Zhaŋe 21

Yɛsə kancɛ nda geva ke ka təkwə təkwə ŋkɛ mberefaŋe

1Tewə hɛ kedzeyi ne, pa Yɛsə ncɛte nda geva zhɛkwa ke mbeli nyi ketəkwə təkwə mɛa ndərəa Tibɛriyade. Wa nya tsetse ncɛte nda geva ŋkɛ ke hɛ: 2ma te ŋkwa nya kwetɛŋenyɛ ne, yɛ Simon Piyɛre, le Tomas nya heka mbeli kaKwalegha, le Natanayɛl nde Kana ta ka Galilɛ, le ŋwalea Zɛbɛdɛ, le kweci mbeli bake hwa nyi ketəkwə təkwə Yɛsə ya shɛ. 3Ma ke Simon Piyɛre sha hɛ: «Lə 'ya tekese kelepe.» Ma ke hɛ shɛ: «Lə n'yɛ yitea gha perə.» Pa hɛ dzawa kwambeləa nci. Hwencɛke ncɛke hɛ te viɗia shɛ kakese kelepe kaɗema hɛ kekeseve wəsə. 4Ghwɛɗɛɗɛa ŋkwa, hwa'a Yɛsə mɛa hələa shɛ. Ama keɗepe hɛ kaYɛsə ŋkɛ we. 5Ma ke sha hɛ: «Nahe yɛ kekeseve kelepe tse na megelɛshi.» Ma ke hɛ shɛ: «Ewə!» 6Ma ke sha hɛ: «Negheyi mə bararawea ŋayɛ dzawa te kwa zeme ta kwambelə nda nza yɛ kakemave.» Pa hɛ neghate, ndɛare hɛ va ntsehe va nya nza kelepe viɗi te. 7Ma ke wəndə nya ɗe Yɛsə za ma hwa nyi kezele sha Piyɛre: «Nde sleke ŋkwa wəndə nya.»

Nahe Piyɛre keseɗemte lekwesa ta ŋkɛ. Kwa fate ŋkɛ Nde sleke ŋkwa Yɛsə wəndəa shɛ, pa seɗete lekwesa ta ŋkɛ, fɛke neghate ghəa ŋkɛ te yɛmə. 8Ntake kweci mbeli nyi ketəkwə təkwə Yɛsə kase le kwambelə kantsehe bararawe va nya nza ŋkɛ viɗi va kelepe. Cakeɗake hɛ yitea hələbə we, gare ɓela ta seɗa gwəmsə. 9Sawama ta nci kwa kwambelə ne, dəkwə hɛ te laɗe ta ghwə gheme ba'a kelepe mɛ, ɗafa ya tagha yite. 10Ma ke Yɛsə sha hɛ: «Ntaveka mə kelepe nyi keseve yɛ.» 11Tarame Simon Piyɛre pelɛ kwambelə, fehe ŋkɛ ntsehakawa bararawe nya nza kelepe nyi jama jama viɗi te, gwəmsə ba'a mcɛfemsə mahekeneghəmbe pɛtɛa kelepea shɛhɛ. Ya kwela nza kelepe shɛhɛ kwele kwele ne, keŋkwahe bararawe. 12Ma ke Yɛsə sha hɛ: «Nde mə yitea ɗafa.» Kwete hwa hɛ kese ka'yɛwe: «Wa ŋkɛ na wa?», ke we, va nya ɗepe hɛ, gheŋkɛ Nde sleke ŋkwa. 13Pa Yɛsə hendeke nda geva ke hɛ, pa ŋkɛ ndeke nda ɗafa shɛ ke hɛ le kelepe.

14Kwa maheke ta zhigəa Yɛsə nyagha kancɛ nda geva ke mbeli nyi ketəkwə təkwə ghala kwa same ŋkɛ kwa kwele le mpi.

