2 SAMUEL 24

Israelcunatami Davidca cuentachishca

(1 Crón. 21:1-27)

1Mandaj Diosca, cutinmi nina japirinshna israelcunahuan fiñarirca. Chaimandami Israel llactapi causajcunapash, Judá llactapi causajcunapash, mashna cajta yachangapaj cuentana yuyaita Davidman curca. 2Jatun mandajca, paihuan purij soldadocunata mandaj Joabtami, cashna nirca:

—Cunanga, Dan pueblomanda callarishpa, Beerseba shuti pueblocaman purishpa, tucui Israel aillucunapi mashna gentecuna tiajtapash, ñuca yachangapaj cuentagri— nircami.

3Shina nijpimi Joab runaca, jatun mandajtaca cashna nirca:

—Canda Mandaj Taita Diosca, cunan tiashca gentecunamandaca, shujmandalla patsajta mirachishpami ali canman. Chaitaca, ñuca amo can jatun mandajpash ricushpami ali capanguiman. Ashtahuangarin ñuca amo can jatun mandajca, ¿imashpata chashna rurangapaj munanguiyari?— nircami.

4Shina nijpipash, jatun mandaj rimashcami Joab runatapash, soldadocunatapash cazuchirca. Chaimandami Joab runapash, soldadocunata mandajcunapash, jatun mandajpaj ñaupajmanda llujshishpa, israelcunata cuentangapaj rirca. 5Paicunaca, Jordán yacuta chimbashpami, Aroer shuti pueblo ura ladopi tiaj Gad shuti jatun pamba chaupipi carpacunata shayachishpa tianajurca. Chaica, Jazer pueblopimi carca. 6Chai jipaca, Galaad llactaman rishpami, ucu ladoman tiaj Hodsi shuti pueblomambash rinajurca. Chaimandaca, Dan-jaán shuti puebloman, shinallata Sidón pueblo muyundipi tiaj llactacunamambashmi rinajurca. 7Chai jipaca, jatun pircahuan muyundi jarcashca, Tiro shuti pueblomanmi rinajurca. Shinallata heveo nishca, cananeo nishca gentecunapaj tucui pueblocunaman rishpami, Judá llactapi tiaj Neguev shuti pambapi tiaj Beerseba puebloman llujshirca. 8Paicunaca, tucuilla Israel llactata purishpa tucuchishca jipami, iscun quilla ishcai chunga punllapi Jerusalenman tigrarca. 9Chaipimi Joab runaca, gentecunata cuentashpa escribishcataca, jatun mandajman curca. Israel llactapica, pusaj patsaj huaranga shinlli runacunami espadahuan macanajunata yachajcuna tiarca. Judá llactapica, picha patsaj huaranga runacunami tiarca.

10Davidca, gentecunata cuentashpa yachashca jipami, paipaj shungupica ninanda llaquirirca. Shinamandami, Mandaj Diosta cashna nirca:

—Ñuca chashna rurashpaca, jatun juchatami rurashcani. Ashtahuangarin cunanga Mandaj Dioslla, canda servij ñuca cai juchata rurashcataca anchuchihuai nipanimi. Imatapash na yachaj runashnamari, chashna rurashcani— nircami.

11Tutamandata David jatarishca jipami, Dios imatalla ricuchishcata Davidman villaj Gad runaguman Mandaj Diosca, cai shimicunata cashna nishpa villarca: 12“Davidpajman rishpa, cashna nigri: Mandaj Diosca, cashnami nin: ‘Quimsa llaquicunatami, can agllachun cuni. Chai quimsamandaca, maijanhuan ñuca llaquichijuchun munashpapash, canllata agllailla’ ninmi nigri” nircami. 13Gad runaguca, Davidpajman shamushpami pai yachachun cashna nirca:

—¿Canga, imatata rurachun munangui? ¿Cambaj llactaman canchis huatata yarjaita cachamuchunllu munangui? ¿Na cashpaca canda fiñajcuna catishpa llaquichijpi, quimsa quillata pacajushpa puringapajchu munangui? ¿Na cashpaca cai cambaj llactaman quimsa punllata jatun ung:uita cachamuchunllu munangui? Cunanga chaitaca, aliguta yarishpa agllailla. Can imata nishcatami, ñucata caiman cachamujman villagrisha— nircami.

