HECHOS 14
14
Pablondi, Bernabendimi Iconio shuti pueblopi villanajushca
1Iconio shuti puebloman Pablondi, Bernabendi chayajpimi, cashna tucurca: Paicunaca, Judea llactapi causajcuna tandanajuj huasiman ishcandi yaicushpami, Diospaj Shimita villanajurca. Shina villanajujpimi, Judea llactapi causajcunapash, griego nishca gentecunapash, ashtaca gentecacuna Jesusta crinajurca. 2Ashtahuangarin Judea llactamanda na crijcunaca, crijcunata llaquichingapajmi, na israelcunaman huagli yuyaita cushpa pandachinajurca. 3Shinamandami, chaipilla ashtaca punllacunata shuyanajurca. Apunchi Jesusta yariashpami, na manllashpa villanajurca. “Diosca ninandami juyan” nishpa villajpimi, Apunchi Jesús paicunaman ushaita carajpi, imatapash juyaillagucunata, pipash na rurai ushashcacunatapash rurashpa ricuchinajurca. 4Chai pueblopi causajcunaca, ishcaipimi shicanyarca. Huaquingunaca, Judea llactapi causajcunatami catinajurca. Shujcunaca, villachun cachashcacunatami catinajurca. 5Chashna tucushpaca, Judea llactapi causajcunandi, na israelcunandi, paicunata mandajcunahuan parlarishpami Pablotapash, Bernabetapash pingaichishpa, rumicunahuan huañuchingapaj jatarinajurca. 6Pablondi, Bernabendi chaita yachashpami, Licaonia shuti llactapi tiaj Listra shuti, Derbe shuti pueblocunaman, tucui muyundi llactacunamambash pacajushpa rinajurca. 7Chai llactacunapipashmi, ali villaita villashpa purinajurca.
Listra shuti pueblopimi Pablotaca, rumicunahuan peganajushca
8Listra shuti pueblopimi, shuj runagu tiajurca. Paica, huacharishca punllamandapacha, na puri ushaj suchu runagumi carca. Paica, ima horapash na puri ushanllu carca. 9Chai runaguca, Pablo villajujpimi aliguta uyajurca. Ali tucushapachami yashpa crishpa uyajujtami, Pabloca ricurca. 10Shinata ricushpami, chai runagutaca:
—Jatarishpa aliguta shayarilla— nishpa, shinllita rimarca.
Shina nijpimi, fahuashpa ñapash puri callarirca. 11Pablo chashna alichijta ricushpami, chai gentecunaca licaonia nishca rimaipi, cashna nishpa caparinajurca:
—Dioscunamari runacunashnalla tucushpa, ñucanchipajman jahua pachamanda uriajumushca— ninajurcami.
12Bernabetaca, Júpiter shuti diosmi ninajurcami. Pablotaca, villaj cajpimi, Mercurio shuti diosmi ninajurca. 13Chai puebloman yaicuna pungupica, Júpiter shuti diospaj huasimi tiarca. Chai huasimanda curami, sisacunatapash apamurca. Ashtaca gentecunahuan tandanajushpami Pablopaj, Bernabepaj ñaupajpi, animalcunata cushpa huañuchingapaj munarca. 14Chashna ruragrinajujtaca, villachun cachashca Pablondi, Bernabendi uyashpami, paicuna churajushcata liquinajurca. Chai tucui gentecunapaj chaupiman caparishpa calpashpami, 15cashna ninajurca:
—Cangunaca, ¿imashpata cashna ruranguichi? Ñucanchipash, cangunashnallata runami canchi. Chashna yanga dioscunata saquishpa, causaj Taita Diospajman tigrarishpa quishpirichunmi, cangunaman villaj shamurcanchi. Paimi jahua pachata, cai pachata, mama cuchata, tucui ima tiachumbash churashca. 16Ñaupa punllacunapi causajcunataca, paicuna munashcashna causanajuchunmi Diosca saquirca. 17Shina cashpapash, pai juyashpa charijushcatami ricuchin cashca. Chaimandami, tamiachishpa granocunatapash fucuchishpa, ñucanchiman ima aligutapash carashpa cushichijun— ninajurcami.
18Shina nishpami huagracunata huañuchishpa, diosman caranshna carangapaj munajtaca Pablohuan, Bernabehuanga ashamandalla mana jarcai ushanajurca. 19Chai jipami, Judea llacta gentecunaca, Antioquía pueblomanda, Iconio shuti pueblomanda huaquinguna shamushpa, chaipi gentecunaman huagli yuyaita cujpi Pablotaca, rumicunahuan peganajurca. Chashna rurashpaca, huañushcami yashpami, pueblomanda aisashpa canllaman shitagrinajurca. 20Shina shitajpipash, Jesusta crishpa catijcunaca, Pablota chaupipi churashpami shayarinajurca. Pai jatarishpaca, cutin chai pueblomanllatami yaicugrirca. Chai cayandi punllami Pabloca, Bernabendi, Derbe shuti puebloman rirca.
21Chai pueblopipash, ali villaita villanajujpimi, Jesusta crishpa catijcunaca ashtacacuna tiarca. Chai jipaca Listra, Iconio, Antioquía shuti pueblocunamanmi tigranajurca. 22Chaipimi, Jesusta crishpa catijcuna aliguta crishpa catinajuchun Pablohuan, Bernabehuanga, cashna nishpa aliguta yarichinajurca: “Ninan llaquicunata apashpami, Taita Dios mandajuj llactaman yaicugrina canchi” ninajurcami.
23Shinallata crijcuna tandanajushca pueblocunapimi, mandaj rucucuna tiachun agllashpa churanajurca. Shina churashpaca, na micushpami, Jatun Diosta mañanajurca. Chai jipami, paicuna crinajuj Apunchi Jesusman minganajurca.
Siria llactapi tiaj Antioquía pueblomanmi Pablondi, Bernabendi tigrashca
24Pablondi Bernabendi, Pisidia shuti llactata yalishpaca, Panfilia shuti llactamanmi shamunajurca. 25Chai llactapi tiaj Perge shuti pueblopi, Diospaj Shimita villashpaca, Atalia shuti pueblomanmi urai rinajurca. 26Chai pueblomandaca, barcopimi Antioquía puebloman muyumurca. Chaipimi: “Taita Dios cangunata ninanda juyashpa pushachun” nishpa, crijcunaca Pablotapash, Bernabetapash, Diosman mingashca carca. 27Chaiman chayashpa tucuilla crijcunata tandachishpami, cashna nishpa villanajurca: “Taita Dios ñucanchihuan cashpami, aliguta rurachunga ninan ushaita cararca. Na israelcunaman villajpi, paicuna crichumbash paillatami, punguta pascanshna ushaita cararca” ninajurcami.
28Chai pueblopimi, yachajujcunahuan unaicaman quedarca.
Currently Selected:
HECHOS 14: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
