JUECES 2

Mandaj Diospaj angelca, Boquim shuti pueblopimi villashca

1Mandaj Diospaj angelca, Gilgal shuti pueblomanda, Boquim shuti puebloman vichai rishpami, cashna nijurca: “Ñucami cangunataca, Egiptomanda llujchimushpa, cangunapaj ñaupa taitacunaman carashami nishpa juramentushca cai llactaman pushamurcani. Ñucaca cashnami nircani: ‘Cangunahuan ari nishcataca, napacha yangapi churashachu. 2Cangunaca, cai llactapi causajcunahuanllami imatapash na ari nina canguichi. Paicunapaj altarcunataca, tucuillatami urmachina canguichi’ nircanimi. Ashtahuangarin cangunaca, ñuca nishcataca na cazushpami causarcanguichi. ¿Imashpata chashna rurarcanguichi? 3Shinamandami, ñucapash cashna nijuni: ‘Cai llactapi causajcunataca, cangunapaj ñaupajmanda na llujchishpa cachashachu. Ashtahuangarin cangunapaj huashapi astina angushnami canga. Paicunapaj dioscunapash, cangunata nitijachinshna pandachingapajmi canga’ nijunimi” nijurcami. 4Mandaj Diospaj ángel, tucui israelcunaman shina villajpimi, tucui gentecuna caparishpa huacanajurca. 5Shinamandami, chai pushtutaca, Boquim nishpa shutichirca. Chaipimi animalcunata, Mandaj Diosman cushpa huañuchinajurca.

Josué huañushcatami villajun

(Jos. 24:29-31)

6Josueca, ñami gentecunataca cayacaman nishpa cachashca carca. Israelcunapash, ñami paicuna japina llactacunata japingapaj rishca carca. 7Josué causajui tucui huatacunapi, Josuepaj randi mandaj rucucuna mandanajuj tucui huatacunapipashmi, israelcunaca Mandaj Diosta servinajushca carca. Chai rucucunami, jatun ruranacunata israelcunaman Mandaj Dios rurashcata ricushca carca. 8Mandaj Diosta servij Josueca, patsaj chunga huatacunata charishpami huañurca. Paica, Nun shuti runapaj churimi carca. 9Pai huañujpica, Efraín shuti urcupi tiaj Timnat-sera shuti pueblopimi, paipaj alpapi pambarca. Chai puebloca, Gaas shuti urcu janaj ladomanmi. 10Tucui chai miraicunapash huañushpami, paicunapaj ñaupa taitacunahuan tandanajugrirca. Chaipaj jipaca, Mandaj Diostapash na rijsij, israelcunamanda imatalla Dios rurashcatapash, na yachaj shuj miraicunami mirarca.

Israelcuna Diosmanda anchurishcatapash, juezcuna imatalla rurashcatapashmi villajun

11Chai jipami israelcunaca, Baal shuti dioscunata servishpa, Mandaj Diospaj ñaupajpi nalita ruranajurca. 12Paicunapaj ñaupa taitacunata Egipto llactamanda llujchimushca Mandaj Taita Diosta saquishpami, shuj dioscunatara catinajurca. Paicunapaj muyundi llactacunapi causajcunapaj dioscunatara ninanda alicachishpami, Mandaj Diostaca ninanda fiñachinajurca. 13Paicunaca, Mandaj Diosta saquishpami Baal, Astarot shuti dioscunatara ninanda alicachinajurca. 14Chaimandami Mandaj Diosca, nina japirinshna israelcunahuan fiñarishpa, shuhuacunapaj maquipi churarca. Paicunami, tucui ima charishcacunata quichushpa aparca. Shinallata paicunapaj muyundi llactacunapi causanajuj, paicunata fiñajcunapaj maquipipashmi churarca. Israelcunaca, paicunata fiñajcunahuan macanajuitaca, na usharcachu. 15Paicuna maiman llujshijpipash, paicunata fiñashpami, Mandaj Diosca paipaj maquihuan llaquichijurca. Mandaj Dios imashna villashcashnallata, Mandaj Dios juramentushpa villashcashnallatami llaquichijurca. Shinamandami israelcunaca, jatun llaquita apanajurca. 16Shina cashpapash Mandaj Diosca, paicuna ima charishcacunata apajcunapaj maquimanda cacharichingapajmi, juezcunata churarca. 17Ashtahuangarin pai churashca juezcunatapash, na cazushpami israelcunaca, shuj dioscunatara catishpa ninanda alicachishpa causanajurca. Paicunapaj ñaupa taitacuna, Mandaj Dios mandashcacunata cazushpa causanajushca ñanmandaca ñapashmi anchurinajurca. Na paicunapaj ñaupa taitacunashna causanajurcachu. 18Mandaj Diosca, israelcunata pushachun juezcunata mandashpaca, Mandaj Diosca chai juezcunahuanmi carca. Chaimandami, juezcuna causajui tucui huatacunapica, paicunata fiñajcunapaj maquimanda cacharichirca. Llaquichishpa charijcuna ninanda llaquichijpi aij nishpa causanajujpimi, Mandaj Diosca ninandapacha llaquirirca. 19Ashtahuangarin shuj juez huañujpica, cashnami tucun carca: Paicunaca, huashaman tigrashpami, shuj dioscunata servingapaj catishpa, paicunapaj ñaupa taitacunatapash yali huaglicunata ruranajurca. Chai dioscunapaj ñaupajpimi cungurishpa mañanajun carca. Chashna rurashpa yacharishca cashpami, nalita ruranatapash na saquinajurca. 20Chaimandami Mandaj Diosca, israelcunahuan nina japirinshna fiñarishpa, cashna nirca: “Cai gentecunaca, paicunapaj taitacunaman ari ninajushpa ñuca cushca mandashcatapash na cazushpami, ñuca rimashcacunatapash na cazunajun. 21Chashna rurashcamandaca Josué huañushpa, cai llactamanda na llujchishpa cachai ushashca gentecunataca, ñucapash cangunapaj ñaupajmanda na ashtahuan llujchishpa cachagrinichu” nircami. 22Mandaj Diosca, israelcunataca paicunapaj taitacunashnalla, paita cazungapaj munajta, na munajtapash ricungapajmi, chai llactapi causanajuj runacunataca, na llujchishpa cacharca. 23Shinamandami Mandaj Diosca, chai llactapi causanajuj gentecunataca na tucuilla llujchishpa cacharca. Chai gentecunataca, Josuepaj maquipipash na churarcachu.

Currently Selected:

JUECES 2: QUII

Highlight

Copy