14Shina nijpimi Davidca, Gad shuti runataca cashna nirca:

—Jatun ninan llaquipimari cani. Cunanga, Mandaj Diospaj maquipi llaquichi tucushunchi. Pai llaquinaca, ninandapacha llaquinamari. Ashtahuangarin runacunapaj maquipi urmangapaca, na munanichu— nircami.

15Shina nijpimi Mandaj Diosca, tutamanda callarishpaca, llaquichisha nishca punllacaman, israelcunapaj jahuapi jatun ung:uita cachamurca. Chaimandami, Dan pueblomanda callarishpaca, Beerseba pueblocaman canchis chunga huaranga runacuna huañurca. 16Jerusalenbi causajcunata tucuchingapaj, ángel paipaj maquita ña chutajpimi Mandaj Diosca, pai llaquichijushcamandaca ninanda llaquirirca. Shina llaquirishpami, chai huañuchij angeltaca, cashna nirca: “Cunanga, ña chashnalla saqui, ama ashtahuan cambaj maquihuan llaquichijuichu” nircami.

Mandaj Diospaj angelca, jebuseopura Arauna shuti runapaj trillana pambapimi carca. 17Gentecunata huañuchishpa tucuchijuj angelta ricushpami Davidca, Mandaj Diostaca cashna nijurca:

—Ñucami juchata rurarcani, ñucami jatun nalita rurarcani. Llamagushnalla cai gentecunaca, ¿imatata rurapashcayari? Paicunata llaquichina randica ñucapajman, ñuca taitapaj huasi ucu purapajman, cambaj maquita tigrachishpa llaquichihuai nipanimi— nijurcami.

18Chai punllallatami Gad runaguca, Davidpajman shamushpa cashna nirca:

—Jebuseopura Arauna shuti runapaj trillana pambaman vichai rishpa, Mandaj Diosman shuj altarta shayachi— nircami.

19Shina nijpimi Davidca, Gad shuti runaguman Mandaj Dios imashna villachishcashnallata vichai rirca. 20Arauna shuti runaca vichai ricushpami, jatun mandajtaca paita servijcunandi paipajman shamunajujta ricurca. Chashna ricushpami, Arauna shuti runaca ucha tuparingapaj rishpa, jatun mandajpaj ñaupajpi cungurishpa, alpaman chayajta cumurirca. 21Chaipimi Arauna shuti runaca, cashna nirca:

—Ñuca amo jatun mandajca, ¿imashpata canda servij ñucapajman shamupangui?— nircami.

Shina nijpimi Davidca, cashna nirca:

—Trillana cai pambata, canda randingapajmi shamupani. Gentecunata huañuchijuj ung:ui jarcarichunmi, Mandaj Diosman shuj altarta caipi shayachingapaj munapani— nircami.

22Shina nijpimi Arauna shuti runaca, Davidtaca cashna nirca:

—Cai pambataca japilla. Caipica, ñuca amo can jatun mandajpaj imashna ali cajpipash rurapailla. Ricui, Diosman cushpa tucuillata rupachingapajpash, huagracunaca caipimi shayanajun. Yamdata rurangapaca, trillana caspicunapash, huagracunapaj yugo caspicunapash tianmi. 23Jatun mandajlla, ñucaca chaicunataca tucuillatami can jatun mandajman carapani— nircami.

Shinallata Arauna shuti runaca, jatun mandajtaca cashnatapashmi nirca:

—Chashna rurajpica, canda Mandaj Taita Diosca, canhuan ali tucungapashchari— nircami.

24Shina nijpimi jatun mandajca, Arauna shuti runataca cashna nirca:

—Na chashna rurashachu. Ashtahuangarin mashnata cashpapash cushpami randisha. Napash randishcataca, imashnata ñucata Mandaj Taita Diosman cushpa, tucuillata rupachishayari— nircami.

Shina nishpami Davidca, trillana pambatapash, huagracunatapash, picha patsaj canchis chunga gramota pezaj culquipaj randirca. 25Chaipimi Davidca, Mandaj Diosman shuj altarta shayachirca. Chai altarpimi, animalta Diosman cushpa huañuchishpa tucuillata rupachirca. Dioshuan ali cangapaj carashcacunatapashmi rupachirca. Chashna rurajpimi Mandaj Diosca, chai llactapi causajcuna ninanda mañanajujta uyashpa, chai huañuchij ung:uitaca, israelcunamanda anchuchirca.

Currently Selected:

2 SAMUEL 24: QUII

Highlight

Copy