LUCAS 11

Diosta imashna mañanata, Jesús yachachishcami

(Mat. 6:9-15; 7:7-11)

1Jesusca, shuj pambapi Diosta mañajujpimi, cashna tucurca: Jesús mañaita tucuchishca jipami, paipaj yachajuj puramanda shujca cashna nirca:

—Bautizaj Juanbash, paipaj yachajujcunataca, Diosta mañachun yachachinmi carca. Shinallata ñucanchitapash, Diosta imashna mañanata yachachihuai, Apunchi Jesús— nircami.

2Shina nijpimi Jesusca, cashna nishpa yachachirca:

—Diosta ima hora mañashpapash, cashna ninguichi: ‘Jahua pachapi tiajuj ñucanchi Taitalla, cambaj jucha illaj shutiguca, alicachi tucushca cachun. Can mandanaca, ucha chayamushpami ali canman. Imashnami jahua pachapica can munashcashna ruranajun, chashnallata cai pachapipash can munashcashna ruranajushpami ali canman.

3Punllandi ñucanchi micunagutaca, cunan punllagupash carahuailla.

4Ñucanchica, ñucanchita imatapash nalita rurashcacunataca ñami cungarcanchi. Chashnallata ñucanchi ima juchata rurashcatapash cungahuailla. Imatapash rurana munaicunamandapash, ucha jarcahuangui. Ashtahuangarin ima nalimandapash huacaichihuangui’ ninguichi— nijurcami.

5Shina nishpallami Jesusca, cashnatapash nijurca: “Cangunapaj huasiman shuj cumba runagu chaupi tuta shamushpami, cashna nijunman: ‘Taitalla, ¿nacha quimsa tandaguta mañachihuanguiman? 6Ñucapaj rijsij runagumi, caru llactamanda chaira chayamun. Imagutapash na carai ushashpami shamupani’ nijunmanmi. 7Shina nijpica, ucumanda cashna nishpami tigrachinman: ‘Ama fiñachihuaichu. Pungutapash, ña ali vichashcami. Huahuacunapash, ñucahuanmi ali puñunajun. Canman mañachingapaj jataritaca, na ushanichu’ nijunmanmi. 8Cangunataca, cashnami nini: Cumba cashpapash mañachingapaj na jatarijushpapash, ama yapata fiñachijuchunmi, imata mañashcata cungapaj jatarinman. 9Cashnatapashmi nini: Diosta mañaichi, paica carangallami. Mascaichi, taringuichimi. Punguta huactachishpa cayaichi, paica pascangallami. 10Diosta tucui mañajcunaca japingami. Mascajpash taringami. Punguta huactachishpapash, pascajpi yaicungami. 11¿Maijan taitata cangunapaj huahuacuna tandaguta carahuai nishpa mañajpica, rumita caranguichiman? Na cashpaca, piji aichaguta carahuai nijpipash, ¿maijanda culebrataca caranguichiman? 12Shinallata lulunguta carahuai nijpica, ¿maijanda alacrandaca caranguichiman? 13Cangunaca nalicuna cashpapash, huahuacuna mañajpica, imatapash aligutami caranata yachanguichi. Jahua pachapi cangunapaj Taitacarin, paipaj jucha illaj Espirituta mañajpica, ¿nachu caranman?” nijurcami.

Huasi ucupura paicunapura fiñanajushpaca, shicanyashpami tucuringa

(Mat. 12:22-30; Mar. 3:20-27)

14Shuj runaguta upaman tigrachishpa charijuj ayatami, Jesusca llujchirca. Chai ayata llujshijpimi, chai runaguca ñapash rimarca. Chaita ricushpami, gentecunaca ninanda manllarirca. 15Ashtahuangarin chai puracunamanda huaquingunaca, cashnami ninajurca:

—Cai runaca, ayacunata mandaj Beelzebú shuti diablopaj ushaita charishpami, ayacunataca llujchishpa cachan— ninajurcami.

16Huaquingunaca, imata tigrachijpipash juchachingapajmi, jahua pachamanda imagutapash rurashpa ricuchijuchun mañanajurca.

17Ashtahuangarin Jesusca, paicuna maitapash yarinajujta yachashpami, cashna nijurca:

