatami huañurca. 31Chaipaj jipa huauquipash, chashnallatami chai huarmihuan cazarashpalla huañurca. Chashnami, chai canchispura huauquicunaca, chai huarmihuan cazarashpapash, huahuata nara charishpallata huañurca. 32Paicuna tucuilla huañushca jipami, chai huarmipash huañurca. 33Chashnami chai canchispura huauquicunaca, chai huarmihuanlla cazaranajurca. Huañushcacuna causarimui punllapica chaicunapaca, ¿maijambajta huarmi canga?— nishpami tapunajurca.

34Shina tapujpimi Jesusca, cashna nishpa tigrachirca:

—Cai causaipillami cazarashpa causanajun. 35Ashtahuangarin jipa causaiman apai tucujcuna, huañushcacunapaj chaupimanda causachi tucujcunaca, na cazarangachu. Cazaranaca, napacha tiangachu. 36Paicunaca, cutinga na huañushpami, angelcunashna causanajunga. Taita Dios causachijpimi, paipajlla huahuacuna causanajunga. 37Huañushcacuna causarinataca, Moisespashmi yachachirca. Chaitaca, zarza yuramanda parlashpa pai escribishcapimi yachachijun. Chaipimi cashna nijun: ‘Jatun Diosca, Abrahambaj, Isaacpaj, Jacobopaj Taita Diosmi’ mijunmi. 38Taita Diosca, huañushcacunapaj Taita Diosca na canllu. Ashtahuangarin causajcunapaj Diosmi. Diospaj ñaupajpica, tucuicunami causanajun— nijurcami.

39Shina nijpica:

—Yachachij, canga aligutamari ningui— nishpami, mandashca shimita yachachijcunaca, huaquingunaca ninajurca.

40Jesús chashna nijpimi, pipash ashtahuan tapuitaca, na usharca.

Quishpichij Cristoca, ¿pipaj churita canga?

(Mat. 22:41-46; Mar. 12:35-37)

41Jesusca, paicunataca cashna nishpami tapurca:

—Gentecunaca, ¿imashpata Quishpichij Cristoca: ‘Ñaupa taita Davidpaj churimi canga’ ninajun? 42Davidllatami, Salmos libropica cashna nijurca:

Jatun Diosca, ñucata Mandajtami cashna nirca:

‘Canga, ñuca ali ladoman tiajuilla.

43Canda na ricunayachijcunata can saruchun,

cambaj chaquipi ñuca churangacaman tiajuilla’ nijurcami.

44Quishpichij Cristotaca, Davidllatami:

‘Jatun Diosmi cangui’ nijujpica,

¿imashpata Davidpaj churi cangayari?— nircami.

Mandashca shimita yachachijcunatami, Jesusca nalicachishca

(Mat. 23:1-6; Mar. 12:38-40; Luc. 11:37-54)

45Tucuilla gentecuna uyanajujpimi Jesusca, paipaj yachajujcunaman cashna nishpa villajurca: 46“Mandashca shimita yachachijcunataca, napacha catinachu canguichi. Paicunaca, chaqui pundacaman churajunata churajushpami, cushijushpa purinajun. Paicunataca, plazacunapipash alillachu capanguichi ninajuchunmi munan. Tandanajuna huasicunapipash, paicunata alicachishpa ricunajuchunmi, ñaupajpi tiarinajun. Shinallata boda huasicunapipash, alipilla tiarishpami purinajun. 47Sapalla huarmicunapaj huasicunatapashmi, langanshna tucuchinajun. Chashna rurashpaca, alipi ricuringapaj yashpami, Diostaca unai unaita mañaj tucunajun. Paicunaca, chashna cashcamandami, ashtahuan ninanda llaquichi tucunajunga” nijurcami.

Currently Selected:

LUCAS 20: QUII

Highlight

Copy