ECLESIASTÉS 4
4
1Ñuca tigrarishpami, indi punllayachijuj cai pachapica, ninandapacha llaquichinajujta ricurcani. Ricuichi, llaquita apajcuna huacanajujpi cushichingapaca, pipash na tianllu. Ushaitapash, paicunata llaquichijcunallami charirca. Paicunata cushichij runaca, na tiarcachu. 2Ñucaca huañushcacunatami, ashtahuan alicachircani. ña huañushcacunatami, nara huañushpa causanajujcunatapash yali alicachircani. 3Shinallata indi punllayachijuj cai pachapi nalita ruranajujta nara ricushcacuna, nara huacharishcacunami, causajcunatapash, huañushcacunatapash yali ashtahuan cushijushca canga yajurcanimi.
4Shinallata ninanda trabajashpa, tucui imatalla aliguta charishcapash, runapaj yuyaipica, ñucapaj cashcanman yashpa munashpa paipaj cumbatallata fiñana yuyaitalla cun cashcatapashmi ricurcani. Chaicunapash yangallami, yuyaita shaijuchingapajllami.
5Maquita marcashca tiajuj shinlli shungu runaca, paillatami micunshna tucuchirijun. 6Ishcai maqui jundata ninanda trabajashpa, yuyaita shaijuchingapaj randica, shuj maqui jundatalla trabajashpa, ashaguta samanami ashtahuan ali.
7Ñuca tigrashpa cutin ricushpaca, indi punllayachijuj cai pachapica, imapash yangalla cajtami ricujurcani: 8Shuj runaca pailla causashpami, paipaj jipa maijan mandanatapash na charin. Shinallata churicunata, huauquitapash na charinllu. Shina cashpapash na samashpami trabajan. Paipaj ñavica, pai ashtaca charishcacunata ricujushpapash, na chaihuanlla cushijunllu. Shinallata: “¿Pimanda ñucaca cashna trabajajunilla, imamandata ñuca almataca ninanda shaijuchini?” nishpapash, na tapurinllu. Chaipash yangallami, shinlli trabajopachami.
9Shujlla causangapaj randica, ishcaipura causanami ashtahuan ali. Shina causashpami, imata rurashcamandapash ashtahuan japinata charin. 10Shuj urmajpipash, shujca paipaj cumbata jatarichingami. Ashtahuangarin, ¡aij shujlla causaj runalla! Pai urmajpi ashtahuan shuj jatarichij runaca, na tiangachu. 11Shinallata ishcandi parejo puñushpaca, ishcandimandami cunujlla puñunajunga. Ashtahuangarin shujlla cashpaca, ¿imashnata cunujlla puñunga? 12Shujlla cajpi, pipash macashpa mishajpica, ishcai tucushpami shinlli tucun. Shinallata quimsata caupushca racu puchapash, na ucha fitirinllu.
13Rucu jatun mandaj runaca, shinlli shungu cashpami, ali yuyaita cujpipash, ña na chasquingapaj munan. Chaipaj randica, imagutapash na charij huambragu alipacha yachajushca cashpami, ashtahuan ali. 14Chai jatun mandaj runa ca, imagutapash na charij huacharishca cashpapash, prezuna huasimanda llujshishpami, mandanata japirca. 15Indi punchayachijuj cai pachapi tucui causajcunataca, chai jatun mandajpaj randi, mandana huambraguhuan purinajujtami ricurcani. 16Paita catijcunaca, na tucurinalla ashtaca ashtaca gentecunami carca. Shina cashpapash paicunapaj jipa miraicunaca, paihuanga na cushijunajungachu. Chaipash yangallami, yuyaita shaijuchingapajllami.
Currently Selected:
ECLESIASTÉS 4: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
