GÉNESIS 12

Abramda, Taita Dios cayashcatami villajun

1Ashtahuangarin Mandaj Diosca, Abramdaca cashnami nishca carca: “Cambaj llactamanda, cambaj familia puramanda, cambaj taitapaj huasi ucu puramandapash llujshishpa, ñuca ricuchina llactaman rilla. 2Chaipimi cambaj miraimandaca, shuj jatun llactata rurasha. Candaca bendiciashpami, cambaj shutitapash jatunyachisha. Canmandami bendiciai tucunajunga. 3Canda bendiciajcunataca, bendiciashami. Canda ima llaquipash japishpaca alichari canman nijcunataca, paicunatapashmi llaquichisha. Canmandami, cai pachapi causanajuj tucuilla familiacunaca bendiciai tucunga” nircami.

4Shina nijpimi Abramga, Mandaj Dios imashna nishcashnallata, Harán shuti pueblomanda llujshishpa rirca. Lotpashmi, paihuan rirca. Harán pueblomanda llujshishpa rijushpaca, canchis chunga picha huatatami, Abramga charirca. 5Abramga, paipaj huarmi Saraitapash, paipaj huauquipaj churi Lottapashmi pushashpa rirca. Shinallata pai imatalla rurashcamanda japishpa, tucui charishcacunatapash, Harán pueblopi randishca runacunatapash pushashpami, Canaán llactaman ringapaj llujshi callarirca. Paicunaca, Canaán llactamanmi chayarca. 6Abrahamga, chai llactata yalishpa rijushpami, Siquem shuti pueblocaman, More shuti encina nishca quiru ladoman chayarca. Chai llactapica, cananeocunami causashca carca. 7Mandaj Diosca, Abramman ricurishpami: “Cambaj miraicunamanmi, cai llactataca carasha” nirca.

Chaipimi, paiman ricurishca Mandaj Diosman shuj altarta rurarca. 8Chai jipaca chaimandaca, Bet-el pueblomanda indi llujshimuj lado urcuman rishpami, paipaj carpata chaipi shayachirca. Bet-el shuti puebloca, indi huashajuj ladoman, Hai shuti puebloca, indi llujshimuj ladomanmi carca. Chaipimi, Mandaj Diosman altarta rurashpa, Mandaj Diospaj shutipi mañajurca. 9Chaimandapash rishpami Abramga, purishpa rijushpallata, Neguev llactaman chayagrirca.

Abramga, Egiptomanmi rishca

10Chai llactapica, ninan yarjai tiajpimi Abramga, Egiptopi causangapaj urai rirca. Llactapica, ninambacha yarjai tiajpimi, chashna rirca. 11Egiptoman ña yaicunajujpimi, cashna tucurca: Abramga, paipaj huarmi Saraitaca, cashnami nijurca: “Ricui, cunanmi candaca juyaillaguta ricujuj huarmi cajta ricuni. 12Egiptopi causajcuna canda ricushpaca: ‘Paipaj huarmimi’ ninajushpami, ñucataca huañuchishpa, candaca na huañuchinga. 13Cunanga, canga ñucapaj panimi cani ningui. Ñucapaca, canmanda imapash ali llujshichun, shinallata canmanda ñuca causaita charingapajmi, chashna nina cangui” nijurcami.

14Egiptoman Abram yaicujpimi, cashna tucurca: Egiptopi causajcunaca, chai huarmitaca ninan juyaillagupacha cajtami ricunajurca. 15Shinallata Faraón churashca mandajcunapashmi, Saraitaca chashnallata ricunajurca. Chashna ricushpami, Faraonbaj ñaupajpillata ninanda alicachinajurca. Shina cashcamandami Sarai huarmitaca, Faraonbaj huasiman pusharca.

16Abramdaca chai huarmimandami, Faraonga alita rurarca. Shina alita rurajpimi Abramga, llamacunata, huagracunata, burrocunata, huarmi burrocunata, camellocunata charirca. Servij jaricunata, huarmicunatapashmi charirca. 17Ashtahuangarin Faraondaca, paipaj huasi ucupi causajcunandimi Mandaj Diosca, Abrambaj huarmi Saraimandaca, ninan jatun llaquicunahuan llaquichirca. 18Chaimandami Faraonga, Abramda cayashpa cashna nirca: “¿Imatata canga, ñucahuanga cashna rurashcangui? ¿Imashpata cambaj huarmi cajtaca, na villahuarcangui? 19¿Imashpata: ‘Ñuca panimi’ nihuarcangui? Shinamandami, ñuca huarmi cachun ñalla japircani. Ricui, cunanga cambaj huarmica, caipimi pushashpa rilla” nircami. 20Shinamandami Faraonga, paipaj gentecunataca Abramdapash, paipaj huarmitapash, paipaj tucuilla charishcacunandi apashpa richun mandarca.

Currently Selected:

GÉNESIS 12: QUII

Highlight

Copy