—Shuj llactapi mandajcuna, paicunapura fiñanajushpa shicanyarishpaca, chai llactaca llaquinayaitami tucurinman. Shinallata huasi ucu puracuna fiñanajushpaca, shicanyarishpami maitapash rishpa tucurinman. 18Chashnallata Satanás mandajuj ayacuna, paicunapura fiñanajushpa shicanyajpica, ¿pai mandashpa tiajunaca tiajunmanllachu? ‘Beelzebú shuti diablopaj ushaihuanmi, ayacunata llujchishpa cachan’ ninajujpimi, cashnaca nijuni. 19Beelzebú shuti diablopaj ushaihuan ayacunata ñuca llujchishpa cachajujpica, ¿pipaj ushaihuanda cangunapaj yachajujcunaca, ayacunata llujchishpa cachan? Shinamandami, cangunapaj yachajujcunallata cangunapaj juezcuna tucunga. 20Ashtahuangarin Taita Diospaj maquihuan ushaita carajpi, ayacunata ñuca llujchijushpaca, cangunapaca Taita Diospacha mandajpi causana pactamushcatami ricuchijuni. 21Shuj ninan shinlli runa macanajunahuan alichirishcalla, paipaj huasita cuidajujpica, imaguta charishcapash ali tiajunllami. 22Ashtahuangarin paitapash yali shuj ninan shinlli runa shamushpaca, yalishpa macashpami, macanajungapaj pai cushijushpa charijushcatapash quichushpa apanman. Pai imatalla charishcatapash quichushpami, cumbacunaman chaupishpa caranman.

23Maijambash na ñucahuan cashpaca, ñucata fiñajmi. Maijambash na ñucahuan tandachishpaca, ñuca tandachingapaj munashcatapash, calpachishpami saquin.

Mapata rurachij ayata llujchishpa cachajpipash, cutin tigranllami

(Mat. 12:43-45)

24Mapata rurachij aya shuj runamanda llujshipaca, chaquishca pambacunapimi causangapaj mascashpa purijun. Shina mascashpapash, na tarishpami: ‘Ñuca punda causajushca runapajmanllata, cutin tigrashalla’ nishpa tigran. 25Shina tigrashpaca, aliguta fichashca, juyailla alichishca huasitashnami, chai runataca tarin. 26Chashna tarishpaca, chai ayaca paitapash yali millai ayacunata, canchis purata pushangapajmi rin. Chai ayacunaca, tucuilla chai runapi yaicushpaca, chai runataca, punda causajushcatapash yali nalimanmi tigrachin— nijurcami.

Maijan ashtahuan ninanda cushijuitami villashca

27Chashna nishpa Jesús villajujpimi:

—Canda ungushpa chuchuchishpa viñachij mamaca, ninandami cushijun— nishpa shuj huarmica, gentecunapaj chaupimanda shinllita caparirca.

28Shina nijpimi Jesusca, cashna nirca:

—Taita Diospaj Shimita yachachijpi uyashpa pactachijcunaca, ashtahuan ninandami cushijun— nircami.

Jatun nali miraicunaca, imatapash rurashpa ricuchijuchunmi munashca

(Mat. 12:38-42)

29Ashtaca gentecuna tandanajushpa jundamujpimi, Jesusca cashna nijurca:

—Cunan miraicunaca, nali gentecunamari. Chaimandami, imatapash juyailla rurashcata ricungapaj munashpapash, napacha ricunga. Dios ima nishcata villaj Jonás imashnami tucurca, chashnatallami ricunga. 30Imashnami Nínive pueblopi causajcunapaca, Jonasca shuj ricuchina carca, chashnatallami cunan viñaicunapash Runa Aichayu tucushca ñucataca ricuhuanga. 31Jatun mandaj Salomón runaguca, alipacha yachajushcami carca. Pai yachachijujta uyangapaca, urai llactata jatun mandaj huarmimi, caru caru llactamanda shamurca. Chai huarmimi, Dios llaquichijui punllapica, cunan miraicunataca ninanda llaquichi tucunapachami canguichi nishpa jataringa. Ñucami, Salomondapash yali caipi cani. 32Nínive shuti pueblopi causajcunaca, Jónas villajpimi, ninanda llaquirishpa Diospajman tigrarirca. Dios llaquichijui punllapimi, Nínive shuti pueblopi causashca gentecunaca, cunan miraicunataca ninanda llaquichi tucunapachami canguichi nishpa jataringa. Ñucami, Jonastapash yali caipi cani.

Ñavica, cuerpopaj michagumi nishcami

(Mat. 6:22-23)

33Michata maijan japichishpaca na pacanllu, cajón ucupillapash na churanllu. Ashtahuangarin huasi ucuman yaicujcuna micha punchayachijujpi ricushpa yaicuchunmi, michataca candeleropi churan. 34Cambaj cuerpopaj michaguca, ñavimi. Shinamandami, cambaj ñavi ali cajpica, cuerpogupash tucuilla michagushnallapacha punchayachijun. Ashtahuangarin cambaj ñavi nali cajpica, cambaj tucuilla cuerpomi yana yanapi causajun. 35Ricui, cambaj shungupi tiajuj michagu ama chashna yanaman tigrachunmi, aliguta yariashpa causana cangui. 36Cambaj tucuilla cuerpogu michashna punchalla cashpami, na yanapishna causashpa, micha ucupishna tucuilla punchalla causangui— nijurcami.

Mandashca shimita yachachijcunatapash, fariseocunatapashmi Jesusca nalicachishca

(Mat. 23:1-36; Mar. 12:38-40; Luc. 20:45-47)

37Chashna parlashpa Jesús tucuchijpimi, shuj fariseo runaca:

—Micungapaj ñuca huasiguman ripashun— nirca.

