HAGEO 2
2
Diospaj mushuj huasipica, punchapambami canga
1Canchis quillapaj, ishcai chunga shuj punllapimi Mandaj Diosca, pai ima nishcata villaj Hageo runagutaca, cashna nishpa villachun mandarca: 2“Cunanga, Salatiel shuti runapaj churi, Judá llactata mandaj Zorobabel shuti runata, Josadac shuti runapaj churi, curacunata mandaj Josueta, tucui caishuj gentecunataca, cashna ningui: 3‘Punda, cai huasi punchapamba cajta ricushca puramandaca, ¿maijambash causanguichirachu? ¿Cunanga, imashna cajtata ricunguichi? ¿Nachu cai huasica, canguna ricuipica imapash na tiashcashnallata ricurin? 4Chaimanda cunanga Zorobabel, shinlli tucui’ ninmi Mandaj Diosca. Shinallata: ‘Josadacpaj churi, curacunata mandaj Josuepash, shinlli tucui. Cai llactapi tucui causajcunapash, tucui shunguhuan trabajaichi’ ninmi Mandaj Diosca. ‘Ñucaca, cangunahuanmi cani’ ninmi tucuita Mandaj Diosca. 5‘Egiptomanda canguna llujshimujujpi, cangunahuan imashna ari nishcashnallatami, ñuca Espirituca cangunapaj chaupipi canga. Shina cashcamandami, na manllana canguichi’ ningui” nishpa villachunmi mandarca. 6Tucuita Mandaj Diosca, cashnatapashmi nin: “Cunanmanda huaquin punlla jipami jahua pachatapash, cai pachatapash, mama cucha yacutapash, chaquishca alpatapash chujchuchisha. 7Shinallata, tucui llactacunapi causajcunatapashmi chujchuchisha. Chai jipami, tucui llactacunapi causajcuna shamuchun munashca Runaca shamunga. Pai shamujpimi cai huasipica, punchapambata jundachisha” ninmi tucuita Mandaj Diosca. 8“Culquipash, oropash ñucapajmi” ninmi tucuita Mandaj Diosca. 9“Jipa rurashca cai huasica, punda rurashca huasitapash yali punchapambami canga” ninmi tucuita Mandaj Diosca. “Caipica, casilla ali causai tiachunmi churasha” ninmi tucuita Mandaj Diosca.
Israelcunataca, na cazujpimi jarcashpa rimashca
10Jatun mandaj Darío shuti runaca, ñami ishcai huatata mandajurca. Chai huatapaj iscun quilla, ishcai chunga chuscu punllapimi, Mandaj Diosca pai ima nishcata villaj Hageo shuti runagutaca, cai shimicunata cashna nishpa villachun mandarca: 11“Tucuita Mandaj Diosca, cashnami nin: ‘Cunanga, mandashcapi nishcacunata cashna nishpa, curacunata tapui: 12Maijan cashpapash, Diospajlla shicanyachishca aichata, paipaj churajunapi migllashpa apajujpica, tandahuan cashpa, aicha cusashcahuan cashpa, vinohuan cashpa, aceitehuan cashpa, na cashpaca ima shuj micunahuan cashpapash, chai churajunapi tacarishcamandalla, ¿Diospajlla micuna tucungachu? nishpa tapui’ ninmi” nichunmi mandarca. Shina tapujpica, chai curacunaca: “Na” ninajurcami. 13Hageo runaguca, cashnatapash tapurcarami: “Maijan cashpapash, huañushcapaj aichapi tacarishpaca, mapami tucun. Shina tucushpapash, Diospajlla micunacunapi tacarijpica, ¿mapachu tucunman?” nishpa tapujpimi, curacunaca: “Ari, mapami tucunman” ninajurca.
14Shina ninajujpimi Hageo runaguca, cashna nirca: “Mandaj Diosca, cashnami nin: ‘Ñuca ñaupajpica, cai llactapi causaj gentecunapash, chashna mapacunallatami. Paicuna imata rurashcapash, paicuna ñucaman imata carashcapash, chashna mapallatami. 15Shina cashcamanda cunanga, Mandaj Diospaj huasita nara pircai callarishpallata cunan punllamandapacha, cangunapaj shungupi aliguta yarinarami canguichi. 16Nara caicunata rurai callarishpaca, pusaj quintal chuscu chunga kilo granota apangapaj shamujpica, chuscu quintal ishcai chunga kilo granollami tiarca. Uvasta cutana pushtupi, picha chunga fundu vinota llujchingapaj shamujpipash, ishcai chunga fundullami tiarca. 17Ñucami, canguna tarpushca granocunataca, rupajlla huairahuan, ung:uihuan, runduhuan chingachircani. Shina rurajpipash, napacha ñucapajman tigrarishpami causarcanguichi’ ninmi Mandaj Diosca” nircami. 18“Cangunaca, cunan punllamanda callarishpa, chaimanga cangunapaj shungupi aliguta yarinami canguichi. Mandaj Diospaj huasitaca, iscun quillapaj ishcai chunga chuscu punllapimi, rumicunata churashpa callarina canguichi. Chai punllamandapachami cangunapaj shungupica, aliguta yarina canguichi. 19Cangunapaj tarpuna muyucunaca, alichishcarami tiajun. Uvaspash, jigospash, granadillacunapash, olivos yuracunapash, nara sisanllu. Ashtahuangarin cunan punllamandapachami bendiciagrini” nircami.
Mandaj Diosca, Zorobabel shuti runaman alita rurashapachami nishcami
20Iscun quillapaj ishcai chunga chuscu punllapillatami, Mandaj Diosca cutinllata Hageo runaguman cai shimicunata cashna nishpa villarca: 21“Judá llactata mandaj Zorobabel shuti runaman, cashna ni: ‘Ñucami, jahua pachatapash, cai pachatapash chujchuchisha. 22Mandajuj llactacunata mandangapaj tiarinatapash urmachishami. Tucui llactacunata mandajuj llactacunapaj ushaitapash tucuchishami. Macanajuna carretacunatapash, chai carretacunapi purijcunatapashmi urmachisha. Shina urmachijpimi caballocunapash, chaipi tiarishpa purij soldadocunapash huañunajunga. Paicunapaj espadahuanllatami, caishuj chaishuj huañuchirinajunga. 23Paicunata chashna llaquichijui punllapica, Salatiel shuti runapaj churi ñucata servij can Zorobabel runatami, ñuca sellota churana surtijastashna alichisha. Ñucami, candaca agllarcani. Ñucaca, tucuita Mandaj Dios cashpami, chashna nini’ ni” nishpami villarca.
Currently Selected:
HAGEO 2: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