Yɛ Yɛsə le Piyɛre

15Kwa zehwe ɗafa hɛ ne, ma ke Yɛsə sha Simon Piyɛre: «Simon, wəzege ta Zhaŋe, kaɗe ɗa na za ma ke mbeli nyi na?» Ma ke Piyɛre shɛ: «E'e Nde sleke ŋkwa, nahe na keɗepe kaɗe ŋa 'ya.» Ma ke Yɛsə shɛ: «Yawa, ya zhɛgwəa lɛməa timɛtia ɗa.» 16Ma ke Yɛsə sha Piyɛre kakwa bake zhigə: «Simon, wəzege ta Zhaŋe, kaɗe ɗa na na?» Ma ke Piyɛre shɛ: «E'e Nde sleke ŋkwa, nahe na keɗepe kaɗe ŋa 'ya.» Ma ke Yɛsə shɛ: «Yawa, nza kande ya timɛtia ɗa.» 17Ma ke Yɛsə shɛ kakwa maheke zhigə: «Simon, wəzege ta Zhaŋe, kaɗe ɗa na pa na?» Benake Piyɛre va nya 'yɛwe Yɛsə kakwa maheke zhigə. Ma ke: «Nde sleke ŋkwa, nahe na keɗepe wəshi pɛtɛ, nahe na keɗepe ɓiyitsa kaɗe ŋa 'ya.» Ma ke Yɛsə shɛ: «Yewə, ya timɛtia ɗa.» 18Ma ke Yɛsə: «Kaganda ne, ma 'ya sha gha: ma kwa nza na kamempɛhweta ne, gha nde hwepe hətəa ŋa le ghəa ŋa, te ŋkwa nya ɗe na lə na, ama kehale na ne, kateslete dzeve na nda hwepete ŋa hətəa ŋa kwete wəndə, nya ketekele ŋa kadzete ŋkwa nya ɗema na.» 19Ma mbe ghena nya ne, Yɛsə ɗe kancɛ tsema tsema temte Piyɛre yitea ncɛ nda zləvəa Shala ke mbeli. Ma ke Yɛsə gezete nda: «Zare ɗa.»

Yɛ Yɛsə le nde təkwə təkwə nya ɗe ŋkɛ

20Tewətelɛwe ke Piyɛre ne, dəkwə ŋkɛ te kwete wəndə nya ɗe Yɛsə za ma. Gheŋkɛ nde se terasle mentishɛ vare Yɛsə kwa zeme ɗafa hɛ, nya kese 'yɛwe ve: «Nde sleke ŋkwa, wa wəndə nya ketepamte ŋa wa.» 21Kwa nakɛ Piyɛre, ma ke sha Yɛsə: «Nde sleke ŋkwa, ma wəndə nya ne, wa nde temene nda geva wa?» 22Ma ke Yɛsə: «Keɗe nza ta ŋkɛ 'ya teghweme vaŋe te veci nya tese 'ya ne, ŋa ŋa kwete hwe na? Gha ne, zare ɗa ke ta ŋa gi!» 23Deke te ghena shɛ ne, ma ke mbeli nyi kezele Yɛsə: «Mba wəndəa shɛ kamte zhɛkwa we.» Ndagwara kegezete nda Yɛsə ke Piyɛre: «Kamte ŋkɛ, ke we.» Ama «keɗe nza ta ŋkɛ 'ya teghweme vaŋe te veci nya tese 'ya, ŋa ŋa kwete hwe na» a ke shɛ.

24Nde təkwə təkwə Yɛsə shɛnyɛ nde neghate fete yitea wəshi nyi, gheŋkɛ nde rafete hɛ, nahe gheɓəmə keɗepe kaganda fete nya neghate ŋkɛ.

Kwa keɗaŋe ta ghena

25Kweci ghena ya shɛ kwele kwele nyi menete Yɛsə. Ma keɗe mbeli karafe ghena shɛ pɛtɛ kwete kwete kwete, ma zəzə 'ya ne, ŋkwa shɛ te hɛɗi kabete palepa shɛ we.

Currently Selected:

Zhaŋe 21: BEKDC12

Highlight

Copy