Chai fariseopaj huasiman Jesús chayashpaca, micungapaj tiarircallami. 38Paica, maquita na maillashpami, micungapaj tiarirca. Chaita ricushpami, fariseo runaca manllarirca. 39Shina manllarijpimi Apunchi Jesusca, cashna nijurca:

—Can fariseocunaca vasotapash, platopapash huashatalla maillanatami yachanguichi. Ashtahuangarin cangunapaj shungupica macashpa shuhuana yuyaihuan, imatapash nalita rurana yuyaihuanlla jundami canguichi. 40Juizu illajcuna. ¿Nachu ima tiachumbash churaj Diosllata, shungutapash churarca? 41Canguna imata charishcatapash, shujcunaman caranami canguichi. Shina carajpimi, mapacunataca tucuilla maillanga. 42¡Aij fariseocuna, ashtahuangarin cangunaca imachari tucunguichi! Cangunaca mentatapash, rudatapash, micunapi chapuna verdecunatapash, chungamanda shujgutami, Diosman caranata yachanguichi. Shina cashpapash imatapash cashcatapacha ruranataca na rurashpami, Taita Diostaca na juyashpa causanguichi. Chashna ruranataca, aliguta pactachishpami, Diosman caranatapash na saquishpa causana canguichi. 43¡Fariseocuna, cangunaca aij imachari tucunguichi! Cangunaca, tandanajuna huasicunapipash, ñaupajpi tiaringapaj munanguichi. Shinallata plazacunapipash, alillachu capanguichi ninajuchunmi munanguichi. 44Mandashca shimita yachachijcuna, fariseocuna, ¡aij imachari tucunguichi! Cangunaca mishqui shimi, jayaj shungucunami canguichi. Cangunaca, huañushcata pambashpa, gentecuna ama ricuchun imatapash na churashcashnamari canguichi. Chashna cajpimi gentecunaca, chai jahuata purinajushpapash, imatapash na yachan— nijurcami.

45Shina nijpimi, mandashca shimita yachachij puracunamanda shuj runaca, cashna nirca:

—Can cashna nishpaca, ñucanchitapashmari pingaichijungui, Yachachij— nircami.

46Shina nijpimi Jesusca, cashna nijurca:

—Mandashca shimita yachachij cangunapash, ¡aij imachari tucunguichi! Cangunaca, shuj runaman jatun quipita na ushajta apachinshnami, na pactachi ushanallata ninanda yachachinguichi. Chashna yachachishpapash, cangunallata chai quipitaca dedohuanllapash na tacarinshnami, na pactachingapaj munanguichi. 47¡Aij cangunaca, imachari tucunguichi! Dios ima nishcata villajcunata cangunapaj ñaupa taitacuna huañuchishpa pambashca bovedacunataca, cangunami shayachinajunguichi. 48Chashna rurashpami, cangunapaj ñaupa taitacuna huañuchishcata alicachishpa cushijunajushcataca, chashnapachami nishpa ricuchinajunguichi. Paicuna huañuchishca villajcunata pambashca bovedacunatami, cangunaca mushujyachishpa ruranajunguichi. 49Shina cajpimi, Taita Diosca tucuita ali yachashpa, cashna nirca: ‘Ñuca ima nishcata villajcunatapash, ñucamanda villachun agllashcacunatapash cachamushami. Paicunataca, huaquingunataca huañuchingami, huaquingunataca catiriashpami llaquichinga’ nircami. 50Cai pachata Dios rurashca punllamandapacha callarishpami, Dios ima nishcata villajcunataca huañuchinajurca. Chashna rurashcamandami Diosca, cunan viñaicunataca ninanda llaquichijunga. 51Abel runaguta huañuchi callarishpaca, Zacarías runagucamanmi huañuchinajurca. Chai runagutaca, altarhuan, Diospaj huasihuan chaupipimi huañuchinajurca. Cangunataca, cashnami nini: Paicunata huañuchishcamandaca Diosca, cunan viñaicunataca ninanda llaquichingapachami. 52Mandashca shimita yachachijcuna cangunaca, ¡aij imachari tucunguichi! Diospaj Shimita gentecuna ama yachajuchunmi, cangunaca yachana llavetapash quichunshna charinguichi. Chashna cashpami, cangunapash na yachajushpa, shujcuna yachajungapaj munajcunatapash jarcanguichi— nijurcami.

53Shina nijujpimi, mandashca shimita yachachijcunapash, fariseocunapash Jesustaca ninanda fiñai callarirca. Chashna fiñashpami, imatapash caita chaita tapuj tucushpa parlachinajurca. 54Imatapash nalita tigrachijpica, Jesustaca juchachishpa llaquichingapajmi, pacalla chapariashpa chashna tapuj tucunajurca.

Currently Selected:

LUCAS 11: QUII

Highlight

Copy